ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਵਲੋਂ ਕੈਨੇਡਾ ਭਰ ਦੇ ਪ੍ਰੀਮੀਅਰਾਂ ਨਾਲ ਕੀਤੀ ਜਾ ਰਹੀ ਹੈ ਬੈਠਕ

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਵਲੋਂ ਅੱਜ ਕੈਨੇਡਾ ਭਰ ਦੇ ਪ੍ਰੀਮੀਅਰਾਂ ਨਾਲ ਵਰਚੁਅਲੀ ਬੈਠਕ ਕੀਤੀ ਜਾ ਰਹੀ ਹੈ। ਇਹ ਲਗਾਤਾਰ ਦੂਜਾ ਦਿਨ ਹੈ ਜਦੋਂ ਕਾਰਨੀ ਨੇ ਟਰੰਪ ਦੇ ਟੈਰਿਫ 'ਤੇ ਪ੍ਰਤੀਕਿਰਿਆ ਦੇਣ ਬਾਰੇ ਚਰਚਾ ਕਰਨ ਲਈ ਆਪਣੇ ਚੋਣ ਪ੍ਰਚਾਰ ਨੂੰ ਮੁਲਤਵੀ ਕੀਤਾ।

ਕੇਅਰਟੇਕਰ ਕਨਵੈਨਸ਼ਨ ਨਿਯਮਾਂ ਤਹਿਤ ਕਾਰਨੀ ਨੂੰ ਚੋਣ ਕੰਪੇਨ ਦੌਰਾਨ ਪ੍ਰਧਾਨ ਮੰਤਰੀ ਦੀ ਹੈਸੀਅਤ ਨਾਲ ਕੰਮ ਕਰਨ ਦੀ ਇਜਾਜ਼ਤ ਹੈ ਪਰ ਉਹ ਅਜਿਹੇ ਮਾਮਲਿਆਂ ਤੱਕ ਹੀ ਸੀਮਤ ਰਹਿ ਸਕਦੇ ਹਨ,ਜੋ ਗੈਰ-ਵਿਵਾਦਿਤ ਜਾਂ ਜ਼ਰੂਰੀ ਅਤੇ ਜਨਤਕ ਹਿੱਤ ਵਿਚ ਹੋਣ। ਮੌਜੂਦਾ ਸਮੇਂ ਟੰਰਪ ਦੇ ਟੈਰਿਫ ਕੈਨੇਡਾ ਲਈ ਸਿੱਧੀਆਂ ਧਮਕੀਆਂ ਹਨ,ਜਿਸ ਕਾਰਨ ਕਾਰਨੀ ਚੋਣ ਕੰਪੇਨ ਦੌਰਾਨ ਪ੍ਰਧਾਨ ਮੰਤਰੀ ਵਜੋਂ ਫਰਜ਼ ਨਿਭਾ ਰਹੇ ਹਨ।

ਟਰੰਪ ਨੇ 2 ਅਪ੍ਰੈਲ ਤੋਂ ਆਟੋਮੋਬਾਈਲ ਅਤੇ ਆਟੋ ਪਾਰਟਸ ਆਯਾਤ 'ਤੇ 25 ਫੀਸਦੀ ਟੈਰਿਫ ਲਗਾਉਣ ਦੀ ਘੋਸ਼ਣਾ ਕੀਤੀ ਹੈ, ਇਹ ਠੀਕ ਉਸੇ ਦਿਨ ਹੈ ਜਦੋਂ ਕੈਨੇਡਾ ਸਮੇਤ ਦੁਨੀਆ ਭਰ ਦੇ ਆਯਾਤ 'ਤੇ ਗਲੋਬਲ ਰਿਸਪ੍ਰੋਸੀਕਲ ਟੈਰਿਫ ਵੀ ਲਾਗੂ ਹੋਣੇ ਹਨ। ਕੈਨੇਡਾ ਪਹਿਲਾਂ ਹੀ ਟਰੰਪ ਦੀਆਂ ਕਾਰਵਾਈਆਂ ਦੇ ਜਵਾਬ ਵਿਚ ਲਗਭਗ 60 ਬਿਲੀਅਨ ਡਾਲਰ ਦੇ ਅਮਰੀਕੀ ਸਾਮਾਨ 'ਤੇ ਟੈਰਿਫ ਲਗਾ ਚੁੱਕਾ ਹੈ ਅਤੇ ਕਾਰਨੀ ਨੇ ਟਰੰਪ ਦੇ ਆਟੋ ਟੈਰਿਫ ਨੂੰ ਕੈਨੇਡੀਅਨ ਵਰਕਰ 'ਤੇ ਸਿੱਧਾ ਹਮਲਾ ਦੱਸਦੇ ਹੋਏ ਜਲਦ ਹੋਰ ਜਵਾਬੀ ਕਾਰਵਾਈ ਕਰਨ ਦੀ ਗੱਲ ਆਖੀ ਹੈ।