15.35C Vancouver 15.35C VancouverJul 26, 2022 12:48 AM - The Canadian Press
ਪੋਪ ਫਰਾਂਸਿਸ ਨੇ ਅੱਜ ਕੈਨੇਡਾ 'ਚ ਰੈਜ਼ੀਡੈਂਸ਼ੀਅਲ ਸਕੂਲਾਂ 'ਚ ਰਹੀ ਕੈਥੋਲਿਕ ਚਰਚ ਦੀ ਭੂਮਿਕਾ ਸੰਬੰਧੀ ਗਹਿਰੇ ਦੁੱਖ ਦਾ ਪ੍ਰਗਟਾਵਾ ਕਰਦਿਆਂ ਮੁਆਫੀ ਮੰਗੀ ਹੈ।
ਪੋਪ ਦੇ ਮੁਆਫੀ ਮੰਗਣ ਮੌਕੇ ਅਨੇਕਾਂ ਰੈਜ਼ੀਡੈਂਸ਼ੀਅਲ ਸਕੂਲ ਸਰਵਾਈਵਰ ਮੌਕੇ 'ਤੇ ਮੌਜੂਦ ਸਨ।
ਮੁਆਫੀ ਮੌਕੇ ਇੰਡੀਜਨਸ ਲੋਕਾਂ ਨੇ ਤਾੜੀਆਂ ਤੋਂ ਇਲਾਵਾ ਨਮ ਅੱਖਾਂ ਨਾਲ ਇਸ ਦਾ ਸਵਾਗਤ ਕੀਤਾ।
ਪੋਪ ਨੇ ਐਲਬਰਟਾ ਦੇ ਮਾਸਕਵਾਚੀਜ ਵਿੱਚ ਰੈਜ਼ੀਡੈਂਸ਼ੀਅਲ ਸਕੂਲ ਸਰਵਾਈਵਰਸ ਅਤੇ ਬਜੁਰਗਾਂ ਨੂੰ ਸੰਬੋਧਤ ਕੀਤਾ।
ਇਸੇ ਇਲਾਕੇ 'ਚ ਐਰਮੀਨੈਸਕਿਨ ਇੰਡੀਅਨ ਰੈਜ਼ੀਡੈਂਸ਼ੀਅਲ ਸਕੂਲ ਸਥਿਤ ਸੀ, ਜਿਸ ਦੀ ਗਿਣਤੀ ਦੇਸ਼ ਦੇ ਸਭ ਤੋਂ ਵੱਡੇ ਰੈਜ਼ੀਡੈਂਸ਼ੀਅਲ ਸਕੂਲਾਂ 'ਚ ਕੀਤੀ ਜਾਂਦੀ ਸੀ।
ਪੋਪ ਫਰਾਂਸਿਸ ਨੇ ਕਿਹਾ ਕਿ ਉਨ੍ਹਾਂ ਨੂੰ ਗਹਿਰਾ ਦੁੱਖ ਹੈ ਅਤੇ ਉਹ ਸ਼ਰਮਸਾਰ ਹਨ।
ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਰੈਜ਼ੀਡੈਂਸ਼ੀਅਲ ਸਕੂਲਾਂ 'ਚ ਪਹੁੰਚਣ ਵਾਲੇ ਬੱਚਿਆਂ ਦੀਆਂ ਯਾਦਾਂ ਦੁੱਖਦਾਇਕ ਹਨ ਅਤੇ ਹਰ ਬੱਚੇ ਨਾਲ ਪਿਆਰ ਅਤੇ ਇੱਜਤ ਨਾਲ ਪੇਸ਼ ਆਉਣਾ ਚਾਹੀਦਾ ਹੈ।
ਅਨੁਮਾਨ ਅਨੁਸਾਰ ਕਰੀਬ 150,000 ਬੱਚਿਆਂ ਨੂੰ ਰੈਜ਼ੀਡੈਂਸ਼ੀਅਲ ਸਕੂਲ ਅਟੈਂਡ ਕਰਨ ਲਈ ਮਜਬੂਰ ਕੀਤਾ ਗਿਆ ਸੀ।
ਇਨ੍ਹਾਂ ਸਕੂਲਾਂ 'ਚ ਅਨੇਕਾਂ ਬੱਚਿਆਂ ਦੀ ਅਣਦੇਖੀ ਤੋਂ ਇਲਾਵਾ ਉਨ੍ਹਾਂ ਨੂੰ ਸ਼ਰੀਰਕ ਅਤੇ ਜਿਨਸੀ ਸ਼ੋਸ਼ਣ ਦਾ ਸ਼ਿਕਾਰ ਬਣਾਇਆ ਜਾਂਦਾ ਸੀ।
ਇਸ 'ਚ 60% ਤੋਂ ਵਧੇਰੇ ਸਕੂਲ ਕੈਥੋਲਿਕ ਚਰਚ ਵੱਲੋਂ ਚਲਾਏ ਜਾਂਦੇ ਸਨ।
