ਕਿਊਬੈਕ ਵਿਚ ਹੁਣ ਨਵੇਂ ਬਣਨ ਵਾਲੇ ਡਾਕਟਰਾਂ ਲਈ ਸਖ਼ਤ ਹੋਏ ਨਿਯਮ

ਕਿਊਬੈਕ ਵਿਚ ਹੁਣ ਨਵੇਂ ਬਣਨ ਵਾਲੇ ਡਾਕਟਰਾਂ ਲਈ ਸਖਤ ਨਿਯਮ ਆ ਰਹੇ ਹਨ। ਸੂਬਾ ਸਰਕਾਰ ਦਾ ਕਹਿਣਾ ਹੈ ਕਿ ਉਹ ਕਿਊਬੈਕ ਵਿਚ ਸਿਖਲਾਈ ਪ੍ਰਾਪਤ ਨਵੇਂ ਡਾਕਟਰਾਂ ਨੂੰ ਉਨ੍ਹਾਂ ਦੇ ਅਭਿਆਸ ਦੇ ਪਹਿਲੇ ਸਾਲਾਂ ਦੌਰਾਨ ਸੂਬੇ ਦੇ ਜਨਤਕ ਸਿਹਤ-ਸੰਭਾਲ ਸਿਸਟਮ ਵਿਚ ਕੰਮ ਕਰਨਾ ਲਾਜ਼ਮੀ ਕਰਨ ਜਾ ਰਹੀ ਹੈ। ਸੂਬੇ ਦੇ ਸਿਹਤ ਮੰਤਰੀ ਕ੍ਰਿਸ਼ਚੀਅਨ ਦੂਬੇ ਨੇ ਸੋਮਵਾਰ ਸਵੇਰ ਕਿਹਾ ਕਿ ਜੋ ਨਵੇਂ ਡਾਕਟਰ ਕਿਊਬੈਕ ਛੱਡਣਾ ਚਾਹੁੰਦੇ ਹਨ ਜਾਂ ਪ੍ਰਾਈਵੇਟ ਸਿਸਟਮ ਵਿਚ ਕੰਮ ਕਰਨਾ ਚਾਹੁੰਦੇ ਹਨ ਉਨ੍ਹਾਂ ਨੂੰ ਇਸ ਦੇ ਗੰਭੀਰ ਨਤੀਜੇ ਭੁਗਤਣੇ ਪੈਣਗੇ।

ਮੰਤਰੀ ਨੇ ਕਿਹਾ ਕਿ ਉਹ ਨਵੇਂ ਪਰਿਵਾਰਕ ਡਾਕਟਰ ਅਤੇ ਮਾਹਰ ਡਾਕਟਰ ਨੂੰ ਕਿਊਬੈਕ ਵਿਚ ਆਪਣਾ ਲਾਜ਼ਮੀ ਤੌਰ ’ਤੇ ਕਰੀਅਰ ਸ਼ੁਰੂ ਕਰਨ ਵਾਸਤੇ ਇੱਕ ਬਿੱਲ ਲਿਆਉਣ ਦੀ ਯੋਜਨਾ ਬਣਾ ਰਹੇ ਹਨ।

ਸਰਕਾਰ ਦਾ ਕਹਿਣਾ ਹੈ ਕਿ ਇੱਕ ਡਾਕਟਰ ਨੂੰ ਪੂਰੀ ਤਰ੍ਹਾਂ ਤਿਆਰ ਕਰਨ ਵਿਚ $435,000 ਤੋਂ $790,000 ਤੱਕ ਦਾ ਖ਼ਰਚ ਆਉਂਦਾ ਹੈ, ਜਿਸ ਵਿਚ ਉਨ੍ਹਾਂ ਦੀ ਰਿਹਾਇਸ਼ ਦੌਰਾਨ ਦਾ ਖ਼ਰਚ ਵੀ ਸ਼ਾਮਲ ਹੈ, ਜਦੋਂ ਕਿ 2020 ਤੋਂ ਵਿਸ਼ੇਸ਼ ਰੂਪ ਤੋਂ ਪ੍ਰਾਈਵੇਟ ਸਿਸਟਮ ਵਿਚ ਕੰਮ ਕਰਨ ਵਾਲੇ ਡਾਕਟਰਾਂ ਦੀ ਗਿਣਤੀ 70 ਫੀਸਦੀ ਵਧੀ ਹੈ ਅਤੇ ਇਹ ਰੁਝਾਨ ਖਾਸ ਤੌਰ ’ਤੇ ਨਵੇਂ ਡਾਕਟਰਾਂ ਵਿਚ ਹੈ।

ਹਾਲਾਂਕਿ, ਸੂਬਾ ਸਰਕਾਰ ਨੇ ਇਹ ਨਹੀਂ ਦੱਸਿਆ ਕਿ ਨਵੇਂ ਡਾਕਟਰਾਂ ਨੂੰ ਕਿਊਬੈਕ ਵਿਚ ਕਿੰਨਾ ਸਮਾਂ ਰਹਿਣਾ ਪਵੇਗਾ ਜਾਂ ਜੇ ਉਹ ਸੂਬਾ ਛੱਡਦੇ ਹਨ ਤਾਂ ਕੀ ਕਾਰਵਾਈ ਹੋਵੇਗੀ।