ਪੀਅਰ ਪੌਲੀਐਵ ਨੇ ਜ਼ਿਮਨੀ ਚੋਣਾਂ ਦੇ ਨਤੀਜੇ ਮਗਰੋਂ ਕਾਰਨੀ ਸਰਕਾਰ 'ਤੇ ਬੋਲਿਆ ਤਿੱਖਾ ਹਮਲਾ

ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੇ ਜ਼ਿਮਨੀ ਚੋਣਾਂ ਦੇ ਨਤੀਜੇ ਮਗਰੋਂ ਕਾਰਨੀ ਸਰਕਾਰ 'ਤੇ ਤਿੱਖਾ ਹਮਲਾ ਬੋਲਿਆ, ਉਨ੍ਹਾਂ ਕਿ ਲਿਬਰਲਜ਼ ਨੂੰ ਮਿਲਿਆ ਬਹੁਮਤ ਨਾ ਤਾਂ ਆਮ ਚੋਣਾਂ ਅਤੇ ਨਾ ਹੀ ਜ਼ਿਮਨੀ ਚੋਣਾਂ ਜ਼ਰੀਏ ਹਾਸਲ ਹੋਇਆ ਹੈ ਬਲਕਿ ਇਹ ਬੈਕਰੂਮ ਡੀਲਾਂ ਰਾਹੀਂ ਸ਼ਾਮਲ ਕੀਤੇ ਗਏ ਉਨ੍ਹਾਂ ਐਮ.ਪੀ. ਦਾ ਨਤੀਜਾ ਹੈ, ਜਿਹਨਾਂ ਨੇ ਆਪਣੀ ਰਾਈਡਿੰਗ ਦੇ ਵੋਟਰਾਂ ਨਾਲ ਵਿਸ਼ਵਾਸਘਾਤ ਕੀਤਾ ਹੈ।

ਪ੍ਰਧਾਨ ਮੰਤਰੀ ਨੂੰ ਨਿਸ਼ਾਨੇ ’ਤੇ ਲੈਂਦਿਆਂ ਉਨ੍ਹਾਂ ਕਿਹਾ ਕਿ ਜਦੋਂ ਕਾਰਨੀ ਬਹੁਮਤ ਲਈ ਜੋੜ-ਤੋੜ ਦੀ ਸਿਆਸਤ ਵਿਚ ਰੁਝੇ ਹੋਏ ਸਨ, ਉਸ ਵੇਲੇ ਦੇਸ਼ ਦਾ ਘਾਟਾ ਦੁੱਗਣਾ ਹੋ ਗਿਆ, ਅੱਜ ਹਾਲਾਤ ਇਹ ਹਨ ਕਿ ਜੀ 7 ਦੇਸ਼ਾਂ ਵਿਚੋਂ ਸਭ ਤੋਂ ਮਹਿੰਗੀ ਗਰੋਸਰੀ ਅਤੇ ਮਹਿੰਗੇ ਘਰ ਕੈਨੇਡਾ ਵਿਚ ਹਨ।

ਉਨ੍ਹਾਂ ਕਿਹਾ ਕਿ ਲਿਬਰਲ ਚਾਹੁੰਦੇ ਹਨ ਕਿ ਉਨ੍ਹਾਂ ਨੂੰ ਕੋਈ ਕਟਿਹਰੇ ਵਿਚ ਨਾ ਖੜ੍ਹਾ ਕਰੇ ਪਰ ਉਹ ਅਜਿਹਾ ਹੋਣ ਨਹੀਂ ਦੇਣਗੇ। ਪੌਲੀਐਵ ਨੇ ਕਿਹਾ ਕਿ ਕੰਜ਼ਰਵੇਟਿਵ ਪਾਰਟੀ ਲੋਕਾਂ ਦੇ ਹੱਕ ਲਈ ਲੜਾਈ ਜਾਰੀ ਰੱਖੇਗੀ। ਇਸ ਦੇ ਨਾਲ ਹੀ ਉਹਨਾਂ ਸਾਫ ਕੀਤਾ ਕਿ ਅਗਲੀਆਂ ਫੈਡਰਲ ਚੋਣਾਂ ਵਿਚ ਵੀ ਉਹ ਪਾਰਟੀ ਨੂੰ ਲੀਡ ਕਰਨਗੇ।