ਪੀਅਰ ਪੌਲੀਐਵ ਨੇ ਤਸਕਰੀ ਦੇ ਅਪਰਾਧੀਆਂ ਲਈ ਸਖ਼ਤ ਸਜ਼ਾਵਾਂ ਦੇਣ ਦਾ ਕੀਤਾ ਵਾਅਦਾ

ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੇ ਉਨ੍ਹਾਂ ਦੀ ਸਰਕਾਰ ਬਣਨ 'ਤੇ ਮਨੁੱਖੀ ਤਸਕਰੀ, ਗੰਨ ਸਮੱਗਲਿੰਗ ਅਤੇ ਫੈਂਟਾਨਾਇਲ ਦੀ ਤਸਕਰੀ ਦੇ ਮਾਮਲੇ ਵਿਚ ਮੁਲਜ਼ਮਾਂ ਲਈ ਉਮਰ ਕੈਦ ਦੀ ਸਜ਼ਾ ਦਾ ਕਾਨੂੰਨ ਬਣਾਉਣ ਦੀ ਘੋਸ਼ਣਾ ਕੀਤੀ ਹੈ। ਉਨ੍ਹਾਂ ਰਿਪੀਟ ਅਪਰਾਧੀਆਂ ਲਈ ਮੌਜੂਦਾ ਕਾਨੂੰਨ ਸਖ਼ਤ ਨਾ ਹੋਣ ਦਾ ਹਵਾਲਾ ਦਿੰਦੇ ਹੋਏ ਕੁਝ ਜ਼ਮਾਨਤ ਨਿਯਮਾਂ ਵਿਚ ਸੁਧਾਰ ਕਰਨ ਦਾ ਵੀ ਵਾਅਦਾ ਕੀਤਾ।

ਪੌਲੀਐਵ ਨੇ ਕਿਹਾ ਕਿ ਮਨੁੱਖੀ ਤਸਕਰੀ ਵਿਚ ਪੰਜ ਜਾਂ ਇਸ ਤੋਂ ਵੱਧ ਦੋਸ਼ਾਂ ਵਿਚ ਦੋਸ਼ੀ ਪਾਏ ਜਾਣ ਵਾਲੇ ਮੁਲਜ਼ਮਾਂ ਅਤੇ 10 ਤੇ ਇਸ ਤੋਂ ਵੱਧ ਗੈਰ-ਕਾਨੂੰਨੀ ਹਥਿਆਰਾਂ ਦੀ ਤਸਕਰੀ ਵਿਚ ਦੋਸ਼ੀ ਪਾਏ ਜਾਣ ਵਾਲੇ ਲੋਕਾਂ ਨੂੰ ਉਮਰ ਕੈਦ ਦੀ ਸਜ਼ਾ ਦਿੱਤੀ ਜਾਵੇਗੀ। ਉਨ੍ਹਾਂ ਕਿਹਾ ਕਿ ਇਹੀ ਸਜ਼ਾ ਵੱਡੇ ਪੱਧਰ 'ਤੇ ਫੈਂਟਾਨਾਇਲ ਤਸਕਰੀ 'ਤੇ ਲਾਗੂ ਹੋਵੇਗੀ।

ਕੰਜ਼ਰਵੇਟਿਵ ਲੀਡਰ ਨੇ ਕਿਹਾ ਕਿ ਉਹ ਇਹ ਯਕੀਨੀ ਬਣਾਉਣਾ ਚਾਹੁੰਦੇ ਹਨ ਕਿ ਇਹ ਰਾਖਸ਼ ਹਮੇਸ਼ਾ ਲਈ ਜੇਲ੍ਹ ਵਿਚ ਸੜਨ। ਗੌਰਤਲਬ ਹੈ ਕਿ ਪੌਲੀਐਵ ਅੱਜ ਨਾਨਾਇਮੋ ਵਿਚ ਹਨ, ਬੀਤੇ ਕੱਲ੍ਹ ਉਨ੍ਹਾਂ ਸਰੀ ਦੇ ਪੋਰਟ ਕੈਲਸ ਨੇੜੇ ਇੱਕ ਉਦਯੋਗਿਕ ਇਮਾਰਤ ਵਿਚ ਇੱਥੇ ਆਪਣੀ ਪਹਿਲੀ ਰੈਲੀ ਕੀਤੀ ਸੀ, ਪਾਰਟੀ ਦਾ ਦਾਅਵਾ ਹੈ ਕਿ ਇਸ ਵਿਚ 5,000 ਲੋਕ ਸ਼ਾਮਲ ਹੋਏ ਸਨ।