11.25C Vancouver 11.25C VancouverApr 8, 2025 5:57 PM - Connect Newsroom
ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੇ ਲਿਬਰਲ ਪਾਰਟੀ ਦੇ ਲੀਡਰ ਮਾਰਕ ਕਾਰਨੀ 'ਤੇ ਕੈਨੇਡੀਅਨ ਟੈਕਸ ਤੋਂ ਬਚਣ ਲਈ ਆਪਣੀ ਕੰਪਨੀ ਦਾ ਪੈਸਾ ਬਰਮੂਡਾ ਵਿਚ ਲੁਕਾਉਣ ਦਾ ਦੋਸ਼ ਲਗਾਉਂਦੇ ਹੋਏ ਉਨ੍ਹਾਂ ਦੀ ਕੰਜ਼ਰਵੇਟਿਵ ਸਰਕਾਰ ਬਣਨ 'ਤੇ ਆਫਸ਼ੋਰ ਟੈਕਸ ਹੈਵਨ ਦੀ ਵਰਤੋਂ 'ਤੇ ਸ਼ਿਕੰਜਾ ਕੱਸਣ ਅਤੇ ਹਰ ਸਾਲ $1 ਬਿਲੀਅਨ ਤੱਕ ਦੇ ਰੈਵੇਨਿਊ ਨੁਕਸਾਨ ਦੀ ਵਸੂਲੀ ਕਰਨ ਦਾ ਵਾਅਦਾ ਕੀਤਾ ਹੈ।
ਪੌਲੀਐਵ ਨੇ ਕਿਹਾ ਕਿ ਟੈਕਸ ਹੈਵਨ ਤੋਂ ਵਸੂਲੀ ਗਈ ਰਕਮ ਦੀ ਵਰਤੋਂ $14- ਬਿਲੀਅਨ ਦੀ ਇਨਕਮ ਟੈਕਸ ਕਟੌਤੀ ਦੀ ਭਰਪਾਈ ਲਈ ਕੀਤੀ ਜਾਵੇਗੀ। ਕੰਜ਼ਰਵੇਟਿਵ ਲੀਡਰ ਨੇ ਕਿਹਾ ਕਿ ਉਹ ਮਾਹਰਾਂ ਦੀ ਇੱਕ ਟੈਕਸ ਟਾਸਕ ਫੋਰਸ ਦਾ ਗਠਨ ਕਰਨਗੇ, ਜੋ ਕੈਨੇਡਾ ਦੇ ਟੈਕਸ ਕਾਨੂੰਨ ਦੀ ਰਿਵਿਊ ਕਰੇਗੀ ਅਤੇ ਛੋਟੇ ਕਾਰੋਬਾਰਾਂ ਲਈ ਨਿਯਮਾਂ ਨੂੰ ਸਰਲ ਤੇ ਆਸਾਨ ਬਣਾਉਣ ਲਈ ਸਿਫਾਰਸ਼ਾਂ ਵੀ ਦੇਵੇਗੀ।
ਪੌਲੀਐਵ ਨੇ ਕਿਹਾ ਕਿ ਉਹ ਟਾਸਕ ਫੋਰਸ ਨੂੰ ਸਭ ਤੋਂ ਪਹਿਲਾਂ ਉਨ੍ਹਾਂ ਖਾਮੀਆਂ ਨੂੰ ਦੂਰ ਕਰਨ ਦੇ ਤਰੀਕੇ ਲੱਭਣ ਦਾ ਨਿਰਦੇਸ਼ ਦੇਣਗੇ ਜੋ ਕੰਪਨੀਆਂ ਨੂੰ ਟੈਕਸ ਹੈਵਨ ਵਿਚ ਆਪਣਾ ਪੈਸਾ ਰੱਖਣ ਅਤੇ ਕੈਨੇਡਾ ਵਿਚ ਟੈਕਸ ਦਾ ਭੁਗਤਾਨ ਕਰਨ ਤੋਂ ਬਚਣ ਦੀ ਇਜਾਜ਼ਤ ਦਿੰਦੀਆਂ ਹਨ।
