19.42C Vancouver 19.42C VancouverJun 12, 2024 4:44 PM - The Canadian Press
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇਤਾਵਾਂ ਦੇ ਸਾਲਾਨਾ ਸੰਮੇਲਨ ਵਿਚ ਸ਼ਾਮਲ ਹੋਣ ਲਈ ਬੁੱਧਵਾਰ ਨੂੰ ਇਟਲੀ ਜਾ ਰਹੇ ਹਨ। ਤਿੰਨ ਦਿਨਾਂ ਇਹ ਸੰਮੇਲਨ ਵੀਰਵਾਰ ਨੂੰ ਇਟਲੀ ਦੇ ਅਪੁਲੀਆ ਵਿਚ ਸ਼ੁਰੂ ਹੋ ਰਿਹਾ ਹੈ, ਜਿਸ ਵਿਚ ਟਰੂਡੋ ਸਮੇਤ 77 ਦੇ ਹੋਰ ਲੀਡਰਾਂ ਵਲੋਂ ਰੂਸ-ਯੂਕਰੇਨ ਅਤੇ ਇਜ਼ਰਾਈਲ-ਹਮਾਸ ਯੁੱਧ,ਊਰਜਾ ਪਰਿਵਰਤਨ, ਨਕਲੀ ਬੁੱਧੀ, ਪ੍ਰਵਾਸ ਅਤੇ ਅਫ਼ਰੀਕਾ ਨਾਲ ਸਹਿਯੋਗ ਬਾਰੇ ਚਰਚਾ ਕਰਨ ਦੀ ਉਮੀਦ ਹੈ।
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਔਟਵਾ ਵਾਪਸ ਆਉਣ ਤੋਂ ਪਹਿਲਾਂ ਸ਼ਨੀਵਾਰ ਅਤੇ ਐਤਵਾਰ ਨੂੰ ਸਵਿਜ਼ਰਲੈਂਡ ਵਿਚ ਯੂਕਰੇਨ ਸ਼ਾਂਤੀ ਸ਼ਿਖਰ ਸੰਮੇਲਨ ਵਿਚ ਵੀ ਹਿੱਸਾ ਲੈਣਗੇ। ਜੀ-7 ਵਿਚ ਕੈਨੇਡਾ, ਅਮਰੀਕਾ, ਯੂ. ਕੇ., ਜਰਮਨੀ, ਫਰਾਂਸ, ਇਟਲੀ ਅਤੇ ਜਾਪਾਨ ਸ਼ਾਮਲ ਹਨ, ਜਿਨ੍ਹਾਂ ਦੇ ਨੇਤਾ ਸਾਂਝੇ ਹਿੱਤਾਂ ’ਤੇ ਸਹਿਯੋਗ ਲਈ ਹਰ ਸਾਲ ਬੈਠਕ ਕਰਦੇ ਹਨ।
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਇਸ ਵਾਰ ਦੀ ਬੈਠਕ ਵਿਚ ਪ੍ਰਮੁੱਖ ਤੌਰ ’ਤੇ ਸਾਫ਼ ਊਰਜਾ ਪਰਿਵਰਤਨ, ਗਲਤ ਜਾਣਕਾਰੀ ਅਤੇ ਵਿਦੇਸ਼ੀ ਦਖ਼ਲਅੰਦਾਜ਼ੀ ਦੇ ਨਾਲ-ਨਾਲ ਬਣਾਵਟੀ ਗਿਆਨ ਦੇ ਮੁੱਦੇ ’ਤੇ ਬੋਲਣਗੇ।
ਟਰੂਡੋ ਵਲੋਂ ਇਸ ਬੈਠਕ ਵਿਚ ਸ਼ਾਮਲ ਹੋ ਰਹੇ ਵਰਲਡ ਲੀਡਰਸ ਨਾਲ ਦੁਵੱਲੀ ਮੀਟਿੰਗਾਂ ਕਰਨ ਦੀ ਵੀ ਉਮੀਦ ਹੈ। ਉੱਥੇ ਹੀ, ਅਗਲੇ ਸਾਲ ਜੀ-7 ਸਿਖਰ ਸੰਮੇਲਨ ਦੀ ਮੇਜ਼ਬਾਨੀ ਕੈਨੇਡਾ ਕਰੇਗਾ।
