ਕੈਨੇਡਾ ਦੇ ਕਿਸਾਨਾਂ ਨੂੰ ਚੀਨ ਦੇ ਭਾਰੀ ਟੈਰਿਫ ਕਾਰਨ ਚੁੱਕਣਾ ਪੈ ਸਕਦਾ ਨੁਕਸਾਨ

ਕੈਨੇਡਾ ਦੇ ਕਿਸਾਨਾਂ ਨੂੰ ਚੀਨ ਦੇ ਭਾਰੀ ਟੈਰਿਫ ਕਾਰਨ ਨੁਕਸਾਨ ਉਠਾਉਣਾ ਪੈ ਸਕਦਾ ਹੈ। ਵੀਰਵਾਰ ਤੋਂ ਲਗਭਗ $2.6 ਬਿਲੀਅਨ ਦੇ ਕੈਨੇਡੀਅਨ ਖੇਤੀਬਾੜੀ ਅਤੇ ਭੋਜਨ ਉਤਪਾਦ 'ਤੇ ਚੀਨ ਟੈਰਿਫ ਲਗਾਉਣ ਜਾ ਰਿਹਾ ਹੈ। ਇਸ ਵਿਚ ਕੈਨੇਡੀਅਨ ਕੈਨੋਲਾ ਤੇਲ ਅਤੇ ਮਟਰ ਆਯਾਤ 'ਤੇ 100 ਫੀਸਦੀ ਟੈਰਿਫ ਅਤੇ ਕੈਨੇਡੀਅਨ ਸੀ ਫੂਡ ਅਤੇ ਸੂਰ ਦੇ ਮਾਸ 'ਤੇ 25 ਫੀਸਦੀ ਟੈਰਿਫ ਸ਼ਾਮਲ ਹੈ।

ਬੀਜਿੰਗ ਨੇ ਕੈਨੇਡਾ ਵਲੋਂ ਅਕਤੂਬਰ ਵਿਚ ਚੀਨ ਵਿੱਚ ਬਣੇ ਇਲੈਕਟ੍ਰਿਕ ਵਾਹਨ ਅਤੇ ਸਟੀਲ ਤੇ ਐਲੂਮੀਨੀਅਮ ਉਤਪਾਦ 'ਤੇ ਵਧਾਈ ਗਈ ਇੰਪੋਰਟ ਡਿਊਟੀ ਦੇ ਜਵਾਬ ਵਿਚ ਇਸ ਮਹੀਨੇ ਦੇ ਸ਼ੁਰੂ ਵਿਚ 20 ਮਾਰਚ ਤੋਂ ਜਵਾਬੀ ਟੈਰਿਫ ਲਾਗੂ ਕਰਨ ਦੀ ਘੋਸ਼ਣਾ ਕੀਤੀ ਸੀ। ਕੈਨੇਡੀਅਨ ਕੈਨੋਲਾ ਤੇਲ 'ਤੇ 100 ਫੀਸਦੀ ਟੈਰਿਫ ਨਾਲ ਐਲਬਰਟਾ, ਸਸਕੈਚਵਨ ਅਤੇ ਮੈਨੀਟੋਬਾ ਦੇ ਕਿਸਾਨ ਸਭ ਤੋਂ ਵੱਧ ਪ੍ਰਭਾਵਿਤ ਹੋਣਗੇ, ਇਸ ਲਈ ਇਨ੍ਹਾਂ ਸੂਬਿਆਂ ਨੇ ਫੈਡਰਲ ਸਰਕਾਰ ਤੋਂ ਕਿਸਾਨਾਂ ਦੀ ਸਹਾਇਤਾ ਲਈ ਤੁਰੰਤ ਕਦਮ ਚੁੱਕਣ ਦੀ ਮੰਗ ਕੀਤੀ ਹੈ।

ਗੌਰਤਲਬ ਹੈ ਕਿ ਪਿਛਲੇ ਸਾਲ ਅਕਤੂਬਰ ਵਿਚ ਸਾਬਕਾ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਚੀਨ ਵਿੱਚ ਬਣੇ ਇਲੈਕਟ੍ਰਿਕ ਵਾਹਨ 'ਤੇ 100 ਫੀਸਦੀ ਡਿਊਟੀ ਅਤੇ ਚੀਨ ਤੋਂ ਆਉਣ ਵਾਲੇ ਸਟੀਲ ਤੇ ਐਲੂਮੀਨੀਅਮ ਉਤਪਾਦ 'ਤੇ 25 ਫੀਸਦੀ ਡਿਊਟੀ ਲਗਾਈ ਸੀ। ਓਨਟਾਰੀਓ ਵਿਸ਼ੇਸ਼ ਤੌਰ 'ਤੇ ਇਸ ਦੀ ਮੰਗ ਕਰ ਰਿਹਾ ਸੀ।