ਪੀ.ਐੱਮ. ਜਸਟਿਨ ਟਰੂਡੋ ਕੁਝ ਹੋਰ ਦਿਨ ਸਾਂਭਣਗੇ ਪ੍ਰਧਾਨ ਮੰਤਰੀ ਦੀ ਕੁਰਸੀ

ਪੀ.ਐੱਮ. ਜਸਟਿਨ ਟਰੂਡੋ ਦਾ ਕਹਿਣਾ ਹੈ ਕਿ ਪ੍ਰਧਾਨ ਮੰਤਰੀ ਦੇ ਰੂਪ ਵਿਚ ਉਨ੍ਹਾਂ ਦਾ ਅੰਤਿਮ ਸਰਕਾਰੀ ਦਿਨ ਅਜੇ ਨਿਰਧਾਰਤ ਨਹੀਂ ਕੀਤਾ ਗਿਆ ਹੈ। ਟਰੂਡੋ ਦੀ ਇਹ ਟਿੱਪਣੀ ਉਦੋਂ ਆਈ ਹੈ ਜਦੋਂ ਲਿਬਰਲ ਪਾਰਟੀ ਐਤਵਾਰ ਨੂੰ ਆਪਣੇ ਅਗਲੇ ਨਵੇਂ ਲੀਡਰ ਦੇ ਨਾਮ ਦੀ ਘੋਸ਼ਣਾ ਕਰਨ ਵਾਲੀ ਹੈ।

ਉਨ੍ਹਾਂ ਅਮਰੀਕੀ ਟੈਰਿਫ ਖਿਲਾਫ ਜਵਾਬੀ ਕਦਮ ਦੀ ਘੋਸ਼ਣਾ ਕਰਦੇ ਹੋਏ ਪ੍ਰੈੱਸ ਕਾਨਫਰੰਸ ਵਿਚ ਕਿਹਾ ਕਿ ਇਹ ਪਾਰਟੀ ਦੇ ਨਵੇਂ ਲੀਡਰ ਅਤੇ ਮੇਰੇ ਵਿਚਕਾਰ ਗੱਲਬਾਤ 'ਤੇ ਨਿਰਭਰ ਕਰੇਗਾ ਕਿ ਤਬਦੀਲੀ ਕਿੰਨੇ ਸਮੇਂ ਤੱਕ ਹੋਣਾ ਚਾਹੀਦੀ ਹੈ।

ਟਰੂਡੋ ਨੇ ਕਿਹਾ ਕਿ ਇਹ ਜਲਦੀ ਹੋਣਾ ਚਾਹੀਦਾ ਹੈ ਪਰ ਇਸ ਤਰ੍ਹਾਂ ਦੀ ਤਬਦੀਲੀ ਵਿੱਚ ਬਹੁਤ ਕੁਝ ਕਰਨ ਦੀ ਜ਼ਰੂਰਤ ਹੈ, ਖਾਸ ਕਰਕੇ ਇਸ ਮੁਸ਼ਕਲ ਸਮੇਂ ਵਿਚ। ਗੌਰਤਲਬ ਹੈ ਕਿ ਟਰੂਡੋ ਨੇ 6 ਜਨਵਰੀ ਨੂੰ ਆਪਣੇ ਅਸਤੀਫੇ ਦੀ ਘੋਸ਼ਣਾ ਕੀਤੀ ਸੀ ਅਤੇ ਕਿਹਾ ਸੀ ਕਿ ਪਾਰਟੀ ਦੇ ਨਵੇਂ ਲੀਡਰ ਦੇ ਚੁਣੇ ਜਾਣ ਤੱਕ ਉਹ ਪੀ.ਐੱਮ. ਅਤੇ ਲਿਬਰਲ ਲੀਡਰ ਦੇ ਰੂਪ ਵਿਚ ਬਣੇ ਰਹਿਣਗੇ। ਲਿਬਰਲ ਪਾਰਟੀ 9 ਮਾਰਚ ਨੂੰ ਔਟਵਾ ਵਿਚ ਇੱਕ ਪ੍ਰੋਗਰਾਮ ਦੌਰਾਨ ਨਵੇਂ ਲੀਡਰ ਦੀ ਘੋਸ਼ਣਾ ਕਰੇਗੀ।