12.62C Vancouver 12.62C VancouverSep 19, 2024 3:31 PM - Connect Newsroom
ਕੰਜ਼ਰਵੇਟਿਵ ਲੀਡਰ ਪੀਅਰੇ ਪੋਲੀਵਰੇ ਦੀ ਪਤਨੀ ਨੇ ਜਗਮੀਤ ਸਿੰਘ ਵਲੋਂ ਉਨ੍ਹਾਂ ਦੇ ਪਤੀ 'ਤੇ ਕੀਤੀ ਗਈ ਟਿੱਪਣੀ ਦੇ ਜਵਾਬ ਵਿਚ ਤਿੱਖਾ ਪਲਟਵਾਰ ਕੀਤਾ ਹੈ।
ਦਰਅਸਲ, ਜਗਮੀਤ ਸਿੰਘ ਨੇ ਸੰਸਦ ਦੇ ਬਾਹਰ ਉਨ੍ਹਾਂ ਨਾਲ ਹੋਈ ਬਦਤਮੀਜ਼ੀ ਲਈ ਪੋਲੀਵਰੇ 'ਤੇ ਹਮਲਾ ਬੋਲਿਆ ਸੀ, ਉਨ੍ਹਾਂ ਦਾ ਕਹਿਣਾ ਸੀ ਕਿ ਪਿਛਲੇ ਕਈ ਦਿਨਾਂ ਤੋਂ ਓਟਾਵਾ ਵਿਚ ਸ਼ਰਾਰਤੀ ਅਨਸਰ ਉਨ੍ਹਾਂ ਕੈਨੇਡੀਅਨਜ਼ ਨੂੰ ਪਰੇਸ਼ਾਨ ਕਰ ਰਹੇ ਹਨ ਜੋ ਉਨ੍ਹਾਂ ਨਾਲ ਸਹਿਮਤ ਨਹੀਂ ਅਤੇ ਪੋਲੀਵਰੇ ਇਸੇ ਤਰ੍ਹਾਂ ਦਾ ਹੀ ਦੇਸ਼ ਚਾਹੁੰਦੇ ਹਨ।
ਅਨਾਇਦਾ ਪੋਲੀਵਰੇ ਨੇ ਇਸ 'ਤੇ ਪਲਟਵਾਰ ਕਰਦੇ ਕਿਹਾ ਕਿ ਜੋ ਤੁਹਾਡੇ ਨਾਲ ਹੋਇਆ ਉਹ ਗਲਤ ਸੀ ਤੇ ਅਜਿਹਾ ਨਹੀਂ ਹੋਣ ਚਾਹੀਦਾ ਪਰ ਲੋਕ ਦੁਖੀ ਹਨ ਅਤੇ ਪਿਛਲੇ 8 ਸਾਲਾਂ ਤੋਂ ਮੇਰੇ ਪਤੀ ਇਸ ਦੇਸ਼ ਨੂੰ ਨਹੀਂ ਚਲਾ ਰਹੇ ਸਗੋਂ ਜਿਸ ਸਰਕਾਰ ਦਾ ਤੁਸੀਂ ਸਮਰਥਨ ਕਰਦੇ ਹੋ ਲੋਕ ਉਸ ਦੀਆਂ ਨੀਤੀਆਂ ਤੋਂ ਗੁੱਸੇ ਵਿਚ ਹਨ।
ਅਨਾਇਦਾ ਨੇ ਸਿੰਘ 'ਤੇ ਹਮਲਾ ਬੋਲਦੇ ਕਿਹਾ ਕਿ ਅਪਰਾਧੀ ਇੰਨੀ ਆਸਾਨੀ ਨਾਲ ਕਿਉਂ ਛੁਟ ਜਾਂਦੇ ਹਨ? ਤੁਸੀਂ ਸੇਫ ਸਟ੍ਰੀਟ ਚਾਹੁੰਦੇ ਹੋ? ਤਾਂ ਫਿਰ ਲਿਬਰਲ ਦੀਆਂ ਉਨ੍ਹਾਂ ਨੀਤੀਆਂ ਦਾ ਸਮਰਥਨ ਕਿਉਂ ਕਰ ਰਹੇ ਹੋ ਜਿਨ੍ਹਾਂ ਕਾਰਨ ਇਹ ਗੜਬੜੀ ਹੋਈ ਹੈ।
ਅਨਾਇਦਾ ਨੇ ਕਿਹਾ ਕਿ ਮੇਰੇ ਪਤੀ ਕਿਸ ਤਰ੍ਹਾਂ ਦੇਸ਼ ਚਾਹੁੰਦੇ ਹਨ ਤਾਂ ਜਗਮੀਤ ਸਿੰਘ ਧਿਆਨ ਨਾਲ ਸੁਣ ਲਓ, ਉਹ ਅਜਿਹਾ ਦੇਸ਼ ਚਾਹੁੰਦੇ ਹਨ ਜਿੱਥੇ ਮਿਹਨਤ ਦਾ ਫਲ ਮਿਲੇ, ਲੋਕਾਂ ਨੂੰ ਕਿਰਾਇਆ ਤੇ ਭੋਜਨ ਵਿਚੋਂ ਇੱਕ ਨੂੰ ਚੁਣਨ ਲਈ ਮਜਬੂਰ ਨਾ ਹੋਣਾ ਪਵੇ ਤੇ ਘਰ ਖਰੀਦਣਾ ਹਰ ਕਿਸੇ ਲਈ ਕਿਫਾਇਤੀ ਹੋਵੇ।
