ਫ੍ਰੀਲੈਂਡ ਦੇ ਅਸਤੀਫੇ ਨੂੰ ਲੈ ਕੇ ਪੌਲੀਐਵ ਦੀ ਪਤਨੀ ਨੇ ਟਰੂਡੋ ’ਤੇ ਸਾਧਿਆ ਨਿਸ਼ਾਨਾ

ਕੈਨੇਡਾ ਦੀ ਮੁੱਖ ਵਿਰੋਧੀ ਧਿਰ ਕੰਜ਼ਰਵੇਟਿਵ ਪਾਰਟੀ ਦੇ ਲੀਡਰ ਪੀਅਰ ਪੌਲੀਐਵ ਦੀ ਪਤਨੀ ਨੇ ਕ੍ਰਿਸਟੀਆ ਫ੍ਰੀਲੈਂਡ ਦੇ ਅਸਤੀਫੇ ਨੂੰ ਲੈ ਕੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ’ਤੇ ਵੱਡਾ ਹਮਲਾ ਬੋਲਿਆ ਹੈ।

ਐਨੀਡਾ ਪੌਲੀਐਵ ਨੇ ਕਿਹਾ ਕਿ ਟਰੂਡੋ ਵਲੋਂ ਖੁਦ ਦੀਆਂ ਨਾਕਾਮੀਆਂ ਨੂੰ ਮੰਨਣ ਦੀ ਬਜਾਏ ਇੱਕ ਮਹਿਲਾ ਨੂੰ ਅਹੁਦੇ ਦੀ ਬਲੀ ਚਾੜਿਆ ਗਿਆ ਹੈ ਤਾਂ ਕਿ ਉਸ ਦੀ ਪੌਜੀਸ਼ਨ ਨੂੰ ਕਿਸੇ ਪੁਰਸ਼ ਨਾਲ ਰਿਪਲੇਸ ਕੀਤਾ ਜਾ ਸਕੇ।

ਐਨੀਡਾ ਪੌਲੀਐਵ ਨੇ ਪ੍ਰਧਾਨ ਮੰਤਰੀ ’ਤੇ ਨਿਸ਼ਾਨਾ ਸਾਧਦੇ ਕਿਹਾ ਕਿ ਬੇਸ਼ੱਕ ਅਹੁਦੇ ਨੂੰ ਯੋਗਤਾ ਦੇ ਆਧਾਰ ’ਤੇ ਭਰਿਆ ਜਾਣਾ ਚਾਹੀਦਾ ਹੈ ਨਾ ਕਿ ਲਿੰਗ, ਨਸਲੀ ਪਿਛੋਕੜ ਜਾਂ ਕਿਸੇ ਹੋਰ ਕਾਰਕ ਦੇ ਆਧਾਰ ’ਤੇ ਪਰ ਜਦੋਂ ਇੱਕ ਅਜਿਹਾ ਪ੍ਰਧਾਨ ਮੰਤਰੀ ਹੋਵੇ ਜੋ ਸਮਾਨਤਾ ਦੇ ਮੁੱਦੇ ’ਤੇ ਦੁਨੀਆ ਭਰ ਨੂੰ ਉਪਦੇਸ਼ ਦਿੰਦਾ ਫਿਰਦਾ ਹੋਵੇ ਤਾਂ ਉਸ ਦੇ ਪਾਖੰਡ ਨੂੰ ਉਜਾਗਰ ਕੀਤਾ ਜਾਣਾ ਚਾਹੀਦਾ ਹੈ।

ਗੌਰਤਲਬ ਹੈ ਕਿ ਪੀਐੱਮ ਟਰੂਡੋ ਨੇ ਹਾਲ ਹੀ ਵਿਚ ਅਮਰੀਕਾ ਦੀਆਂ ਰਾਸ਼ਟਰਪਤੀ ਚੋਣਾਂ ਵਿਚ ਕਮਲਾ ਹੈਰਿਸ ਦੀ ਹਾਰ ’ਤੇ ਚਿੰਤਾ ਪ੍ਰਗਟ ਕੀਤੀ ਸੀ ਅਤੇ ਕਿਹਾ ਸੀ ਕਿ ਉਹ ਮਹਿਲਾਵਾਂ ਦੀ ਸਮਾਜਿਕ, ਆਰਥਿਕ ਅਤੇ ਰਾਜਨੀਤੀ ਵਿਚ ਬਰਾਬਰੀ ਦੀ ਭਾਗੀਦਾਰੀ ਵਿਚ ਵਿਸ਼ਵਾਸ ਕਰਦੇ ਹਨ।