ਪੁਤਿਨ ਸ਼ਾਂਤੀ ਸਥਾਪਿਤ ਕਰਨ ਲਈ ਗੰਭੀਰ ਨਹੀਂ ਹਨ: ਜ਼ੇਲੈਂਸਕੀ

ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਲਡ ਟਰੰਪ ਵਲੋਂ ਰੂਸ ਅਤੇ ਯੂਕਰੇਨ ਵਿਚਕਾਰ ਜਲਦ ਸੀਜ਼ਫਾਇਰ ਕਰਵਾਉਣ ਦੇ ਦਾਅਵੇ ਵਿਚਕਾਰ ਵੋਲੋਦੀਮੀਰ ਜ਼ੇਲੈਂਸਕੀ ਨੇ ਰੂਸ 'ਤੇ ਯੂਕਰੇਨ ਵਿਚ ਆਪਣੀ ਜੰਗ ਜਾਰੀ ਰੱਖਣ ਲਈ ਸਮਾਂ ਖਿੱਚਣ ਦੀ ਕੋਸ਼ਿਸ਼ ਕਰਨ ਦਾ ਦੋਸ਼ ਲਗਾਇਆ ਹੈ। ਜ਼ੇਲੈਂਸਕੀ ਨੇ ਕਿਹਾ ਕਿ ਪੁਤਿਨ ਸ਼ਾਂਤੀ 'ਤੇ ਅੱਗੇ ਵਧਣ ਲਈ ਗੰਭੀਰ ਨਹੀਂ ਹਨ।

ਗੌਰਤਲਬ ਹੈ ਕਿ ਟਰੰਪ ਨੇ ਇੱਕ ਦਿਨ ਪਹਿਲਾਂ ਹੀ ਦੋਹਾਂ ਨੇਤਾਵਾਂ ਨਾਲ ਵੱਖ-ਵੱਖ ਫੋਨ ਕਾਲਾਂ ਤੋਂ ਬਾਅਦ ਇੱਕ ਬਿਆਨ ਵਿਚ ਕਿਹਾ ਸੀ ਕਿ ਰੂਸ ਅਤੇ ਯੂਕਰੇਨ ਸੀਜ਼ਫਾਇਰ ਲਈ ਜਲਦ ਗਲੱਬਾਤ ਸ਼ੁਰੂ ਕਰਨਗੇ। ਉਥੇ ਹੀ, ਪੁਤਿਨ ਨੇ ਕਿਹਾ ਸੀ ਕਿ ਉਹ ਭਵਿੱਖ ਵਿਚ ਸੰਭਾਵਿਤ ਸ਼ਾਂਤੀ ਸਮਝੌਤੇ 'ਤੇ ਗੱਲਬਾਤ ਲਈ ਤਿਆਰ ਹਨ ਪਰ ਉਨ੍ਹਾਂ ਨੇ ਜੰਗ ਵਿਚ ਜਲਦ 30 ਦਿਨਾਂ ਵਿਰਾਮ ਦੀ ਮੰਗ ਦਾ ਕੋਈ ਜਵਾਬ ਨਹੀਂ ਦਿੱਤਾ।

ਇਸ ਵਿਚਕਾਰ ਜ਼ੇਲੈਂਸਕੀ ਨੇ ਕੂਟਨੀਤਕ ਸਮਰਥਨ ਜੁਟਾਉਣ ਲਈ ਪੱਛਮੀ ਮੁਲਕਾਂ ਕੋਲ ਪਹੁੰਚ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਯੂਕਰੇਨ ਆਪਣੇ ਭਾਈਵਾਲਾਂ ਨਾਲ ਗੱਲ ਕਰ ਰਿਹਾ ਹੈ ਤਾਂ ਜੋ ਮਾਸਕੋ 'ਤੇ ਦਬਾਅ ਪਾਇਆ ਜਾ ਸਕੇ।