ਪੌਲੀਐਵ ਨੇ ਆਰ.ਸੀ.ਐਮ.ਪੀ.'ਤੇ ਟਰੂਡੋ-ਯੁੱਗ ਦੇ ਸਕੈਮ 'ਤੇ ਪਰਦਾ ਪਾਉਣ ਦਾ ਲਗਾਇਆ ਦੋਸ਼

ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੇ ਆਰ.ਸੀ.ਐਮ.ਪੀ.'ਤੇ ਸਾਬਕਾ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੇ ਸਾਸ਼ਨ ਨਾਲ ਜੁੜੇ ਘੁਟਾਲਿਆਂ 'ਤੇ ਤਤਕਾਲੀ ਸਰਕਾਰ ਦੇ ਦਬਾਅ ਵਿਚ ਪਰਦਾ ਪਾਉਣ ਦਾ ਇਲਜ਼ਾਮ ਲਗਾਇਆ ਹੈ।

ਪੌਲੀਐਵ ਨੇ ਕਿਹਾ ਕਿ ਜੇ ਨੈਸ਼ਨਲ ਪੁਲਿਸ ਫੋਰਸ ਨੇ ਸੁਤੰਤਰ ਰੂਪ ਤੋਂ ਆਪਣਾ ਕੰਮ ਸਹੀ ਢੰਗ ਨਾਲ ਕੀਤਾ ਹੁੰਦਾ ਤਾਂ ਟਰੂਡੋ ਨੂੰ ਕਿਊਬੈਕ-ਆਧਾਰਿਤ ਇੰਜੀਨੀਅਰਿੰਗ ਫਰਮ SNC-Lavalin ਨਾਲ ਜੁੜੇ ਮਾਮਲੇ ਅਤੇ 2016 ਵਿਚ ਆਗਾ ਖਾਨ ਦੀ ਫ੍ਰੀ ਛੁੱਟੀਆਂ ਨਾਲ ਸਬੰਧਤ ਸਕੈਂਡਲ ਦੋਵਾਂ ਲਈ ਕ੍ਰਿਮੀਨਲ ਚਾਰਜ ਦਾ ਸਾਹਮਣਾ ਕਰਨਾ ਪੈਂਦਾ।

ਆਰ.ਸੀ.ਐਮ.ਪੀ.ਕਮਿਸ਼ਨਰ ਮਾਈਕ ਡੂਹੇਮ ਨੇ ਪੌਲੀਐਵ ਦੇ ਇਲਜ਼ਾਮਾਂ ਦਾ ਖੰਡਨ ਕਰਦੇ ਹੋਏ ਕਿਹਾ ਕਿ ਮੈਂ ਕਿਸੇ ਵੀ ਸਿਆਸੀ ਵਿਅਕਤੀ ਦੇ ਦਬਾਅ ਵਿਚ ਕੰਮ ਨਹੀਂ ਕਰਦਾ। ਆਰ.ਸੀ.ਐਮ.ਪੀ. ਕਮਿਸ਼ਨਰ ਨੇ ਪੌਲੀਐਵ ਨੂੰ ਇਸ ਮੁੱਦੇ 'ਤੇ ਗੱਲਬਾਤ ਕਰਨ ਵਾਸਤੇ ਮਿਲਣ ਲਈ ਸੱਦਾ ਵੀ ਦਿੱਤਾ।

ਉਥੇ ਹੀ, ਪਬਲਿਕ ਸੇਫਟੀ ਮਿਨਿਸਟਰ ਗੈਰੀ ਆਨੰਦਸੰਗਰੀ ਨੇ ਵਿਰੋਧੀ ਧਿਰ ਦੇ ਲੀਡਰ ਦੀਆਂ ਟਿੱਪਣੀਆਂ ਨੂੰ ਬੇਹੱਦ ਗੈਰ-ਜ਼ਿੰਮੇਵਾਰਾਨਾ ਦੱਸਿਆ ਅਤੇ ਕਿਹਾ ਕਿ ਇਹ ਕੈਨੇਡਾ ਦੀਆਂ ਸੰਸਥਾਵਾਂ ਵਿਚ ਲੋਕਾਂ ਦੇ ਵਿਸ਼ਵਾਸ ਨੂੰ ਕਮਜ਼ੋਰ ਕਰ ਸਕਦੀਆਂ ਹਨ।ਆਨੰਦਸੰਗਰੀ ਨੇ ਕਿਹਾ ਕਿ ਆਰ.ਸੀ.ਐਮ.ਪੀ. ਸੁਤੰਤਰ ਰੂਪ ਤੋਂ ਕੰਮ ਕਰਦੀ ਹੈ ਅਤੇ ਇਸ ਵਿਚ ਕੋਈ ਰਾਜਨੀਤੀ ਦਖਲਅੰਦਾਜ਼ੀ ਨਹੀਂ ਹੈ।