15.83C Vancouver 15.83C VancouverJul 9, 2021 10:22 PM -
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਬੀ.ਸੀ. ਦੌਰੇ ਵਿਚਾਲੇ ਅੱਜ ਸਰੀ ਸਿਟੀ ਹਾਲ ਤਕ ਪਹੁੰਚ ਕੀਤੀ।
ਇਸੇ ਦੌਰਾਨ ਉਨ੍ਹਾਂ ਫੈਡਰਲ ਸਰਕਾਰ ਵੱਲੋਂ ਬੀ.ਸੀ. 'ਚ ਟ੍ਰਾੰਜ਼ਿਟ ਸੰਬੰਧੀ ਇੱਕ ਵੱਡਾ ਐਲਾਨ ਕਰ ਦਿੱਤਾ।
ਟਰੂਡੋ ਨੇ ਐਲਾਨ ਕੀਤਾ ਕਿ ਬੀ.ਸੀ. 'ਚ ਸਰੀ-ਲੈਂਗਲੀ ਸਕਾਈਟਰੇਨ ਐਕਸਟੈਨਸ਼ਨ ਦੇ ਲਈ 1.3 ਬਿਲੀਅਨ ਡਾਲਰ ਦਾ ਨਿਵੇਸ਼ ਕੀਤਾ ਜਾ ਰਿਹਾ ਹੈ।
ਉਨ੍ਹਾਂ ਕਿਹਾ ਕਿ ਨਾ ਸਿਰਫ ਇਸ ਦੇ ਨਾਲ ਆਵਾਜਾਈ 'ਚ ਆਸਾਨੀ ਹੋਵੇਗੀ ਬਲਕਿ ਪ੍ਰਦੂਸ਼ਣ 'ਚ ਵੀ ਕਟੌਤੀ 'ਚ ਮਦਦ ਮਿਲੇਗੀ।
ਇਸ ਤੋਂ ਇਲਾਵਾ ਟਰੂਡੋ ਨੇ ਦੱਸਿਆ ਕਿ ਇਸ ਪ੍ਰੋਜੈਕਟ ਨਾਲ ਸੈਂਕੜੇ-ਹਜ਼ਾਰਾਂ ਦੀ ਗਿਣਤੀ 'ਚ ਨੌਕਰੀਆਂ ਵੀ ਉਤਪੰਨ ਹੋਣਗੀਆਂ।
ਉਨ੍ਹਾਂ ਦੱਸਿਆ ਕਿ ਇਹ ਐਕਸਟੈਨਸ਼ਨ 16 ਕਿਲੋਮੀਟਰ ਦੀ ਹੋਵੇਗੀ ਅਤੇ ਇਸ 'ਚ 8 ਸਟੇਸ਼ਨ ਹੋਣਗੇ।
ਇਸ ਐਲਾਨ ਮੌਕੇ ਟਰੂਡੋ ਦੇ ਨਾਲ ਸੂਬੇ ਦੇ ਪ੍ਰੀਮਿਅਰ ਜੌਨ ਹੌਰਗਨ ਅਤੇ ਸਰੀ ਦੇ ਮੇਅਰ ਡੱਗ ਮੈਕੁਲਮ ਤੋਂ ਇਲਾਵਾ ਕਈ ਹੋਰ ਫੈਡਰਲ ਅਤੇ ਸੂਬਾਈ ਮੰਤਰੀ ਵੀ ਮੌਜੂਦ ਸਨ।
ਟਰੂਡੋ ਨੇ ਇਸ ਪ੍ਰੋਜੈਕਟ ਤੋਂ ਇਲਾਵਾ ਮਿਲੈਨਿਅਮ ਲਾਈਨ ਨੂੰ ਅਰਬਿਊਟਸ ਤੋਂ ਯੂ.ਬੀ.ਸੀ. ਵਿਚਾਲੇ ਤਕ ਵਧਾਉਣ ਲਈ ਕੁੱਲ ਲਾਗਤ ਦੇ 40% ਤਕ ਦੇ ਯੋਗਦਾਨ ਦਾ ਵੀ ਐਲਾਨ ਕੀਤਾ ਹੈ।
ਟਰੂਡੋ ਨੇ ਸਿਟੀ ਹਾਲ 'ਚ ਇਹ ਐਲਾਨ ਸਵੇਰੇ ਕਰੀਬ 11.30 ਵਜੇ ਕੀਤੇ।
ਯਾਦ ਰਹੇ ਸਾਲ 2018 'ਚ ਪ੍ਰਧਾਨ ਮੰਤਰੀ ਟਰੂਡੋ ਨੇ ਫੈਡਰਲ ਸਰਕਾਰ ਵੱਲੋਂ ਸਰੀ ਦੇ ਲਈ ਇੱਕ ਲਾਈਟ ਰੇਲ ਲਾਈਨ ਲਈ ਫੰਡਿੰਗ ਦਾ ਐਲਾਨ ਕੀਤਾ ਸੀ ਪਰ ਨਵੀਂ ਕਾਉਂਸਿਲ ਨੇ ਕੁਝ ਹੀ ਮਹੀਨਿਆਂ ਬਾਅਦ ਇਸ 'ਚ ਤਬਦੀਲੀ ਕਰਦਿਆਂ ਸਕਾਈਟਰੇਨ ਐਕਸਟੈਨਸ਼ਨ ਦੇ ਹੱਕ 'ਚ ਫੈਸਲਾ ਲਿਆ ਸੀ।
ਯਾਦ ਰਹੇ ਟਰੂਡੋ ਨੇ ਇਸ ਹਫ਼ਤੇ ਕਈ ਚੋਣ ਕੈਂਪੇਨ ਜਿਹੇ ਐਲਾਨ ਕੀਤੇ ਹਨ।
ਬੀ.ਸੀ. ਤੋਂ ਪਹਿਲਾਂ ਔਂਟੈਰੀਓ, ਸਸਕੈਚਵਿਨ ਅਤੇ ਐਲਬਰਟਾ 'ਚ ਵੀ ਟਰੂਡੋ ਕੁਝ ਐਲਾਨ ਕਰ ਚੁੱਕੇ ਹਨ।
