ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੂੰ ਆਪਣੀ ਪਾਰਟੀ ਦੇ ਅੰਦਰ ਹੀ ਕਰਨਾ ਪੈ ਰਿਹੈ ਵਿਰੋਧ ਦਾ ਸਾਹਮਣਾ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੂੰ ਪਾਰਟੀ ਵਿਚ ਵੱਡੇ ਵਿਰੋਧ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਉਨ੍ਹਾਂ ਤੋਂ ਜਨਤਕ ਤੌਰ ’ਤੇ ਅਸਤੀਫੇ ਦੀ ਮੰਗ ਕਰਨ ਵਾਲੇ ਲਿਬਰਲ ਐਮ.ਪੀ ਦੀ ਗਿਣਤੀ 16 ਹੋ ਗਈ ਹੈ ਅਤੇ ਜੂਨ ਵਿਚ ਜਨਤਕ ਤੌਰ ’ਤੇ ਇਹ ਮੰਗ ਕਰਨ ਵਾਲੇ ਪਹਿਲੇ ਲਿਬਰਲ ਐਮ.ਪੀ ਨੇ ਹੁਣ ਆਪਣੇ ਬਾਕੀ ਸਾਥੀਆਂ ਨੂੰ ਵੀ ਇਸ ਮੰਗ ਵਿਚ ਸ਼ਾਮਲ ਹੋਣ ਦੀ ਅਪੀਲ ਕੀਤੀ ਹੈ।

ਨਿਊ ਬਰੰਜ਼ਵਿਕ ਤੋਂ ਟਰੂਡੋ ਦੇ ਐਮਪੀ ਵੇਨ ਲੌਂਗ ਨੇ ਬੁੱਧਵਾਰ ਸਵੇਰੇ ਆਪਣੇ ਸਾਥੀ ਸੰਸਦ ਮੈਂਬਰਾਂ ਨੂੰ ਇੱਕ ਪੱਤਰ ਭੇਜਿਆ ਅਤੇ ਇਸ ਨੂੰ ਆਪਣੇ ਫੇਸਬੁੱਕ ਪੇਜ ’ਤੇ ਪੋਸਟ ਕੀਤਾ। ਵੇਨ ਲੌਂਗ ਨੇ ਕਿਹਾ ਕਿ ਕ੍ਰਿਸਟੀਆ ਫ੍ਰੀਲੈਂਡ ਦਾ ਅਚਾਨਕ ਅਸਤੀਫਾ ਪਾਰਟੀ ਲਈ ਸ਼ਰਮਨਾਕ ਤੋਂ ਵੀ ਜ਼ਿਆਦਾ ਹੈ ਅਤੇ ਇਸ ਪਿੱਛੇ ਪ੍ਰਧਾਨ ਮੰਤਰੀ ਦਫ਼ਤਰ ਦਾ ਦੋਸ਼ ਹੈ।

ਉਨ੍ਹਾਂ ਆਪਣੇ ਸਾਥੀ ਐਮਪੀ ਅਤੇ ਕੈਬਨਿਟ ਮੰਤਰੀਆਂ ਨੂੰ ਵੀ ਖੁੱਲ੍ਹ ਕੇ ਬੋਲਣ ਲਈ ਕਿਹਾ। ਵੇਨ ਨੇ ਪੱਤਰ ਵਿਚ ਲਿਖਿਆ ਕਿ ਚੁੱਪਚਾਪ ਹੱਥ ਮਲਣ ਅਤੇ ਬੰਦ ਦਰਵਾਜ਼ਿਆਂ ਪਿੱਛੇ ਨਿਮਰਤਾ ਨਾਲ ਘੁਸਰ-ਮੁਸਰ ਕਰਨ ਦਾ ਸਮਾਂ ਬੀਤ ਚੁੱਕਾ ਹੈ, ਇਹ ਸਿਰਫ ਇੱਕ ਆਦਮੀ ਦਾ ਮਾਮਲਾ ਨਹੀਂ ਹੈ, ਇਹ ਪਾਰਟੀ ਨੂੰ ਇਤਿਹਾਸਕ ਹਾਰ ਤੋਂ ਬਚਾਉਣ ਦੀ ਗੱਲ ਹੈ। ਜਾਣਕਾਰੀ ਮੁਤਾਬਕ, ਹੋਰ ਮੌਜੂਦਾ ਤੇ ਸਾਬਕਾ ਐਮਪੀ ਨੇ ਵੀ ਨਿੱਜੀ ਤੌਰ ’ਤੇ ਟਰੂਡੋ ਦੇ ਅਸਤੀਫੇ ਦੀ ਮੰਗ ਕੀਤੀ ਹੈ।