ਪ੍ਰਧਾਨ ਮੰਤਰੀ ਟਰੂਡੋ ਵਲੋਂ ਅੱਜ ਔਟਵਾ ਵਿਚ ਕੈਨੇਡੀਅਨ ਮੇਅਰਾਂ ਨਾਲ ਕੀਤੀ ਗਈ ਬੈਠਕ

ਪ੍ਰਧਾਨ ਮੰਤਰੀ ਟਰੂਡੋ ਵਲੋਂ ਅੱਜ ਔਟਵਾ ਵਿਚ ਕੈਨੇਡੀਅਨ ਮੇਅਰਾਂ ਨਾਲ ਬੈਠਕ ਕੀਤੀ ਗਈ। ਇਹ ਬੈਠਕ ਕੈਨੇਡਾ-ਅਮਰੀਕਾ ਵਿਚਕਾਰ ਸੰਭਾਵਿਤ ਟੈਰਿਫ ਯੁੱਧ ਦੇ ਪ੍ਰਭਾਵਾਂ ਬਾਰੇ ਚਰਚਾ ਕਰਨ ਲਈ ਬੁਲਾਈ ਗਈ ਸੀ।

ਇਸ ਦੌਰਾਨ ਪ੍ਰਧਾਨ ਮੰਤਰੀ ਨੇ ਪੱਤਰਕਾਰਾਂ ਨਾਲ ਗੱਲ ਕੀਤੀ, ਜਿਸ ਵਿਚ ਉਨ੍ਹਾਂ ਕਿਹਾ ਕਿ ਫੈਂਟਾਨਾਇਲ ਦੇ ਤਸਕਰਾਂ ’ਤੇ ਸ਼ਿਕੰਜਾ ਕੱਸਣ ਲਈ ਕੈਨੇਡਾ ਪੂਰੇ ਜੀ ਜਾਨ ਨਾਲ ਅਮਰੀਕਾ ਨਾਲ ਸਹਿਮਤ ਹੈ ਕਿ ਇਹ ਨਸ਼ਾ ਧਰਤੀ ਤੋਂ ਖਤਮ ਹੋਣਾ ਚਾਹੀਦਾ ਹੈ ਅਤੇ ਇਸ ਦੀ ਤਸਕਰੀ ਕਰਨ ਵਾਲਿਆਂ ਨੂੰ ਗੰਭੀਰ ਸਜ਼ਾ ਮਿਲਣੀ ਚਾਹੀਦੀ ਹੈ।

ਟਰੂਡੋ ਨੇ ਕਿਹਾ ਕਿ ਕੈਨੇਡਾ ਇਸ ’ਤੇ ਕੰਮ ਕਰ ਰਿਹਾ ਹੈ ਅਤੇ ਇਸ ’ਤੇ ਪ੍ਰੋਗਰੈਸ ਵੀ ਹੋ ਰਹੀ ਹੈ ਪਰ ਨਾਲ ਹੀ ਜਵਾਬੀ ਪ੍ਰਸਤਾਵਿਤ ਟੈਰਿਫ ਦੀ ਤਿਆਰੀ ਨੂੰ ਪੂਰੀ ਤਰ੍ਹਾਂ ਨਾਕਾਰਿਆ ਨਹੀਂ ਗਿਆ ਹੈ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਜੇ ਟਰੰਪ ਟੈਰਿਫ ’ਤੇ ਅੱਗੇ ਵਧੇ ਤਾਂ ਕੈਨੇਡਾ ਇਸ ਦਾ ਜਵਾਬ ਦੇਵੇਗਾ।

ਗੌਰਤਲਬ ਹੈ ਕਿ ਟਰੰਪ ਨੇ ਪੀ.ਐੱਮ. ਟਰੂਡੋ ਤੋਂ ਬਾਰਡਰ ਸਕਿਓਰਟੀ ਦਾ ਭਰੋਸਾ ਮਿਲਣ ’ਤੇ ਟੈਰਿਫ ਨੂੰ ਕਰੀਬ ਇੱਕ ਮਹੀਨੇ ਲਈ ਟਾਲਿਆ ਹੈ, ਜਿਸ ’ਤੇ ਕੈਨੇਡਾ ਕੰਮ ਵੀ ਕਰ ਰਿਹਾ ਹੈ ਪਰ ਇਸ ਦੇ ਬਾਵਜੂਦ ਟਰੰਪ ਦੇ ਅੱਗੇ ਦੇ ਫੈਸਲੇ ਨੂੰ ਲੈ ਕੇ ਬੇਯਕੀਨੀ ਬਣੀ ਹੋਈ ਹੈ।