13.95C Vancouver 13.95C VancouverMar 3, 2026 5:58 PM - Connect Newsroom - Jasmine Singh
ਕੇਲੋਨਾ ਆਰ.ਸੀ.ਐਮ.ਪੀ. ਨੇ ਸੂਬਾ ਸਰਕਾਰ ਦੀ ਸਪੈਸ਼ਲ ਇਨਵੈਸਟੀਗੇਸ਼ਨ ਐਂਡ ਟਾਰਗੇਟਡ ਇਨਫੋਰਸਮੈਂਟ ਫੰਡਿੰਗ ਦੀ ਮਦਦ ਨਾਲ 1 ਜੂਨ 2025 ਤੋਂ 15 ਜਨਵਰੀ 2026 ਵਿਚਕਾਰ ਸ਼ਹਿਰ ਵਿਚੋਂ ਵੱਡੀ ਮਾਤਰਾ ਵਿਚ ਗੈਰ-ਕਾਨੂੰਨੀ ਹਥਿਆਰ, ਨਸ਼ੀਲੇ ਪਦਾਰਥ ਅਤੇ $55,528 ਕੈਨੇਡੀਅਨ ਕਰੰਸੀ ਜ਼ਬਤ ਕੀਤੀ ਹੈ।
ਸੱਤ ਮਹੀਨਿਆਂ ਦੀ ਇਸ ਮੁਹਿੰਮ ਦੌਰਾਨ ਪੁਲਿਸ ਨੇ 121 ਵਿਅਕਤੀਆਂ ਨੂੰ ਗ੍ਰਿਫਤਾਰ ਕੀਤਾ, ਜਿਨ੍ਹਾਂ ਖਿਲਾਫ 163 ਚਾਰਜ ਲਗਾਉਣ ਦੀ ਸਿਫਾਰਸ਼ ਕੀਤੀ ਗਈ। ਆਰ.ਸੀ.ਐਮ.ਪੀ. ਮੁਤਾਬਕ, ਮੁਲਜ਼ਮਾਂ ਕੋਲੋਂ ਬਰਾਮਦ ਕੀਤੇ ਹਥਿਆਰਾਂ ਵਿਚ 4 ਹੈਂਡਗੰਨ, 9 ਨਕਲੀ ਜਾਂ ਦੇਸੀ ਪਿਸਤੌਲ ਅਤੇ ਇੱਕ ਰਾਈਫਲ ਸ਼ਾਮਲ ਸਨ। ਇਸ ਤੋਂ ਇਲਾਵਾ ਬੇਅ ਸਪਰੇਅ ਦੇ 12 ਕੈਨ, 24 ਚਾਕੂ, 2 machetes, ਇੱਕ ਤਲਵਾਰ ਅਤੇ ਇੱਕ ਟੇਜ਼ਰ ਜ਼ਬਤ ਕੀਤੇ ਗਏ।
ਉਥੇ ਹੀ, ਬਰਾਮਦ ਹੋਈ ਡਰੱਗ ਵਿਚ ਫੈਂਟਾਨਿਲ, ਭੰਗ ਅਤੇ ਮੈਥਾਮਫੇਟਾਮਾਈਨ ਵਰਗੇ ਨਸ਼ੇ ਸ਼ਾਮਲ ਸਨ। ਕੇਲੋਨਾ ਆਰ.ਸੀ.ਐਮ.ਪੀ. ਦੀ ਕ੍ਰਾਈਮ ਰਿਡਕਸ਼ਨ ਯੂਨਿਟ ਦੇ ਸਾਰਜੈਂਟ ਸਕਾਟ ਪਾਉਰੀ ਨੇ ਕਿਹਾ ਕਿ ਅਪਰਾਧ ਦੀ ਕਮਾਈ ਨਾਲ ਖਰੀਦੀਆਂ ਦੋ ਗੱਡੀਆਂ ਵੀ ਜ਼ਬਤ ਕੀਤੀਆਂ ਗਈਆਂ।
ਉਨ੍ਹਾਂ ਕਿਹਾ ਕਿ ਸਰਕਾਰ ਦੀ ਇਸ ਫੰਡਿੰਗ ਨੇ ਸਾਨੂੰ ਅਪਰਾਧੀਆਂ 'ਤੇ ਸਿੱਧਾ ਹਮਲਾ ਕਰਨ ਅਤੇ ਜਨਤਕ ਸੁਰੱਖਿਆ ਨੂੰ ਮਜ਼ਬੂਤ ਕਰਨ ਵਿਚ ਵੱਡੀ ਮਦਦ ਦਿੱਤੀ ਹੈ ਅਤੇ ਇਸ ਮੁਹਿੰਮ ਦੀ ਸਫਲਤਾ ਨੂੰ ਦੇਖਦੇ ਕੇਲੋਨਾ ਆਰ.ਸੀ.ਐਮ.ਪੀ. ਨੇ ਕੇਲੋਨਾ ਗੈਂਗ ਇਨਫੋਰਸਮੈਂਟ ਟੀਮ ਦਾ ਗਠਨ ਕੀਤਾ ਹੈ।
