ਪੌਲੀਐਵ ਨੇ ਕੰਜ਼ਰਵੇਟਿਵ ਸਰਕਾਰ ਬਣਨ 'ਤੇ ਇਮੀਗ੍ਰੇਸ਼ਨ ਪਾਲਿਸੀ ਵਿਚ ਵੱਡੇ ਬਦਲਾਅ ਦਾ ਦਿੱਤਾ ਸੰਕੇਤ

ਕੈਨੇਡਾ ਦੀ ਮੁੱਖ ਵਿਰੋਧੀ ਧਿਰ ਦੇ ਲੀਡਰ ਪੀਅਰ ਪੌਲੀਐਵ ਨੇ ਕੰਜ਼ਰਵੇਟਿਵ ਸਰਕਾਰ ਬਣਨ 'ਤੇ ਇਮੀਗ੍ਰੇਸ਼ਨ ਪਾਲਿਸੀ ਵਿਚ ਵੱਡੇ ਬਦਲਾਅ ਦਾ ਸੰਕੇਤ ਦਿੱਤਾ ਹੈ। ਪੌਲੀਐਵ ਨੇ ਕਿਹਾ ਕਿ ਉਹ ਅਜਿਹੀ ਪਾਲਿਸੀ ਲਾਗੂ ਕਰਨਗੇ, ਜਿਸ ਤਹਿਤ ਕੈਨੇਡਾ ਓਨੇ ਹੀ ਲੋਕਾਂ ਨੂੰ ਸੱਦਾ ਦੇਵੇਗਾ ਜਿੰਨਿਆਂ ਦੀ ਲੋੜ ਹੈ ਅਤੇ ਜਿੰਨਿਆਂ ਨੂੰ ਇੱਥੇ ਰੱਖਿਆ ਜਾ ਸਕਦਾ ਹੈ।

ਉਨ੍ਹਾਂ ਕਿਹਾ ਕਿ ਇਹ ਦੁਨੀਆ ਦਾ ਸਭ ਤੋਂ ਬਿਹਤਰ ਇਮੀਗ੍ਰੇਸ਼ਨ ਸਿਸਟਮ ਹੈ ਅਤੇ ਅਸੀਂ ਵਾਪਸ ਇਸ ਨੂੰ ਲਾਗੂ ਕਰਾਂਗੇ।

ਪੌਲੀਐਵ ਦਾ ਕਹਿਣਾ ਸੀ ਕਿ ਲਿਬਰਲ ਨੇ ਇਮੀਗ੍ਰੇਸ਼ਨ ਨੂੰ ਪੂਰੀ ਤਰ੍ਹਾਂ ਤਹਿਸ ਨਹਿਸ ਕਰਕੇ ਕੈਨੇਡਾ ਦੀ ਆਬਾਦੀ ਨੂੰ ਇਸ ਕਦਰ ਤੱਕ ਵਧਾ ਦਿੱਤਾ ਕਿ ਬਹੁਤ ਸਾਰੇ ਲੋਕਾਂ ਕੋਲ ਘਰ ਅਤੇ ਕੰਮ ਨਹੀਂ ਅਤੇ ਇਸ ਨਾਲ ਸਾਡੇ ਹੈਲਥ ਕੇਅਰ ਸਿਸਟਮ 'ਤੇ ਵੀ ਬੇਲੋੜਾ ਬੋਝ ਪਿਆ।

ਉਨ੍ਹਾਂ ਇਲਜ਼ਾਮ ਲਗਾਇਆ ਕਿ ਇਸ ਪਿੱਛੇ ਮਾਰਕ ਕਾਰਨੀ ਤੇ ਹੋਰ ਲਿਬਰਲਸ ਦਾ ਕਾਰਪੋਰੇਟ ਲਾਲਚ ਸੀ ਕਿਉਂਕਿ ਇਸ ਨਾਲ ਮਜ਼ਦੂਰੀ ਵਿਚ ਕਮੀ ਆਈ, ਜਿਸ ਦਾ ਉਨ੍ਹਾਂ ਨੂੰ ਫਾਇਦਾ ਸੀ ਤੇ ਦੂਜੇ ਪਾਸੇ, ਇਸ ਸਿਸਟਮ ਨੇ ਕੈਨੇਡੀਅਨ ਕਾਮੇ ਦੀਆਂ ਜੌਬਸ ਖੋਹੀਆਂ। ਪੌਲੀਐਵ ਨੇ ਕਿਹਾ ਕਿ ਉਹ ਸਿਸਟਮ ਬਦਲਣਗੇ।