ਪੌਲੀਐਵ ਨੇ ਟੌਰੋਂਟੋ 'ਚ ਭਾਸ਼ਣ ਦੌਰਾਨ ਕਾਰਨੀ ਦੀ ਆਰਥਿਕ ਕਾਰਗੁਜ਼ਾਰੀ ’ਤੇ ਸਾਧਿਆ ਨਿਸ਼ਾਨਾ

ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੇ ਅੱਜ ਟੌਰੋਂਟੋ ਵਿਖੇ ਕਾਰੋਬਾਰੀਆਂ ਨੂੰ ਸੰਬੋਧਨ ਕਰਦਿਆਂ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੂੰ ਸੱਤਾ ਵਿਚ ਇੱਕ ਸਾਲ ਤੋਂ ਵੀ ਵੱਧ ਸਮਾਂ ਹੋਣ ਦੇ ਬਾਵਜੂਦ ਆਪਣੇ ਆਰਥਿਕ ਵਾਅਦਿਆਂ ਨੂੰ ਪੂਰਾ ਕਰਨ ਵਿਚ ਨਾਕਾਮ ਰਹਿਣ ਦੇ ਇਲਜ਼ਾਮ ਗਏ।

ਪੌਲੀਐਵ ਨੇ ਕਿਹਾ ਕਿ ਕਾਰਨੀ ਸਰਕਾਰ ਪੂਰੀ ਤਰ੍ਹਾਂ ਫੇਲ੍ਹ ਰਹੀ ਹੈ, ਜਿਸ ਕਾਰਨ ਦੇਸ਼ ਵਿਚ ਕਾਰੋਬਾਰੀ ਸੋਕੇ ਵਰਗੀ ਸਥਿਤੀ ਹੈ, ਜਿੱਥੇ ਨਵੇਂ ਕਾਰੋਬਾਰ ਖੁੱਲ੍ਹਣ ਦੀ ਬਜਾਏ ਪੁਰਾਣੇ ਬੰਦ ਹੋ ਰਹੇ ਹਨ। ਉਹਨਾਂ ਕਿਹਾ ਕਿ ਕਾਰਨੀ ਨੂੰ ਸੱਤਾ ਸੰਭਾਲਿਆਂ ਇੱਕ ਸਾਲ ਬੀਤ ਚੁੱਕਾ ਹੈ ਪਰ ਗ੍ਰੋਸਰੀ ਹੁਣ ਤੱਕ ਕਿਫਾਇਤੀ ਨਹੀਂ ਹੈ, ਨਾ ਪਾਈਪਲਾਈਨ ਬਣੀ ਅਤੇ ਨਾ ਹੀ ਅਮਰੀਕਾ ਨਾਲ ਡੀਲ ਹੋ ਸਕੀ, ਇਥੋਂ ਤੱਕ ਕਿ ਬੀਤੇ ਪੰਜ ਮਹੀਨਿਆਂ ਤੋਂ ਦੋਵਾਂ ਦੇਸ਼ਾਂ ਵਿਚਕਾਰ ਕੋਈ ਗੱਲਬਾਤ ਹੀ ਨਹੀਂ ਹੋਈ।

ਇਸ ਦੇ ਨਾਲ ਹੀ ਉਹਨਾਂ ਟਰੰਪ ਦੇ ਟੈਰਿਫਸ ਦੇ ਮੁੱਦੇ 'ਤੇ ਕਾਰਨੀ ਦੇ ਬਿਆਨਾਂ ਨੂੰ ਨਕਾਰਾਤਮਕ ਦੱਸਦਿਆਂ ਕਿਹਾ ਕਿ ਹੋ ਸਕਦਾ ਹੈ ਕਿ ਕੈਨੇਡਾ ਭਵਿੱਖ ਵਿਚ ਅਮਰੀਕਾ ਨੂੰ ਘੱਟ ਸਾਮਾਨ ਵੇਚੇ ਪਰ ਇਹ ਕਹਿਣਾ ਗਲਤ ਹੈ ਕਿ ਦੇਸ਼ ਦੇ ਸਭ ਤੋਂ ਵੱਡੇ ਵਪਾਰਕ ਭਾਈਵਾਲ ਨਾਲ ਹੁਣ ਰਿਸ਼ਤੇ ਸਥਾਈ ਨਹੀਂ ਹਨ।