22.68C Vancouver 22.68C VancouverApr 1, 2020 1:47 AM -
ਬੀ.ਸੀ. ਦੇ ਪ੍ਰੀਮਿਅਰ ਜੌਨ ਹੌਰਗਨ ਨੇ ਅੱਜ ਬ੍ਰਿਟਿਸ਼ ਕੋਲੰਬੀਅਨਸ ਨੂੰ ਸੰਬੋਧਨ ਕੀਤਾ।
ਸ਼ਾਮ 6.15 ਵਜੇ ਬੀ.ਸੀ. ਦੇ ਪ੍ਰੀਮਿਅਰ ਇੱਕ ਟੀ.ਵੀ. ਐਡਰੈਸ ਆਸਰੇ ਲੋਕਾਂ ਦੇ ਸਾਹਮਣੇ ਆਏ, ਅਤੇ ਉਨ੍ਹਾਂ ਲੋਕਾਂ ਨੂੰ ਸੰਬੋਧਨ ਕਰਦੇ ਹੋਏ ਪਾਲਿਸੀਆਂ ਦੀ ਘੱਟ ਅਤੇ ਉਮੀਦ ਤੇ ਹੌਂਸਲੇ ਦੀ ਵਧੇਰੇ ਗੱਲਬਾਤ ਕੀਤੀ।
ਹਾਲਾਂਕਿ ਪ੍ਰੀਮਿਅਰ ਨੇ ਯਾਦ ਦਵਾਇਆ ਕਿ ਸੂਬੇ ਦੇ ਜਿਹੜੇ ਲੋਕ ਮੌਜੂਦਾ ਹਾਲਾਤਾਂ ਕਾਰਨ ਪ੍ਰਭਾਵਿਤ ਹੋਏ ਹਨ, ਅਤੇ ਜਿੰਨਾ ਲਈ ਰੈਂਟ ਅਤੇ ਮੌਰਗੇਜ ਇੱਕ ਸਮੱਸਿਆ ਬਣ ਗਈ ਹੈ, ਉਨ੍ਹਾਂ ਨੂੰ ਸੂਬੇ ਵੱਲੋਂ $500 ਤਕ ਦੀ ਮਦਦ ਮੁਹਈਆ ਕਰਵਾਈ ਜਾ ਰਹੀ ਹੈ।
ਹੋਰ ਵਿੱਤੀ ਸਹਾਇਤਾ ਪ੍ਰਦਾਨ ਕੀਤੇ ਜਾਣ ਸੰਬੰਧੀ ਵੀ ਵੇਰਵੇ ਸਾਂਝੇ ਕੀਤੇ।
ਉਨ੍ਹਾਂ ਹੈਲਥਕੇਅਰ ਵਰਕਰਾਂ, ਫਰਾਮੇਸੀਆਂ 'ਤੇ ਕੰਮ ਕਰਨ ਵਾਲਿਆਂ, ਟ੍ਰਕਰਸ, ਗਰੋਸਰੀ ਸਟੋਰਾਂ 'ਤੇ ਕੰਮ ਕਰਨ ਵਾਲਿਆਂ ਅਤੇ ਹੋਰ ਕੰਮਾਂ 'ਤੇ ਜੁਟੇ ਲੋਕਾਂ ਨੂੰ ਸਹਿਯੋਗ ਪ੍ਰਦਾਨ ਕਰਨ ਲਈ ਧੰਨਵਾਦ ਕੀਤਾ।
ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਲੋਕਾਂ ਆਸਰੇ ਹੀ ਬੀ.ਸੀ. ਨੇ ਅੱਗੇ ਵਧਣਾ ਜਾਰੀ ਰੱਖਿਆ ਹੈ।
ਖਾਸ ਗੱਲ ਇਹ ਹੈ ਕਿ ਬੀ.ਸੀ. ਦੇ ਪ੍ਰੀਮਿਅਰ ਨੇ ਕਿਹਾ ਹੈ ਕਿ ਇਨ੍ਹਾਂ ਸਾਰੇ ਵਰਕਰਾਂ ਪ੍ਰਤੀ ਆਪਣਾ ਸਹਿਯੋਗ ਦਰਸ਼ਾਉਣ ਲਈ ਅੱਜ ਬੀ.ਸੀ. ਵਾਸੀ ਸ਼ਾਮ 7 ਵਜੇ ਘਰਾਂ ਦੇ ਬਾਹਰ ਖੜੇ ਹੋਕੇ, ਬਰਤਨ ਖੜਕਾਉਣ ਜਾਂ ਤਾੜੀਆਂ ਵਜਾਉਣ।
ਜੌਨ ਹੌਰਗਨ ਨੇ ਕਿਹਾ ਕਿ ਸਪਲਾਈ ਚੇਨ ਨੂੰ ਜਾਰੀ ਰੱਖਣ ਲਈ ਕੁਝ ਖਾਸ ਕਿਸਮ ਦੇ ਉਪਰਾਲੇ ਕੀਤੇ ਜਾ ਰਹੇ ਹਨ।
ਉਨ੍ਹਾਂ ਉਚੇਚੇ ਤੌਰ 'ਤੇ ਕਿਹਾ ਕਿ ਸੂਬੇ ਦੀ ਸਿਹਤ ਅਫਸਰ, ਡਾ. ਬੌਨੀ ਹੈਨਰੀ ਵੱਲੋਂ ਜਾਰੀ ਸਲਾਹਾਂ ਦਾ ਖਾਸ ਧਿਆਨ ਦਿੱਤਾ ਜਾਵੇ।
ਪ੍ਰੀਮਿਅਰ ਜੌਨ ਹੌਰਗਨ ਨੇ ਸੂਬੇ 'ਚ ਜਾਰੀ 'ਸਟੇਟ ਆਫ ਐਮਰਜੈਂਸੀ' ਨੂੰ ਵੀ ਅੱਗੇ ਵਧਾਉਣ ਦਾ ਐਲਾਨ ਕੀਤਾ ਹੈ, ਅਤੇ ਇਸਨੂੰ 14 ਅਪ੍ਰੈਲ 'ਤੱਕ ਵਧਾ ਦਿੱਤਾ ਗਿਆ ਹੈ।
ਪ੍ਰੀਮਿਅਰ ਨੇ ਕਿਹਾ ਹੈ ਕਿ ਸਾਰੇ ਹੀ ਲੋਕ ਅੱਜ ਇੱਕ ਵਾਰ ਫੇਰ ਪ੍ਰਣ ਕਰਨ ਅਤੇ ਆਪਣੇ ਵੱਲੋਂ ਦਿੱਤੇ ਜਾ ਰਹੇ ਸਹਿਯੋਗ ਨੂੰ ਜਾਰੀ ਰੱਖਣ।
