ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਆਸੀਆਨ ਬੈਠਕ ’ਚ ਹਿੱਸਾ ਲੈਣ ਲਈ ਲਾਓਸ ਹੋਏ ਰਵਾਨਾ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਇਸ ਹਫ਼ਤੇ ਲਾਓਸ ਵਿੱਚ ਹਨ, ਜਿੱਥੇ ਉਹ ASEAN ਸਿਖਰ ਸੰਮੇਲਨ ਵਿੱਚ ਹਿਸ्सा ਲੈ ਰਹੇ ਹਨ। ਇਹ ਪਹਿਲੀ ਵਾਰ ਹੈ ਕਿ ਕਿਸੇ ਕੈਨੇਡੀਅਨ ਪ੍ਰਧਾਨ ਮੰਤਰੀ ਨੇ ਲਾਓਸ ਦਾ ਸਰਕਾਰੀ ਦੌਰਾ ਕੀਤਾ ਹੈ। ਸੰਮੇਲਨ ਵਿੱਚ ਦੱਖਣ-ਪੂਰਬੀ ਏਸ਼ੀਆ ਦੇ 10 ਮੈਂਬਰ ਦੇਸ਼ਾਂ ਦੇ ਨੇਤਾ ਖੇਤਰੀ ਸਹਿਯੋਗ ਅਤੇ ਵਪਾਰਕ ਮਾਮਲਿਆਂ ‘ਤੇ ਗੱਲਬਾਤ ਕਰਨਗੇ।

ਕੈਨੇਡਾ ASEAN ਦਾ ਮੈਂਬਰ ਨਹੀਂ ਹੈ, ਪਰ ਦੋਵੇਂ ਪੱਖਾਂ ਵਿਚਾਲੇ 2022 ਤੋਂ ਰਣਨੀਤਕ ਭਾਗੀਦਾਰੀ ਹੈ। ਓਟਾਵਾ 2026 ਤੱਕ ਇਸ ਗਠਜੋੜ ਨਾਲ ਮੁਫ਼ਤ ਵਪਾਰ ਸਮਝੌਤਾ ਪੂਰਾ ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਹੈ, ਜੋ ਕਿ ਕੈਨੇਡਾ ਦੀ ਇੰਡੋ-ਪੈਸਿਫ਼ਿਕ ਰਣਨੀਤੀ ਦਾ ਇੱਕ ਅਹਿਮ ਹਿੱਸਾ ਹੈ।

ਕੈਨੇਡਾ ਅਤੇ ਇੰਡੋਨੇਸ਼ੀਆ ਵਿਚਾਲੇ ਵੀ ਵੱਖਰਾ ਦੋਪੱਖੀ ਵਪਾਰਕ ਸਮਝੌਤਾ ਤਿਆਰ ਕੀਤਾ ਜਾ ਰਿਹਾ ਹੈ, ਜਿਸ ‘ਤੇ ਇਸ ਸਾਲ ਦੇ ਅੰਤ ਤੱਕ ਦਸਤਖ਼ਤ ਹੋਣ ਦੀ ਸੰਭਾਵਨਾ ਹੈ। 2023 ਵਿੱਚ ASEAN ਦੇਸ਼ ਕੈਨੇਡਾ ਦੇ ਚੌਥੇ-ਵੱਡੇ ਵਪਾਰਕ ਸਾਥੀ ਰਹੇ ਹਨ।

ਸੰਮੇਲਨ ਤੋਂ ਬਾਅਦ, ਟਰੂਡੋ ਜਰਮਨੀ ਜਾ ਰਹੇ ਹਨ, ਜਿੱਥੇ ਉਹ ਯੂਕਰੇਨ ਡਿਫ਼ੈਂਸ ਕਾਂਟੈਕਟ ਗਰੁੱਪ ਦੀ ਮੀਟਿੰਗ ਵਿੱਚ ਹਿੱਸਾ ਲੈਣਗੇ। ਇਸ ਬੈਠਕ ਦੀ ਅਗਵਾਈ ਅਮਰੀਕੀ ਰਾਸ਼ਟਰਪਤੀ ਜੋ ਬਾਇਡਨ ਕਰਨਗੇ।