14.79C Vancouver 14.79C VancouverOct 28, 2024 2:44 PM - The Canadian Press
ਕੰਜ਼ਰਵੇਟਿਵ ਪਾਰਟੀ ਦੇ ਲੀਡਰ ਪੀਅਰ ਪੋਲੀਵਰੇ ਨੇ ਐਲਾਨ ਕੀਤਾ ਹੈ ਕਿ ਜੇ ਉਨ੍ਹਾਂ ਦੀ ਪਾਰਟੀ ਅਗਲਾ ਇਲੈਕਸ਼ਨ ਜਿੱਤਦੀ ਹੈ ਤਾਂ ਉਹ $1 ਮਿਲੀਅਨ ਤੋਂ ਘੱਟ ਕੀਮਤ ਵਾਲੇ ਘਰਾਂ ਲਈ ਜੀ.ਐੱਸ.ਟੀ. ਸਮਾਪਤ ਕਰ ਦੇਣਗੇ। ਉਨ੍ਹਾਂ ਇਹ ਘੋਸ਼ਣਾ ਅੱਜ ਸਵੇਰੇ ਔਟਵਾ ਵਿਚ ਕੀਤੀ। ਪੋਲੀਵਰੇ ਮੁਤਾਬਕ, ਇਸ ਕਦਮ ਨਾਲ ਕੈਨੇਡੀਅਨਾਂ ਨੂੰ $800,000 ਦੇ ਮਕਾਨ ’ਤੇ $40,000 ਦੀ ਬਚਤ ਹੋਵੇਗੀ ਅਤੇ ਇਸ ਨਾਲ ਕੈਨੇਡਾ ਵਿਚ ਹਰ ਸਾਲ ਵਧੀਕ 30,000 ਘਰਾਂ ਦੇ ਨਿਰਮਾਣ ਨੂੰ ਵੀ ਬੜ੍ਹਾਵਾ ਮਿਲੇਗਾ।
ਕੰਜ਼ਰਵੇਟਿਵ ਲੀਡਰ ਨੇ ਇਹ ਵੀ ਕਿਹਾ ਕਿ ਉਹ ਇਸ ਟੈਕਸ ਕੱਟ ਦੀ ਭਰਪਾਈ ਲਿਬਰਲ ਸਰਕਾਰ ਦੀ ਹਾਊਸਿੰਗ ਪਾਲਿਸੀ ਨੂੰ ਸਮਾਪਤ ਕਰਕੇ ਕਰਨਗੇ। ਉਥੇ ਹੀ, ਪੱਤਰਕਾਰਾਂ ਨਾਲ ਗੱਲਬਾਤ ਦੌਰਾਨ ਉਨ੍ਹਾਂ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ’ਤੇ ਵੀ ਨਿਸ਼ਾਨਾ ਸਾਧਿਆ, ਪੋਲੀਵਰੇ ਨੇ ਕਿਹਾ ਕਿ ਟਰੂਡੋ ਨੂੰ ਜਦੋਂ ਆਪਣੀ ਸਿਆਸਤ ਲਈ ਠੀਕ ਲੱਗਦਾ ਹੈ ਤਾਂ ਵਿਦੇਸ਼ੀ ਦਖ਼ਲ ਦਾ ਮੁੱਦਾ ਘੜੀਸ ਲੈਂਦੇ ਹਨ।
ਦਰਅਸਲ, ਟਰੂਡੋ ਨੇ ਕਿਹਾ ਸੀ ਕਿ ਉਨ੍ਹਾਂ ਕੋਲ ਕਈ ਕੰਜ਼ਰਵੇਟਿਵ ਐੱਮ.ਪੀ. ਦੇ ਨਾਮ ਹਨ ਜੋ ਵਿਦੇਸ਼ੀ ਦਖ਼ਲ ਵਿਚ ਸ਼ਾਮਲ ਹਨ। ਪੋਲੀਵਰੇ ਨੇ ਕਿਹਾ ਕਿ ਟਰੂਡੋ ਸਿਰਫ ਸਿਆਸਤ ਕਰ ਰਹੇ ਹਨ, ਜੇ ਉਨ੍ਹਾਂ ਕੋਲ ਨਾਮ ਹਨ ਤਾਂ ਜਨਤਕ ਕਰ ਦੇਣ।
