24.84C Vancouver 24.84C VancouverJul 27, 2022 12:18 AM - The Canadian Press
ਲੈਂਗਲੀ 'ਚ ਸੋਮਵਾਰ ਨੂੰ ਵਾਪਰੀ ਮਲਟੀਪਲ ਸ਼ੂਟਿੰਗ ਦੀ ਘਟਨਾ 'ਚ ਪੁਲਿਸ ਵੱਲੋਂ ਜਾਂਚ ਜਾਰੀ ਹੈ।
ਜਾਂਚ ਅਧਿਕਾਰੀ ਜੁਟੇ ਹਨ ਕਿ ਘਟਨਾ ਪਿੱਛੇ ਦੇ ਇਰਾਦੇ ਦਾ ਪਤਾ ਲਗਾਇਆ ਜਾ ਸਕੇ।
ਇਸ ਘਟਨਾ 'ਚ ਸ਼ੂਟਰ ਸਮੇਤ 3 ਲੋਕਾਂ ਦੀ ਮੌਤ ਹੋ ਗਈ।
ਮਲਟੀਪਲ ਲੋਕੇਸ਼ਨਸ 'ਤੇ ਵਾਪਰੀ ਸ਼ੂਟਿੰਗ ਦੀ ਇਸ ਵਾਰਦਾਤ 'ਚ 2 ਲੋਕ ਜਖਮੀ ਵੀ ਹੋਏ ਸਨ।
ਅਧਿਕਾਰੀਆਂ ਨੇ ਸੋਮਵਾਰ ਨੂੰ ਹੀ ਸ਼ੂਟਰ ਦੀ ਪਛਾਣ ਜਾਰੀ ਕਰ ਦਿੱਤੀ ਸੀ।
ਹਾਲਾਂਕਿ ਅੱਜ ਸ਼ੂਟਰ ਦੀ ਤਸਵੀਰ ਵੀ ਜਾਰੀ ਕਰ ਦਿੱਤੀ ਗਈ ਹੈ।
ਆਈ.ਹਿਟ ਨੇ ਸ਼ੂਟਰ ਦੀ ਤਸਵੀਰ ਜਾਰੀ ਕਰ ਲੋਕਾਂ ਤੋਂ ਵੀ ਮਦਦ ਦੀ ਅਪੀਲ ਕੀਤੀ ਹੈ।
ਸਾਰਜੈਂਟ ਡੇਵਿਡ ਲੀ ਨੇ ਕਿਹਾ ਹੈ ਕਿ ਜਾਣਕਾਰੀ ਰੱਖਣ ਵਾਲੇ ਸੰਪਰਕ ਕਰਨ ਤਾਂ ਜੋ ਸ਼ੂਟਰ ਦੇ ਇਰਾਦੇ ਸੰਬੰਧੀ ਕੁਝ ਤਸਵੀਰ ਸਪਸ਼ਟ ਹੋ ਸਕੇ।
ਸ਼ੂਟਰ ਦੀ ਉਮਰ 28 ਸਾਲ ਅਤੇ ਉਸ ਦਾ ਨਾਮ ਜੌਰਡਨ ਡੈਨੀਅਲ ਗੌਗਿਨ ਦੱਸਿਆ ਗਿਆ ਸੀ।
ਇਸ ਵਿਅਕਤੀ ਦੀ ਪੁਲਿਸ ਦੀ ਗੋਲੀ ਨਾਲ ਮੌਤ ਹੋ ਗਈ ਸੀ।
ਯਾਦ ਰਹੇ ਇਸ ਘਟਨਾ ਦੌਰਾਨ ਸੋਮਵਾਰ ਨੂੰ 3 ਐਮਰਜੈਂਸੀ ਐਲਰਟ ਭੇਜੇ ਗਏ ਸਨ।
ਇਹ ਬੀ.ਸੀ. ਦੇ ਵਿੱਚ ਕਿਸੇ ਸ਼ੂਟਿੰਗ ਸੰਬੰਧੀ ਵਾਰਦਾਤ 'ਚ ਐਲਰਟ ਭੇਜੇ ਜਾਣ ਦਾ ਸਿਰਫ ਦੂਜਾ ਮੌਕਾ ਸੀ।
ਇਸ ਤੋਂ ਪਹਿਲਾਂ ਨਵੰਬਰ 2021 'ਚ ਵੈਂਡਰਹੂਫ 'ਚ ਵਾਪਰੀ ਸ਼ੂਟਿੰਗ ਦੀ ਘਟਨਾ 'ਚ ਪਬਲਿਕ ਸੇਫਟੀ ਐਲਰਟ ਭੇਜਿਆ ਗਿਆ ਸੀ।
ਪੁਲਿਸ ਦਾ ਮੰਨਣਾ ਹੈ ਕਿ ਸ਼ੂਟਿੰਗ ਦੀ ਵਾਰਦਾਤ ਨੂੰ ਇੱਕੋ ਸ਼ੱਕੀ ਨੇ ਇਕੱਲਿਆਂ ਅੰਜਾਮ ਦਿੱਤਾ ਸੀ ਅਤੇ ਘਟਨਾ 'ਚ ਉਸ ਦਾ ਕੋਈ ਸਾਥੀ ਨਹੀਂ ਸੀ।
ਸੋਮਵਾਰ ਸਵੇਰ ਦੇ ਸਮੇਂ ਸੈਲਫੋਨਸ 'ਤੇ ਐਮਰਜੈਂਸੀ ਐਲਰਟ ਭੇਜਿਆ ਗਿਆ ਸੀ।
ਸਵੇਰ ਕਰੀਬ 6.30 ਵਜੇ ਪਹਿਲਾ ਐਮਰਜੈਂਸੀ ਐਲਰਟ ਭੇਜਿਆ ਗਿਆ ਸੀ ਅਤੇ ਇਸ 'ਚ ਸ਼ੂਟਿੰਗ ਬਾਰੇ ਦੱਸਣ ਤੋਂ ਇਲਾਵਾ ਇੱਕ ਸ਼ੱਕੀ ਨਾਲ ਕਿਸੇ ਪ੍ਰਕਾਰ ਦੀ ਇੰਟਰੈਕਸ਼ਨ ਦੀ ਜਾਣਕਾਰੀ ਦਿੱਤੀ ਗਈ ਸੀ।
ਇਸ ਤੋਂ ਬਾਅਦ ਦੂਜਾ ਐਲਰਟ ਸਵੇਰ ਕਰੀਬ 7.30 ਵਜੇ ਭੇਜਿਆ ਗਿਆ ਸੀ ਅਤੇ ਦੱਸਿਆ ਗਿਆ ਕਿ ਮਾਮਲੇ 'ਚ ਸ਼ਾਮਿਲ ਸ਼ੱਕੀ ਨੂੰ ਹੁਣ ਖਤਰਾ ਨਹੀਂ ਮੰਨਿਆ ਜਾ ਰਿਹਾ।
ਫਿਰ ਦੁਪਹਿਰ ਕਰੀਬ 3.30 ਵਜੇ ਤੀਜਾ ਐਲਰਟ ਭੇਜਿਆ ਗਿਆ ਅਤੇ ਸੂਚਨਾ ਦਿੱਤੀ ਗਈ ਕਿ ਲੈਂਗਲੀ ਅਤੇ ਆਲੇ-ਦੁਆਲੇ ਦੇ ਇਲਾਕਿਆਂ 'ਚ ਸੇਫਟੀ ਐਲਰਟ ਰੱਦ ਕੀਤਾ ਜਾ ਰਿਹਾ ਹੈ।
