ਪੀਅਰ ਪੌਲੀਐਵ ਨੇ ਅਮਰੀਕੀ ਰਾਸ਼ਟਰਪਤੀ ਦੇ ਲਿਬਰਲ ਪੀ.ਐਮ. ਵਾਲੇ ਬਿਆਨ ਨੂੰ ਠਹਿਰਾਇਆ ਸਹੀ

ਕੈਨੇਡਾ ਵਿਚ ਜਲਦ ਚੋਣਾਂ ਹੋਣ ਦੀਆਂ ਅਟਕਲਾਂ ਵਿਚਕਾਰ ਅਮਰੀਕੀ ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਇੱਕ ਵਾਰ ਫਿਰ ਕੈਨੇਡੀਅਨ ਰਾਜਨੀਤੀ 'ਤੇ ਟਿੱਪਣੀ ਕੀਤੀ ਹੈ, ਟਰੰਪ ਨੇ ਇੱਕ ਇੰਟਰਵਿਊ ਵਿਚ ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ 'ਤੇ ਨਿਸ਼ਾਨਾ ਸਾਧਿਆ ਅਤੇ ਇਹ ਵੀ ਕਿਹਾ ਕਿ ਮੈਨੂੰ ਲੱਗਦਾ ਹੈ ਕਿ ਕੰਜ਼ਰਵੇਟਿਵ ਦੀ ਬਜਾਏ ਲਿਬਰਲ ਨਾਲ ਡੀਲ ਕਰਨਾ ਆਸਾਨ ਹੈ। ਟਰੰਪ ਨੇ ਕਿਹਾ ਕਿ ਨਾ ਤਾਂ ਮੈਂ ਪੌਲੀਐਵ ਨੂੰ ਜਾਣਦਾ ਹਾਂ ਅਤੇ ਨਾ ਹੀ ਉਹ ਮੇਰਾ ਉਹ ਦੋਸਤ ਹੈ ਪਰ ਉਸ ਨੇ ਨਾਕਾਰਾਤਮਕ ਗੱਲਾਂ ਕਹੀਆਂ ਹਨ, ਜਿਸ ਦੀ ਮੈਨੂੰ ਕੋਈ ਪਰਵਾਹ ਨਹੀਂ।

ਟਰੰਪ ਤੋਂ ਜਦੋਂ ਨਵੇਂ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਦੀ ਅਗਵਾਈ ਵਿਚ ਲਿਬਰਲ ਪਾਰਟੀ ਦੇ ਮੌਜੂਦਾ ਉਭਾਰ ਬਾਰੇ ਸਵਾਲ ਪੁੱਛਿਆ ਗਿਆ ਤਾਂ ਉਨ੍ਹਾਂ ਕਿਹਾ ਕਿ ਹੋ ਸਕਦਾ ਹੈ ਲਿਬਰਲ ਜਿੱਤ ਜਾਣ ਪਰ ਇਹ ਮੇਰੇ ਲਈ ਮਾਈਨੇ ਨਹੀਂ ਰੱਖਦਾ ਪਰ ਮੈਨੂੰ ਲੱਗਦਾ ਹੈ ਕਿ ਅਸਲ ਵਿਚ ਲਿਬਰਲ ਨਾਲ ਨਜਿੱਠਣਾ ਸੌਖਾ ਹੈ।

ਟਰੰਪ ਦੀ ਟਿੱਪਣੀ ਤੋਂ ਬਾਅਦ ਪੌਲੀਐਵ ਨੇ ਸੋਸ਼ਲ ਮੀਡੀਆ ਪੋਸਟ ਵਿਚ ਕਾਰਨੀ 'ਤੇ ਨਿਸ਼ਾਨਾ ਸਾਧਿਆ,ਉਨ੍ਹਾਂ ਕਿਹਾ ਕਿ ਕਾਰਨੀ ਕਮਜ਼ੋਰ ਹਨ ਅਤੇ ਟਰੰਪ ਦੀਆਂ ਮੰਗਾਂ ਅੱਗੇ ਗੋਡੇ ਟੇਕ ਦੇਣਗੇ। ਪੌਲੀਐਵ ਨੇ ਕਿਹਾ ਕਿ ਕੈਨੇਡੀਅਨ ਕਮਜ਼ੋਰ ਨੇਤਾ ਨਹੀਂ ਚਾਹੁੰਦੇ। ਉਹ ਇੱਕ ਮਜ਼ਬੂਤ ​​ਪ੍ਰਧਾਨ ਮੰਤਰੀ ਚਾਹੁੰਦੇ ਹਨ ਜੋ ਕੈਨੇਡਾ ਨੂੰ ਪਹਿਲ 'ਤੇ ਰੱਖੇ।