15.33C Vancouver 15.33C VancouverApr 4, 2020 11:36 PM -
ਅਮਰੀਕਾ 'ਚ ਕੋਵਿਡ-19 ਟਾਸਕ ਫੋਰਸ ਸ਼ਨੀਵਾਰ ਨੂੰਮੀਡੀਆ ਦੇ ਰੂਬਰੂ ਹੋਈ ਅਤੇ ਅਮਰੀਕਾਦੇ ਰਾਸ਼ਟਰਪਤੀ ਡੌਨਲਡ ਟ੍ਰੰਪ ਨੇ ਜਾਣਕਾਰੀ ਸਾਂਝੀ ਕੀਤੀ ਕਿ ਦੇਸ਼ 'ਚ ਕੋਵਿਡ-19 ਦੇ ਸੰਕਟ ਨਾਲ ਨਜਿੱਠਣ ਲਈ, ਮਿਲਿਟਰੀ ਵੀ ਮਦਦ ਪ੍ਰਦਾਨ ਕਰਨ ਜਾ ਰਹੀ ਹੈ।
ਉਨ੍ਹਾਂ ਕਿਹਾ ਕਿ ਆਉਣ ਵਾਲੇ ਹਫਤਿਆਂ 'ਚ ਇਸ ਵਾਇਰਸ ਕਾਰਨ ਉਠਾਏ ਜਾ ਰਹੇ ਕਦਮ ਹੋਰ ਤੇਜ਼ ਹੋਣ ਜਾ ਰਹੇ ਹਨ ਅਤੇ ਇਸ ਦੌਰਾਨ ਬਹੁਤ ਸਾਰੀਆਂ ਜਾਨਾਂ ਜਾ ਸਕਦੀਆਂ ਹਨ।
ਪਰ ਉਨ੍ਹਾਂ ਉਚੇਚੇ ਤੌਰ 'ਤੇ ਆਖਿਆ ਕਿ ਓਹ ਜਲਦ ਹੀ ਦੇਸ਼ ਨੂੰ ਗਤੀਸ਼ੀਲ ਹੁੰਦੇ ਵੇਖਣਾ ਚਾਹੁੰਦੇ ਹਨ।
ਉਨ੍ਹਾਂ ਕਿਹਾ ਕਿ, 'ਅਸੀਂ ਆਪਣੇ ਦੇਸ਼ ਨੂੰ ਜਲਦੀ ਹੀ ਦੁਬਾਰਾ ਖੋਲ੍ਹਣਾ ਹੈ, ਅਤੇ ਆਪਾਂ ਇਹ ਹਾਲਾਤ ਮਹੀਨਿਆਂ ਤਕ ਜਾਰੀ ਨਹੀਂ ਰੱਖਣਾ ਚਾਹੁੰਦੇ।
ਇਹ ਦੇਸ਼ ਇਸ ਸਭ ਲਈ ਨਹੀਂ ਬਣਿਆ ਸੀ।'
ਉਨ੍ਹਾਂ ਇੱਕ ਵਾਰ ਫੇਰ ਦੋਹਰਾਇਆ ਕਿ ਡਿਫੈਂਸ ਪ੍ਰੋਡਕਸ਼ਨ ਐਕਟ ਬੇਹਦ ਮਜਬੂਤੀ ਨਾਲ ਲਾਗੂ ਕੀਤਾ ਜਾ ਰਿਹਾ ਹੈ, ਅਤੇ ਜੇਕਰ ਕੋਈ ਇਸਨੂੰ ਅਮਰੀਕਾ ਦਾ ਰੀਟੈਲੀਏਟਰੀ ਰਵਈਆ ਸਮਝਣਾ ਚਾਹੇ, ਤਾਂ ਇਹ ਸਮਝਣਾ ਉਨ੍ਹਾਂ 'ਤੇ ਨਿਰਭਰ ਕਰਦਾ ਹੈ।
ਪਰ ਉਨ੍ਹਾਂ ਕਿਹਾ ਕਿ ਓਹ ਸਖਤ ਰਵਈਆ ਅਖਤਿਆਰ ਕਰਨ ਲਈ ਤਿਆਰ ਹਨ।
ਉਨ੍ਹਾਂ ਕਿਹਾ ਕਿ ਅਮਰੀਕਾ 'ਚ ਬਣ ਰਹੇ ਮੈਡੀਕਲ ਉਪਕਰਨਾਂ ਦੀ ਹੋਰ ਦੇਸ਼ਾਂ ਨੂੰ ਕੀਤੀ ਜਾ ਰਹੀ ਸਪਲਾਈ ਰੋਕੀ ਜਾ ਸਕਦੀ ਹੈ, ਅਤੇ ਮੈਡੀਕਲ ਉਪਕਰਨਾਂ 'ਤੇ ਪਹਿਲਾ ਹੱਕ ਅਮਰੀਕਾ ਦੀ ਘਰੇਲੂ ਵਰਤੋਂ ਦਾ ਹੈ।
