ਟਰੂਡੋ ਨੇ ਸ਼ੁੱਕਰਵਾਰ ਨੂੰ ਟੋਰੌਂਟੋ 'ਚ ਬੁਲਾਈ ਬੈਠਕ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਅਮਰੀਕੀ ਟੈਰਿਫ ਅਤੇ ਸੁਰੱਖਿਆਵਾਦ ਦੇ ਖ਼ਤਰੇ ਨਾਲ ਨਜਿੱਠਣ ਲਈ ਸ਼ੁੱਕਰਵਾਰ ਨੂੰ ਟੋਰੌਂਟੋ ਵਿਚ ਇੱਕ ਬੈਠਕ ਬੁਲਾਈ ਹੈ, ਜਿਸ ਵਿਚ ਅਮਰੀਕਾ ਤੋਂ ਇਲਾਵਾ ਕੈਨੇਡਾ ਦੇ ਵਪਾਰ ਲਈ ਹੋਰ ਬਾਜ਼ਾਰ ਤਲਾਸ਼ਣ ਅਤੇ ਆਰਥਿਕ ਵਿਕਾਸ ਤੇ ਨਿਵੇਸ਼ ਦੇ ਨਵੇਂ ਸਰੋਤ ਦੇ ਤਰੀਕੇ ਲੱਭਣ ਲਈ ਚਰਚਾ ਕੀਤੀ ਜਾਵੇਗੀ।

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਇਸ ਬੈਠਕ ਨੂੰ ਕੈਨੇਡਾ-ਯੂਐਸ ਇਕਨੌਮਿਕ ਸੰਮੇਲਨ ਨਾਮ ਦਿੱਤਾ ਹੈ। ਇਸ ਬੈਠਕ ਵਿਚ ਕੈਨੇਡਾ ਦੇ ਸੂਬਿਆਂ ਵਿਚਕਾਰ ਵਪਾਰਕ ਰੁਕਾਟਵਾਂ ਨੂੰ ਦੂਰ ਕਰਨ ਬਾਰੇ ਵੀ ਚਰਚਾ ਹੋਵੇਗੀ। ਇਸ ਬੈਠਕ ਵਿਚ ਕੈਨੇਡਾ-ਅਮਰੀਕਾ ਸਬੰਧਾਂ ਬਾਰੇ ਬਣਾਈ ਗਈ ਕੌਂਸਲ ਦੇ ਮੈਂਬਰ ਸ਼ਿਰਕਤ ਕਰਨਗੇ, ਜਿਸ ਵਿਚ ਵੱਖ-ਵੱਖ ਸੈਕਟਰ ਦੇ ਨੁਮਾਇੰਦੇ ਸ਼ਾਮਲ ਹਨ। ਇਹ ਬੈਠਕ ਇਸ ਲਈ ਮਹੱਤਵਪੂਰਨ ਹੈ ਕਿਉਂਕਿ ਟਰੰਪ ਨੇ ਟੈਰਿਫ ਵਿਚ ਥੋੜ੍ਹੇ ਸਮੇਂ ਲਈ ਰਾਹਤ ਦਿੱਤੀ ਹੈ ਅਤੇ ਕੈਨੇਡਾ ਖੁਦ ਨੂੰ ਹੁਣ ਕਿਸੇ ਵੀ ਬੇਯਕੀਨੀ ਵਾਲੇ ਮਾਹੌਲ ਵਿਚ ਨਹੀਂ ਰੱਖਣਾ ਚਾਹੁੰਦਾ।

ਪ੍ਰਧਾਨ ਮੰਤਰੀ ਦਫ਼ਤਰ ਦਾ ਕਹਿਣਾ ਹੈ ਕਿ ਦੇਸ਼ ਦੇ ਅੰਦਰ ਨਿਰਮਾਣ ਅਤੇ ਵਪਾਰ ਨੂੰ ਆਸਾਨ ਬਣਾਉਣ, ਐਕਸਪੋਰਟ ਲਈ ਨਵੇਂ ਬਾਜ਼ਾਰ ਤਲਾਸ਼ਣ ਅਤੇ ਉਤਪਾਦਕਤਾ ਵਿਚ ਵਾਧੇ ਲਈ ਇਸ ਬੈਠਕ ਵਿਚ ਤਰੀਕਿਆਂ ਦੀ ਪੜਚੋਲ ਕੀਤੀ ਜਾਵੇਗੀ। ਟਰੂਡੋ ਨੇ ਕਿਹਾ ਕਿ ਇਹ ਬੈਠਕ ਟੀਮ ਕੈਨੇਡਾ ਦੀ ਸਭ ਤੋਂ ਬੈਸਟ ਹੋਵੇਗੀ।