19.54C Vancouver 19.54C VancouverAug 20, 2026 2:07 PM - Connect Newsroom - Ramandeep Kaur with files from The Canadian Press
ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੇ ਈਰਾਨ ਦੇ ਦੇਸ਼-ਨਿਕਾਲਾ ਦਿੱਤੇ ਗਏ ਸਾਬਕਾ ਕ੍ਰਾਊਨ ਪ੍ਰਿੰਸ Reza Pahlavi ਨਾਲ ਅੱਜ ਇੱਕ ਵੀਡੀਓ ਕਾਨਫਰੰਸ ਜ਼ਰੀਏ ਗੱਲਬਾਤ ਕੀਤੀ ਅਤੇ ਉਨ੍ਹਾਂ ਨੂੰ ਕੈਨੇਡਾ ਆਉਣ ਦਾ ਸੱਦਾ ਦਿੱਤਾ ਹੈ।
ਗੱਲਬਾਤ ਦੇ ਵੇਰਵੇ ਸਾਂਝੇ ਕਰਦਿਆਂ ਪੌਲੀਐਵ ਨੇ ਦੱਸਿਆ ਕਿ ਉਨ੍ਹਾਂ ਨੇ ਸਾਬਕਾ ਕ੍ਰਾਊਨ ਪ੍ਰਿੰਸ ਨਾਲ ਤੇਹਰਾਨ ਦੇ ਮੌਜੂਦਾ ਤਾਨਾਸ਼ਾਹੀ ਸ਼ਾਸਨ ਦੇ ਮੁੱਦੇ ਅਤੇ ਫ੍ਰੀ ਤੇ ਲੋਕਤੰਤਰੀ ਈਰਾਨ ਮਿਸ਼ਨ 'ਤੇ ਚਰਚਾ ਕੀਤੀ। ਇਸ ਦੌਰਾਨ ਪੌਲੀਐਵ ਨੇ ਵੈਨਕੂਵਰ ਦੇ ਈਰਾਨੀ ਭਾਈਚਾਰੇ ਵੱਲੋਂ ਉਨ੍ਹਾਂ ਨੂੰ Pahlavi ਨਾਲ ਗੱਲਬਾਤ ਲਈ ਮਿਲੇ ਭਰਵੇਂ ਸਮਰਥਨ ਦਾ ਵੀ ਜ਼ਿਕਰ ਕੀਤਾ।
ਪੌਲੀਐਵ ਪਿਛਲੇ ਹਫ਼ਤੇ ਉੱਤਰੀ ਵੈਨਕੂਵਰ-ਕੈਪੀਲਾਨੋ ਹਲਕੇ ਵਿਚ ਸਨ, ਜਿਥੇ ਸੰਸਦੀ ਸੀਟ ਲਈ 31 ਅਗਸਤ ਨੂੰ ਜ਼ਿਮਨੀ ਚੋਣ ਵਾਲੀ ਹੈ। ਸ਼ਨੀਵਾਰ ਨੂੰ ਇੱਥੇ ਕੰਜ਼ਰਵੇਟਿਵ ਉਮੀਦਵਾਰ ਨੇ ਈਰਾਨੀ ਭਾਈਚਾਰੇ ਨਾਲ ਇੱਕ ਬੈਠਕ ਆਯੋਜਿਤ ਕੀਤੀ ਸੀ, ਜਿਸ ਵਿਚ ਪੌਲੀਐਵ ਸ਼ਾਮਲ ਹੋਏ ਸਨ।
ਦੱਸਣਯੋਗ ਹੈ ਕਿ 65 ਸਾਲਾ Reza Pahlavi ਜਿਨ੍ਹਾਂ ਦੇ ਪਿਤਾ 1979 ਦੀ ਇਸਲਾਮਿਕ ਕ੍ਰਾਂਤੀ ਤੱਕ ਈਰਾਨ ਦੇ ਸ਼ਾਹ ਸਨ, ਵਰਤਮਾਨ ਵਿਚ ਵਾਸ਼ਿੰਗਟਨ ਵਿਚ ਰਹਿ ਰਹੇ ਹਨ ਅਤੇ ਖੁਦ ਨੂੰ ਈਰਾਨ ਵਿਚ ਲੋਕਤੰਤਰੀ ਤਬਦੀਲੀ ਲਈ ਸਭ ਤੋਂ ਯੋਗ ਆਗੂ ਵਜੋਂ ਪੇਸ਼ ਕਰ ਰਹੇ ਹਨ।
