ਮਾਂਟਰੀਅਲ ਨੇੜੇ ਵਾਪਰਿਆ ਟਰੇਨ ਹਾਦਸਾ, ਪੁਲਿਸ ਤੇ ਫਾਇਰ ਫਾਈਟਰਜ਼ ਮੌਕੇ 'ਤੇ ਪੁੱਜੇ

ਮਾਂਟਰੀਅਲ ਦੇ ਸਾਊਥ ਸ਼ੋਰ ਦੇ ਸ਼ਹਿਰ ਲੋਂਗਯੂਇਲ ਵਿਚ ਅੱਜ ਸਵੇਰ 9 ਵਜੇ ਦੇ ਕਰੀਬ ਇੱਕ ਟਰੇਨ ਪਟੜੀ ਤੋਂ ਉਤਰ ਗਈ। ਪੁਲਿਸ ਦਾ ਕਹਿਣਾ ਹੈ ਕਿ ਕਿਸੇ ਨੂੰ ਕੋਈ ਸੱਟ-ਪੇਟ ਨਹੀਂ ਲੱਗੀ ਪਰ ਟਰੇਨ ਹਾਈਡਰੋਜਨ ਪਰਆਕਸਾਈਡ ਲੈ ਕੇ ਜਾ ਰਹੀ ਸੀ, ਜਿਸ ਦੇ ਫੈਲਣ ਨੂੰ ਰੋਕਣ ਲਈ ਫਾਇਰ ਅਧਿਕਾਰੀ ਮੌਕੇ ’ਤੇ ਭੇਜੇ ਗਏ। ਪੁਲਿਸ ਅਤੇ ਸੀ.ਐਨ ਰੇਲ ਕਰਮਚਾਰੀ ਵੀ ਮੌਕੇ ’ਤੇ ਸਨ।

ਇਹ ਘਟਨਾ ਲੇਮੋਏਨ ਖੇਤਰ ਵਿਚ ਸੇਂਟ-ਲੁਈਸ ਅਤੇ ਸੇਂਟ-ਜਾਰਜਸ ਸਟਰੀਟ ਦੇ ਇੰਟਰਸੈਕਸ਼ਨ ਨੇੜੇ ਵਾਪਰੀ, ਜੋ ਹਾਈਵੇਅ 116 ਦੇ ਨਜ਼ਦੀਕ ਹੈ। ਬੁਲਾਰੇ ਨੇ ਦੱਸਿਆ ਕਿ ਅਧਿਕਾਰੀਆਂ ਨੇ ਇਲਾਕੇ ਵਿਚ ਇੱਕ ਵੱਡਾ ਸੁਰੱਖਿਆ ਘੇਰਾ ਸਥਾਪਿਤ ਕੀਤਾ ਅਤੇ ਲੋਕਾਂ ਨੂੰ ਇਲਾਕੇ ਤੋਂ ਦੂਰ ਰਹਿਣ ਦੀ ਅਪੀਲ ਕੀਤੀ ਗਈ, ਤਾਂ ਜੋ ਇਹ ਜਾਂਚ ਕੀਤੀ ਜਾ ਸਕੇ ਕਿ ਕਿਤੇ ਕੋਈ ਹਾਨੀਕਾਰਕ ਰਸਾਇਣਕ ਤਾਂ ਨਹੀਂ ਫੈਲਿਆ ਹੈ।

ਟਰੇਨ ਦੇ ਪਟੜੀ ਤੋਂ ਉਤਰਨ ਦਾ ਕਾਰਨ ਕੀ ਸੀ ਅਜੇ ਇਹ ਸਪੱਸ਼ਟ ਨਹੀਂ ਹੋਇਆ। ਇੱਕ ਵੀਡੀਓ ਵਿਚ ਮਾਲ ਗੱਡੀ ਦੇ ਕੰਟੇਨਰ ਤੋਂ ਧੂੰਏਂ ਦਾ ਗੁਬਾਰ ਨਿਕਲਦਾ ਦੇਖਿਆ ਗਿਆ, ਜਿਸ ਦੇ ਉਪਰ ਅੱਗ ਬੁਝਾਊ ਕਰਮਚਾਰੀ ਪਾਣੀ ਦਾ ਛਿੜਕਾਅ ਕਰ ਰਹੇ ਸਨ। ਟਰੇਨ ਸਿੱਧੀ ਸੀ ਪਰ ਕਈ ਡੱਬੇ ਟਰੈਕ ਤੋਂ ਉਤਰ ਕੇ ਇੱਕ ਪਾਸੇ ਝੁਕੇ ਹੋਏ ਸਨ।