ਕੈਨੇਡਾ 'ਚ ਵਿਦੇਸ਼ੀ ਦਖ਼ਲ ਦਾ ਟਾਰਗੇਟ ਹੋਏ ਸਿਆਸਤਦਾਨ ਅੱਜ ਜਾਂਚ ਕਮਿਸ਼ਨ ਸਾਹਮਣੇ ਹੋਣਗੇ ਪੇਸ਼

ਕੈਨੇਡੀਅਨ ਸਿਆਸਤ ਵਿਚ ਵਿਦੇਸ਼ੀ ਦਖ਼ਲ ਦੀ ਜਾਂਚ ਕਰ ਰਹੇ ਕਮਿਸ਼ਨ ਵਲੋਂ ਬੁੱਧਵਾਰ ਨੂੰ ਉਨ੍ਹਾਂ ਮੌਜੂਦਾ ਅਤੇ ਸਾਬਕਾ ਸਿਆਸਤਦਾਨਾਂ ਦੀਆਂ ਦਲੀਲਾਂ ਸੁਣੀਆਂ ਜਾ ਰਹੀਆਂ ਹਨ, ਜਿਨ੍ਹਾਂ ਦਾ ਕਹਿਣਾ ਸੀ ਕਿ ਉਹ ਚੀਨ ਵਲੋਂ ਵਿਦੇਸ਼ੀ ਦਖ਼ਲ ਦਾ ਸ਼ਿਕਾਰ ਹੋਏ ਹਨ। ਇਨ੍ਹਾਂ ਵਿਚ ਕੰਜ਼ਰਵੇਟਿਵ ਪਾਰਟੀ ਦੇ ਸਾਬਕਾ ਲੀਡਰ ਏਰਿਨ ਓ'ਟੂਲ, ਕੰਜ਼ਰਵੇਟਿਵ ਐਮ.ਪੀ ਮਾਈਕਲ ਚੋਂਗ ਅਤੇ ਨਿਊ ਡੈਮੋਕਰੇਟ ਐਮ.ਪੀ ਜੈਨੀ ਕਵਾਨ ਸ਼ਾਮਲ ਹਨ।

ਵਿਦੇਸ਼ੀ ਦਖ਼ਲ ਦੀ ਇਹ ਲੇਟਸਟ ਕੇਂਦਰੀ ਜਾਂਚ ਏਜੰਸੀਆਂ ਦੀ ਵਿਦੇਸ਼ੀ ਦਖ਼ਲ ਦਾ ਪਤਾ ਲਗਾਉਣ ਦੀ ਸਮਰਥਾ, ਉਸ ਨੂੰ ਰੋਕਣ ਅਤੇ ਉਸ ਦਾ ਮੁਕਾਬਲਾ ਕਰਨ ਦੀ ਸਮਰੱਥਾ 'ਤੇ ਕੇਂਦਰਿਤ ਹੈ। ਇਹ ਜਾਂਚ 16 ਅਕਤੂਬਰ ਤੱਕ ਚੱਲੇਗੀ। ਇਸ ਤੋਂ ਬਾਅਦ ਕਮਿਸ਼ਨ 21 ਅਕਤੂਬਰ ਤੋਂ ਇੱਕ ਹਫ਼ਤੇ ਤੱਕਨੀਤੀ ਸਲਾਹ-ਮਸ਼ਵਰੇ ਸਮੇਤ ਮਾਹਰ ਤੋਂ ਵਿਦੇਸ਼ੀ ਦਖ਼ਲ ਨੂੰ ਰੋਕਣ ਸਬੰਧੀ ਸੁਝਾਵਾਂ ਲਈ ਕਈ ਬੈਠਕਾਂ ਕਰੇਗਾ ਅਤੇ ਇਸ ਜਾਂਚ ਦੀ ਅੰਤਿਮ ਰਿਪੋਰਟ ਦਸੰਬਰ ਦੇ ਅੰਤ ਵਿਚ ਜਾਰੀ ਕੀਤੀ ਜਾਵੇਗੀ।

ਗੌਰਤਲਬ ਹੈ ਕਿ ਏਰਿਨ ਓ'ਟੂਲ ਨੇ ਵਿਦੇਸ਼ੀ ਦਖ਼ਲ ਦੀ ਪਿਛਲੀ ਜਾਂਚ ਵਿਚ ਕਮਿਸ਼ਨ ਨੂੰ ਕਿਹਾ ਸੀ ਕਿ ਚੀਨ ਨੇ 2021 ਦੀਆਂ ਚੋਣਾਂ ਤੋਂ ਪਹਿਲਾਂ ਉਨ੍ਹਾਂ ਨੂੰ ਬਦਨਾਮ ਕਰਨ ਅਤੇ ਵੋਟਾਂ ਤੋੜਨ ਲਈ ਟਾਰਗੇਟ ਕੀਤਾ ਸੀ, ਜਿਸ ਕਾਰਨ ਉਨ੍ਹਾਂ ਨੂੰ ਟਰੂਡੋ ਦੀ ਲਿਬਰਲ ਪਾਰਟੀ ਤੋਂ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ।