ਪੌਲੀਐਵ ਨੇ ਟਰੂਡੋ ਸਰਕਾਰ ਨੂੰ ਪਾਰਲੀਮੈਂਟ ਮੁੜ ਸ਼ੁਰੂ ਕਰਨ ਦੀ ਕੀਤੀ ਅਪੀਲ

ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੇ ਅਮਰੀਕਾ ਨਾਲ ਇਤਿਹਾਸਕ ਟਰੇਡ ਵਾਰ ਰੁਕਣ ਵਿਚਕਾਰ ਟਰੂਡੋ ਸਰਕਾਰ ਨੂੰ ਪਾਰਲੀਮੈਂਟ ਦੀ ਸੀਟਿੰਗ ਜਲਦ ਬਹਾਲ ਕਰਨ ਦੀ ਮੰਗ ਦੁਹਰਾਈ ਹੈ।

ਪੌਲੀਐਵ ਨੇ ਕਿਹਾ ਕਿ ਹਰ ਕੈਨੇਡੀਅਨ ਦੀ ਤਰ੍ਹਾਂ ਕੰਜ਼ਰਵੇਟਿਵ ਪਾਰਟੀ ਨੂੰ ਵੀ ਇਹ ਸੁਣ ਕੇ ਰਾਹਤ ਮਿਲੀ ਹੈ ਕਿ ਅਮਰੀਕਾ ਵਲੋਂ ਟੈਰਿਫ ’ਤੇ ਇੱਕ ਮਹੀਨੇ ਦੀ ਰੋਕ ਰਹੇਗੀ ਪਰ ਇਹ ਸਮਾਂ ਬੈਠਣ ਦਾ ਨਹੀਂ ਹੈ। ਸਾਨੂੰ ਕੈਨੇਡਾ ਦੀ ਆਰਥਿਕਤਾ ਨੂੰ ਮਜਬੂਤ ਕਰਨ ਲਈ ਤੱਤਕਾਲ ਕੰਮ ਕਰਨਾ ਹੋਵੇਗਾ ਅਤੇ ਇਹ ਯਕੀਨੀ ਬਣਾਉਣਾ ਹੋਵੇਗਾ ਕਿ ਇਹ ਟੈਰਿਫ ਕਦੇ ਨਾ ਲਗਾਏ ਜਾਣ।

ਕੰਜ਼ਰਵੇਟਿਵ ਲੀਡਰ ਨੇ ਕਿਹਾ ਕਿ ਇਸ ਲਈ ਸੰਸਦ ਦਾ ਬੈਠਣਾ ਜ਼ਰੂਰੀ ਹੈ। ਗੌਰਤਲਬ ਹੈ ਕਿ ਲਿਬਰਲ ਪਾਰਟੀ ਵਲੋਂ ਆਪਣੇ ਅਗਲੇ ਲੀਡਰ ਦੀ ਚੋਣ ਕਰਨ ਵਿਚਕਾਰ ਪਾਰਲੀਮੈਂਟ ਨੂੰ 24 ਮਾਰਚ ਤੱਕ ਲਈ ਮੁਲਤਵੀ ਕੀਤਾ ਗਿਆ ਹੈ। ਪਾਰਟੀ ਵਲੋਂ 9 ਮਾਰਚ ਨੂੰ ਆਪਣੇ ਅਗਲੇ ਲੀਡਰ ਦੀ ਘੋਸ਼ਣਾ ਕੀਤੀ ਜਾਣੀ ਹੈ, ਜੋ ਟਰੂਡੋ ਦੀ ਜਗ੍ਹਾ ਪ੍ਰਧਾਨ ਮੰਤਰੀ ਦਾ ਅਹੁਦਾ ਵੀ ਸੰਭਾਲੇਗਾ।