ਪ੍ਰਧਾਨ ਮੰਤਰੀ ਕਾਰਨੀ ਨੇ ਹਾਊਸ ਆਫ਼ ਕਾਮਨਜ਼ ਵਿੱਚ ਪਹਿਲੀ ਵਾਰ ਪ੍ਰਸ਼ਨ ਕਾਲ ਦਾ ਕੀਤਾ ਸਾਹਮਣਾ

ਕੈਨੇਡੀਅਨ ਸੰਸਦ ਦੇ ਰੈਗੂਲਰ ਸੈਸ਼ਨ ਦੌਰਾਨ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਅੱਜ ਆਪਣੇ ਪਹਿਲੇ ਪ੍ਰਸ਼ਨ ਕਾਲ ਦਾ ਸਾਹਮਣਾ ਕੀਤਾ। ਕੰਜ਼ਰਵੇਟਿਵ ਪਾਰਟੀ ਦੇ ਹਾਊਸ ਲੀਡਰ ਐਂਡਰਿਊ ਸ਼ੀਅਰ ਨੇ ਪੀ. ਐੱਮ. 'ਤੇ ਗੁੱਪਚੁੱਪ ਤਰੀਕੇ ਨਾਲ ਅਮਰੀਕਾ ਖਿਲਾਫ ਟੈਰਿਫਸ ਨੂੰ ਜ਼ੀਰੋ ਕੀਤੇ ਜਾਣ ਦਾ ਇਲਜ਼ਾਮ ਲਗਾਇਆ।

ਸ਼ੀਅਰ ਨੇ ਕਿਹਾ ਕਿ ਚੋਣ ਕੰਪੇਨ ਦੌਰਾਨ ਤੁਸੀਂ ਬਾਹਾਂ ਕੱਢ ਕੇ ਕਹਿੰਦੇ ਸੀ ਕਿ ਅਮਰੀਕਾ ਖਿਲਾਫ ਜਵਾਬੀ ਟੈਰਿਫਸ ਤੋਂ ਸਰਕਾਰ 20 ਬਿਲੀਅਨ ਡਾਲਰ ਜੁਟਾਏਗੀ ਅਤੇ ਇਸ ਨਾਲ ਘਾਟੇ ਨੂੰ ਪੂਰਾ ਕੀਤਾ ਜਾਵੇਗਾ ਪਰ ਹੁਣ ਸੀਕ੍ਰੇਟ ਤਰੀਕੇ ਨਾਲ ਇਸ ਨੂੰ ਜ਼ੀਰੋ ਕਰ ਦਿੱਤਾ ਗਿਆ। ਉਨ੍ਹਾਂ ਸਵਾਲ ਕੀਤਾ ਕਿ ਸਰਕਾਰ ਦੱਸੇ ਕਿ ਕੀ ਘਾਟੇ ਦੀ ਭਰਪਾਈ ਲਈ ਸਰਕਾਰ ਉਧਾਰ ਚੁੱਕੇਗੀ ਜਾਂ ਹੋਰ ਪੈਸਾ ਪ੍ਰਿੰਟ ਕਰੇਗੀ।

ਉਥੇ ਹੀ ਪ੍ਰਧਾਨ ਮੰਤਰੀ ਨੇ ਜਵਾਬ ਵਿਚ ਕਿਹਾ ਕਿ ਸਾਡੇ ਟੈਰਿਫਸ ਦਾ ਅਮਰੀਕਾ 'ਤੇ ਜ਼ਿਆਦਾ ਪ੍ਰਭਾਵ ਪਿਆ ਹੈ ਅਤੇ ਅਸੀਂ ਟੈਰਿਫਸ ਤੋਂ ਮਿਲੇ ਸਾਰੇ ਰੈਵੇਨਿਊ ਨੂੰ ਵਰਕਰ ਅਤੇ ਕਾਰੋਬਾਰਾਂ ਦੀ ਸਪੋਰਟ ਲਈ ਵਰਤਣ ਜਾ ਰਹੇ ਹਾਂ।

ਗੌਰਤਲਬ ਹੈ ਕਿ ਸਰਕਾਰ ਨੇ ਮਾਰਚ ਵਿਚ ਲਗਭਗ 60 ਬਿਲੀਅਨ ਡਾਲਰ ਦੇ ਅਮਰੀਕੀ ਮਾਲ 'ਤੇ 25 ਫੀਸਦੀ ਜਵਾਬੀ ਟੈਰਿਫਸ ਲਗਾਇਆ ਸੀ, ਰਿਪੋਰਟਸ ਹਨ ਕਿ ਕੈਨੇਡਾ ਨੇ ਆਪਣੇ ਲਗਭਗ ਸਾਰੇ ਜਵਾਬੀ ਟੈਰਿਫਸ ਨੂੰ ਸਸਪੈਂਡ ਕਰ ਦਿੱਤਾ ਹੈ।