10.31C Vancouver 10.31C VancouverOct 19, 2021 12:43 AM - The Canadian Press
ਅੱਜ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਬੀ.ਸੀ. ਦੇ ਕੈਮਲੂਪਸ ਦੇ ਇਲਾਕੇ ਦੇ ਦੌਰੇ ਦੌਰਾਨ ਇਲਾਕੇ ਦੇ ਟੈਕਮਲੂਪਸ ਸੁਵੈਟਮਕ ਫਰਸਟ ਨੇਸ਼ਨ ਤਕ ਪਹੁੰਚ ਕੀਤੀ।
ਇਸ ਫਰਸਟ ਨੇਸ਼ਨ ਦੇ ਚੀਫ਼ ਅਤੇ ਮੈਂਬਰਾਂ ਤੋਂ ਕੁਝ ਹਫ਼ਤੇ ਪਹਿਲਾਂ ਮੁਆਫੀ ਮੰਗਣ ਤੋਂ ਬਾਅਦ ਹੁਣ ਟਰੂਡੋ ਵੱਲੋਂ ਇਸ ਇਲਾਕੇ ਵਿੱਚ ਪਹੁੰਚ ਕੀਤੀ ਗਈ ਹੈ।
ਟਰੂਡੋ ਨੇ ਮੁਆਫੀ ਉਸ ਵੇਲੇ ਮੰਗੀ ਸੀ ਜਦ ਫਰਸਟ ਨੇਸ਼ਨ ਨੇ 2 ਵਾਰ ਟਰੂਡੋ ਨੂੰ ਪਹਿਲੇ ਟਰੂਥ ਐਂਡ ਰੀਕੰਸੀਲੀਏਸ਼ਨ ਡੇਅ ਮੌਕੇ ਪਹੁੰਚ ਕਰਨ ਦਾ ਸੱਦਾ ਦਿੱਤਾ ਸੀ ਪਰ ਟਰੂਡੋ ਵੱਲੋਂ ਨਾ ਤਾਂ ਪਹੁੰਚ ਕੀਤੀ ਗਈ ਸੀ ਅਤੇ ਨਾ ਹੀ ਕੋਈ ਜਵਾਬ ਦਿੱਤਾ ਗਿਆ ਸੀ।
ਸੋਮਵਾਰ ਨੂੰ ਫਰਸਟ ਨੇਸ਼ਨ ਚੀਫ਼ ਰੋਜ਼ੈਨ ਕੈਸੀਮੀਰ ਨੇ ਕਿਹਾ ਕਿ ਪ੍ਰਧਾਨ ਮੰਤਰੀ ਦਾ ਅੱਜ ਦਾ ਦੌਰਾ ਬਿਟਰ-ਸਵੀਟ ਹੈ ਯਾਨੀ ਕਿ ਖੱਟਾ ਮਿੱਠਾ ਹੈ।
ਉਨ੍ਹਾਂ ਸਪਸ਼ਟ ਲਫਜਾਂ 'ਚ ਕਿਹਾ ਕਿ ਪ੍ਰਧਾਨ ਮੰਤਰੀ ਨੂੰ ਜਦ 2 ਚਿੱਠੀਆਂ ਭੇਜੀਆਂ ਗਈਆਂ ਸਨ ਅਤੇ ਇਲਾਕੇ ਦੇ ਦੌਰੇ ਦਾ ਸੱਦਾ ਦਿੱਤਾ ਗਿਆ ਸੀ ਤਾਂ ਉਸ ਵੇਲੇ ਇੱਕ ਪੱਤਰਕਾਰ ਨੇ ਉਨ੍ਹਾਂ ਨੂੰ ਦੱਸਿਆ ਸੀ ਕਿ ਪ੍ਰਧਾਨ ਮੰਤਰੀ ਤਾਂ ਛੁੱਟੀ ਮਨਾਉਣ ਟੋਫੀਨੋ ਪਹੁੰਚ ਗਏ ਹਨ।
ਉਨ੍ਹਾਂ ਕਿਹਾ ਕਿ ਇਹ ਖਬਰ ਸਿਰਫ ਉਨ੍ਹਾਂ ਦੇ ਭਾਈਚਾਰੇ ਲਈ ਹੀ ਨਹੀਂ ਬਲਕਿ ਇਸ ਦਿਨ ਦੁੱਖ ਜਾਹਿਰ ਕਰ ਰਹੇ ਸਾਰੇ ਲੋਕਾਂ ਲਈ ਅਚੰਭੇ ਭਰੀ ਸੀ।
ਟਰੂਡੋ ਨੇ ਫਿਰ ਤੋਂ ਦੋਹਰਾਈ ਮੁਆਫੀ
ਫਰਸਟ ਨੇਸ਼ਨ ਚੀਫ਼ ਰੋਜ਼ੈਨ ਕਸੀਮੀਰ ਦੀਆਂ ਟਿੱਪਣੀਆਂ ਤੋਂ ਬਾਅਦ ਅੱਜ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਟੈਕਮਲੂਪਸ ਸੁਵੈਟਮਕ ਫਰਸਟ ਨੇਸ਼ਨ ਦੇ ਫੇਰੀ ਦੌਰਾਨ ਕਿਹਾ ਕਿ 30 ਸਿਤੰਬਰ ਨੂੰ ਯਾਤਰਾ ਦੀ ਉਨ੍ਹਾਂ ਦੀ ਚਾਇਸ ਲਈ ਉਹ ਮੁਆਫੀ ਮੰਗ ਰਹੇ ਹਨ।
ਉਨ੍ਹਾਂ ਕਿਹਾ ਕਿ ਪਹਿਲੇ ਟਰੂਥ ਅਤੇ ਰੀਕੰਸੀਲੀਏਸ਼ਨ ਡੇਅ ਦੇ ਮੌਕੇ ਉਨ੍ਹਾਂ ਦੀ ਫਰਸਟ ਨੇਸ਼ਨ 'ਚ ਹਾਜਰੀ ਇਸ ਦਿਨ ਦਾ ਅਹਿਮੀਅਤ ਸੰਬੰਧੀ ਚੰਗਾ ਸੁਨੇਹਾ ਦੇ ਸਕਦੀ ਸੀ।
ਉਨ੍ਹਾਂ ਕਿਹਾ ਕਿ ਜਿਸ ਦਿਨ ਪੀੜਤਾਂ ਅਤੇ ਸਰਵਾਈਵਰਸ ਦੀ ਗੱਲ ਹੋਣੀ ਚਾਹੀਦੀ ਸੀ ਉਸ ਦਿਨ ਉਨ੍ਹਾਂ ਦੀ ਆਪਣੀ ਗੱਲ ਹੋ ਰਹੀ ਸੀ ਜੋ ਕਿ ਮੰਦਭਾਗਾ ਸੀ।
ਟਰੂਡੋ ਨੇ ਕਿਹਾ ਕਿ ਇਸ ਦਾ ਜਿੰਮੇਵਾਰ ਕੋਈ ਹੋਰ ਨਹੀਂ ਬਲਕਿ ਉਹ ਖੁਦ ਹਨ।
ਉਨ੍ਹਾਂ ਇਹ ਵੀ ਕਿਹਾ ਕਿ ਅੱਜ ਸਵੇਰੇ ਫਰਸਟ ਨੇਸ਼ਨ ਪਹੁੰਚਣ ਤੋਂ ਬਾਅਦ ਉਨ੍ਹਾਂ ਦਾ ਸਵਾਗਤ ਕੀਤਾ ਗਿਆ ਪਰ ਉਨ੍ਹਾਂ ਉਸੇ ਮੌਕੇ ਚੀਫ਼ ਕੈਸੀਮੀਰ ਅਤੇ ਫਰਸਟ ਨੇਸ਼ਨ ਮੈਂਬਰਾਂ ਤੋਂ ਮੁਆਫੀ ਵੀ ਮੰਗੀ ਸੀ।
