ਪੋਲੀਵਰੇ ਨੇ ਜਗਮੀਤ ਸਿੰਘ ਨੂੰ ਲਿਬਰਲਜ਼ ਨਾਲ ਐਨਡੀਪੀ ਸੌਦਾ ਖਤਮ ਕਰਨ ਤੇ ਪਤਝੜ 'ਚ ਚੋਣਾਂ ਕਰਾਉਣ ਦੀ ਕੀਤੀ ਮੰਗ

ਕੰਜ਼ਰਵੇਟਿਵ ਲੀਡਰ ਪੀਅਰੇ ਪੋਲੀਵਰੇ ਨੇ ਐਨ.ਡੀ.ਪੀ ਪ੍ਰਧਾਨ ਜਗਮੀਤ ਸਿੰਘ ਦੇ ਨਾਮ ਇੱਕ ਪੱਤਰ ਜਾਰੀ ਕਰਦੇ ਉਨ੍ਹਾਂ ਨੂੰ ਲਿਬਰਲ ਨਾਲ ਸਮਝੌਤਾ ਖ਼ਤਮ ਕਰਨ ਅਤੇ ਇਸ ਫਾਲ ਵਿਚ ਇਲੈਕਸ਼ਨ ਕਰਵਾਏ ਜਾਣ ਦੀ ਮੰਗ ਕੀਤੀ ਹੈ। ਜਗਮੀਤ ਸਿੰਘ ਨੂੰ ਲਿਖੇ ਪੱਤਰ ਵਿਚ ਉਨ੍ਹਾਂ ਕਿਹਾ ਕਿ ਐੱਨ.ਡੀ.ਪੀ.ਕੋਲ ਜਸਟਿਨ ਟਰੂਡੋ ਨੂੰ ਇੱਕ ਹੋਰ ਸਾਲ ਲਈ ਸੱਤਾ ਵਿਚ ਰੱਖਣ ਲਈ ਵੋਟਰਾਂ ਦਾ ਫ਼ਤਵਾ ਨਹੀਂ ਹੈ। ਇਸ ਲਈ ਸਤੰਬਰ ਵਿਚ ਹਾਊਸ ਆਫ ਕਾਮਨਜ਼ ਦੀ ਕਾਰਵਾਈ ਬਹਾਲ ਹੋਣ 'ਤੇ ਐੱਨ.ਡੀ.ਪੀ. ਨੂੰ ਸਰਕਾਰ ਖਿਲਾਫ ਅਵਿਸ਼ਵਾਸ ਮਤੇ ਦੇ ਸਮਰਥਨ ਵਿਚ ਵੋਟ ਕਰਨੀ ਚਾਹੀਦੀ ਹੈ।

ਪੋਲੀਵਰੇ ਨੇ ਆਰੋਪ ਲਾਇਆ ਕਿ ਜਗਮੀਤ ਸਿੰਘ ਦਾ ਟਰੂਡੋ ਨੂੰ ਸਮਰਥਨ ਸਿਰਫ ਆਪਣੀ ਪੈਨਸ਼ਨ ਸੁਰੱਖਿਅਤ ਕਰਨ ਲਈ ਹੈ। ਉਨ੍ਹਾਂ ਕਿਹਾ ਕਿ ਐੱਨ.ਡੀ.ਪੀ. ਨੇ ਜਦੋਂ ਟਰੂਡੋ ਨੂੰ ਸੱਤਾ ਵਿਚ ਰੱਖਣ ਲਈ ਸਮਝੌਤਾ ਕੀਤਾ ਸੀ ਤਾਂ ਕਿਹਾ ਸੀ ਕਿ ਇਹ ਗਠਜੋੜ ਲੋਕਾਂ ਦੀ ਜ਼ਿੰਦਗੀ ਨੂੰ ਵਧੇਰੇ ਕਿਫਾਇਤੀ ਬਣਾਏਗਾ ਪਰ ਜਗਮੀਤ ਸਿੰਘ ਹੁਣ ਖੁਦ ਮੰਨਦੇ ਹਨ ਕਿ ਗ੍ਰੋਸਰੀ ਤੋਂ ਲੈ ਕੇ ਲੋਕਾਂ ਦਾ ਰਹਿਣ-ਸਹਿਣ ਇੰਨਾ ਮਹਿੰਗਾ ਹੋ ਗਿਆ ਹੈ ਕਿ ਇਹ ਪਹਿਲਾਂ ਕਦੇ ਨਹੀਂ ਸੀ।

ਪੋਲੀਵਰੇ ਨੇ ਕਿਹਾ ਮੈਨੂੰ ਪਤਾ ਹੈ ਕਿ ਜਗਮੀਤ ਹਰ ਹਾਲ ਵਿਚ ਇਲੈਕਸ਼ਨ ਨੂੰ ਅਵੋਇਡ ਕਰਨਗੇ ਕਿਉਂਕਿ ਉਨ੍ਹਾਂ ਨੂੰ ਲੋਕਾਂ ਤੋਂ ਜ਼ਿਆਦਾ ਫਰਵਰੀ ਵਿਚ ਆਪਣੇ ਲਈ 2.2 ਮਿਲੀਅਨ ਡਾਲਰ ਦੀ ਸਾਲਾਨਾ ਪੈਨਸ਼ਨ ਲਈ ਕੁਆਲੀਫਾਈ ਕਰਨ ਦੀ ਫਿਕਰ ਹੈ। ਗੌਰਤਲਬ ਹੈ ਕਿ ਐੱਨ.ਡੀ.ਪੀ.ਨੇ 2022 ਵਿਚ ਲਿਬਰਲਸ ਨਾਲ ਇੱਕ ਸਮਝੌਤਾ ਕੀਤਾ ਸੀ, ਜਿਸ ਤਹਿਤ ਕੁਝ ਪ੍ਰਮੁੱਖ ਮੰਗਾਂ ਦੇ ਬਦਲੇ ਲਿਬਰਲਸ ਨੂੰ 2025 ਤੱਕ ਸੱਤਾ ਵਿਚ ਬਣਾਈ ਰੱਖਣ ਦੀ ਸਹਿਮਤੀ ਦਿੱਤੀ ਸੀ।