ਲਖੀਮਪੁਰ ਖੀਰੀ ਦੇ ਰਾਹ 'ਚ ਪ੍ਰਿਅੰਕਾ ਗਾਂਧੀ ਦੀ ਨਜ਼ਰਬੰਦੀ ਗ਼ੈਰ-ਕਾਨੂੰਨੀ ਅਤੇ ਸ਼ਰਮਨਾਕ: ਪੀ ਚਿਦੰਬਰਮ ਨੇ ਕੀਤੀ ਯੂਪੀ ਸਰਕਾਰ ਦੀ ਨਿਖੇਧੀ

ਕਾਂਗਰਸ ਦੇ ਸੀਨੀਅਰ ਨੇਤਾ ਪੀ ਚਿਦੰਬਰਮ ਨੇ ਅੱਜ ਮੰਗਲਵਾਰ ਨੂੰ ਉੱਤਰ ਪ੍ਰਦੇਸ਼ ਦੀ ਸਰਕਾਰ ਦੀ ਨਿੰਦਾ ਕਰਦਿਆਂ ਆਖਿਆ ਕਿ ਪਾਰਟੀ ਦੀ ਜਨਰਲ ਸਕੱਤਰ ਪ੍ਰਿਅੰਕਾ ਗਾਂਧੀ ਵਾਡਰਾ ਨੂੰ ਹਿਰਾਸਤ ਵਿੱਚ ਲੈਣਾ "ਪੂਰੀ ਤਰਾਂ ਗ਼ੈਰ-ਕਾਨੂੰਨੀ ਅਤੇ ਬੇਹੱਦ ਸ਼ਰਮਨਾਕ ਕਾਰਾ ਹੈ"।

ਪ੍ਰਿਅੰਕਾ ਗਾਂਧੀ ਨੂੰ ਸੋਮਵਾਰ ਨੂੰ ਲਖੀਮਪੁਰ ਖੀਰੀ ਜਾਂਦਿਆਂ ਰਾਹ 'ਚੋਂ ਹੀ ਨਜ਼ਰਬੰਦ ਕਰ ਲਿਆ ਗਿਆ ਸੀ।

"ਇਹ ਪੂਰੀ ਤਰਾਂ ਗ਼ੈਰ-ਕਾਨੂੰਨੀ ਅਤੇ ਬੇਹੱਦ ਸ਼ਰਮਨਾਕ ਹੈ। ਉਹਨਾਂ ਨੂੰ ਸਵੇਰੇ 4:30 ਵਜੇ, ਸੂਰਜ ਨਿਕਲਣ ਤੋਂ ਪਹਿਲਾਂ, ਮਰਦ ਪੁਲਿਸ ਅਫ਼ਸਰ ਵੱਲੋਂ ਗਿਰਫ਼ਤਾਰ ਕੀਤਾ ਗਿਆ ਸੀ। ਹਲੇ ਤੱਕ ਉਹਨਾਂ ਨੂੰ ਨਿਆਇਕ ਮੈਜਿਸਟਰੇਟ ਕੋਲ ਨਹੀਂ ਲਿਜਾਇਆ ਗਿਆ,"ਚਿਦੰਬਰਮ ਨੇ ਆਖਿਆ।

ਯੋਗੀ ਆਦਿਤਿਆਨਾਥ ਦੀ ਅਗਵਾਈ ਵਾਲੀ ਭਾਰਤੀ ਜਨਤਾ ਪਾਰਟੀ ਦੀ ਉੱਤਰ ਪ੍ਰਦੇਸ਼ ਸਰਕਾਰ ਨੂੰ ਕਰਦੇ ਹੱਥੀਂ ਲੈਂਦਿਆਂ, ਸੀਨੀਅਰ ਕਾਂਗਰਸ ਨੇਤਾ ਨੇ ਆਖਿਆ,"ਯੂਪੀ ਵਿੱਚ ਕਾਨੂੰਨ ਅਤੇ ਪ੍ਰਬੰਧ ਦਾ ਮਤਲਬ ਸ਼੍ਰੀ ਮਾਨ ਆਦਿਤਿਆਨਾਥ ਦੇ ਕਾਨੂੰਨ ਅਤੇ ਪ੍ਰਬੰਧ, ਜੋ ਕਿ ਕ੍ਰਿਮੀਨਲ ਪ੍ਰੋਸੀਜਰ ਕੋਡ ਨਹੀਂ ਹੈ।"

ਉਹਨਾਂ ਅੱਗੇ ਇਲਜ਼ਾਮ ਲਾਉਂਦਿਆਂ ਆਖਿਆ,"ਇਹ ਪ੍ਰਿਅੰਕਾ ਗਾਂਧੀ ਅਤੇ ਹੋਰ ਨਜ਼ਰਬੰਦ ਕੀਤੇ ਗਏ ਲੋਕਾਂ ਦੇ ਮੌਲਿਕ ਅਧਿਕਾਰਾਂ ਦਾ ਘਾਣ ਹੈ। ਸੀਐੱਮ ਯੋਗੀ ਆਦਿਤਿਆਨਾਥ ਅਤੇ ਭਾਜਪਾ, ਭਾਰਤ ਨੂੰ ਆਜ਼ਾਦੀ ਰਹਿਤ ਮੁਲਕ ਬਣਾ ਰਹੇ ਹਨ।"

ਉੱਤਰ ਪ੍ਰਦੇਸ਼ ਪੁਲਿਸ ਨੇ ਅੱਜ ਮੰਗਲਵਾਰ ਨੂੰ ਕਾਂਗਰਸ ਦੀ ਜਨਰਲ ਸਕੱਤਰ ਪ੍ਰਿਅੰਕਾ ਗਾਂਧੀ ਵਾਡਰਾ ਅਤੇ 11 ਹੋਰਾਂ ਖ਼ਿਲਾਫ਼, ਸੂਬੇ ਵਿੱਚ 'ਸ਼ਾਂਤੀ ਭੰਗ ਕਰਨ' ਦੇ ਮਾਮਲੇ 'ਚ ਮਾਮਲਾ ਦਰਜ ਕਰ ਲਿਆ ਹੈ।

ਹਰਗਾਓਂ ਪੁਲਿਸ ਥਾਣੇ ਦੇ ਐੱਸਐੱਚਓ ਬ੍ਰਿਜੇਸ਼ ਤ੍ਰਿਪਾਠੀ ਮੁਤਾਬਕ, ਪ੍ਰਿਅੰਕਾ ਗਾਂਧੀ, ਦੇਵਿੰਦਰ ਹੁੱਡਾ ਅਤੇ ਅਜੈ ਕੁਮਾਰ ਲਾਲੂ ਸਣੇ 11 ਖ਼ਿਲਾਫ਼, ਭਾਰਤੀ ਪੀਨਲ ਕੋਡ (ਆਈਪੀਸੀ) ਦੀ ਧਾਰਾ 107 /16 ਦੇ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਹੈ।

ਅੱਜ ਪਹਿਲਾਂ ਕਾਂਗਰਸ ਲੀਡਰ ਪ੍ਰਿਅੰਕਾ ਗਾਂਧੀ ਵਾਡਰਾ ਨੇ ਦਾਅਵਾ ਕੀਤਾ ਹੈ ਕਿ ਉਹਨਾਂ ਨੂੰ ਬਿਨਾ ਕਿਸੇ ਹੁਕਮ ਜਾਂ ਐੱਫਆਈਆਰ ਤੋਂ, ਬੀਤੇ 28 ਘੰਟਿਆਂ ਤੋਂ ਨਜ਼ਰਬੰਦ ਰੱਖਿਆ ਗਿਆ ਹੈ।
ਦੱਸਣਯੋਗ ਹੈ ਕਿ ਲੰਘੇ ਐਤਵਾਰ ਨੂੰ ਲਖੀਮਪੁਰ ਖੀਰੀ ਵਿੱਚ ਅੱਠ ਲੋਕਾਂ ਦੀ ਮੌਤ ਹੋਈ ਸੀ।

ਜ਼ਿਕਰਯੋਗ ਹੈ ਕਿ ਐਤਵਾਰ ਨੂੰ ਸੰਯੁਕਤ ਕਿਸਾਨ ਮੋਰਚੇ ਨੇ ਚਾਰ ਕਿਸਾਨਾਂ ਦੀ ਮੌਤ ਦੇ ਮਾਮਲੇ 'ਚ ਇਲਜ਼ਾਮ ਲਾਇਆ ਸੀ ਕਿ ਚਾਰਾਂ 'ਚੋਂ ਇੱਕ ਕਿਸਾਨ ਨੂੰ ਸੂਬੇ ਦੇ ਕੇਂਦਰੀ ਗ੍ਰਹਿ ਮੰਤਰੀ ਅਜੈ ਮਿਸ਼ਰਾ ਟੇਨੀ ਦੇ ਪੁੱਤਰ ਨੇ ਮਾਰਿਆ ਹੈ, ਜਦਕਿ ਦੂਜਿਆਂ 'ਤੇ ਉਸਦੇ ਕਾਫ਼ਲੇ ਦੀਆਂ ਗੱਡੀਆਂ ਚੜ੍ਹੀਆਂ ਸਨ।

ਇਸੇ ਦਰਮਿਆਨ, ਸੂਬਾਈ ਮੰਤਰੀ ਟੇਨੀ ਨੇ ਐੱਸਕੇਐੱਮ ਦੇ ਇਲਜ਼ਾਮਾਂ ਨੂੰ ਨਕਾਰਦਿਆਂ ਆਖਿਆ ਕਿ ਉਹਨਾਂ ਦਾ ਪੁੱਤਰ ਮੌਕਾ-ਏ-ਵਾਰਦਾਤ 'ਤੇ ਮੌਜੂਦ ਹੀ ਨਹੀਂ ਸੀ, ਇਸਦੇ ਨਾਲ ਹੀ ਉਨ੍ਹਾਂ ਆਖਿਆ ਕਿ ਕੁਝ ਸ਼ਰਾਰਤੀ ਅਨਸਰ ਕਿਸਾਨਾਂ ਵਿੱਚ ਰਲ ਗਏ ਸਨ ਅਤੇ ਉਹਨਾਂ ਨੇ ਗੱਡੀ 'ਤੇ ਪੱਥਰ ਸੁੱਟੇ ਸਨ, ਜਿਸ ਕਰਕੇ ਇਹ 'ਮੰਦਭਾਗਾ ਹਾਦਸਾ' ਵਾਪਰਿਆ।