ਕਿਊਬੈਕ ਔਰਤ ਨੇ ਆਈ.ਐਸ.ਆਈ.ਐਸ ਨੂੰ ਹਿਮਾਇਤ ਦੇਣ ਬਦਲੇ ਮੰਗੀ ਮੁਆਫੀ

ਕੈਨੇਡਾ ਦੀ ਇੱਕ ਔਰਤ ਨੂੰ ਆਈ.ਐਸ.ਆਈ.ਐਸ.ਵਿੱਚ ਸ਼ਾਮਲ ਹੋਣ ਅਤੇ ਅੱਤਵਾਦ ਦੇ ਅਪਰਾਧ ਦੇ ਦੋਸ਼ਾਂ ਤਹਿਤ ਸਜ਼ਾ ਸੁਣਾਈ ਗਈ ਹੈ। 29 ਸਾਲਾ ਓਮੈਮਾ ਚੌਏ ਕੈਨੇਡਾ ਦੇ ਕਿਊਬੈਕ ਦੀ ਨਿਵਾਸੀ ਹੈ। ਚੌਏ ਨੇ ਕੈਨੇਡਾ ਤੋਂ ਸੀਰੀਆ ਦੀ ਯਾਤਰਾ ਕਰਨ ਅਤੇ ਇੱਕ ਅੱਤਵਾਦੀ ਸਮੂਹ ਦੇ ਮੈਂਬਰ ਨਾਲ ਵਿਆਹ ਕਰਨ ਦੀ ਗੱਲ ਨੂੰ ਸਵੀਕਾਰ ਕੀਤਾ।

ਸੋਮਵਾਰ ਨੂੰ ਕਿਊਬੈਕ ਦੀ ਅਦਾਲਤ ਨੇ ਉਸ ਨੂੰ ਇਸਲਾਮਿਕ ਸਟੇਟ ਆਫ਼ ਇਰਾਕ ਐਂਡ ਸੀਰੀਆ ਦੀਆਂ ਗਤੀਵਿਧੀਆਂ ਵਿੱਚ ਹਿੱਸਾ ਲੈਣ ਦਾ ਦੋਸ਼ੀ ਠਹਿਰਾਇਆ ਹੈ। ਅਦਾਲਤ ਨੇ ਉਸ ਨੂੰ ਤਿੰਨ ਸਾਲ ਦੀ ਪ੍ਰੋਬੇਸ਼ਨ ਦੀ ਸਜ਼ਾ ਸੁਣਾਈ ਹੈ। ਇਸ ਤੋਂ ਪਹਿਲਾਂ ਚੌਏ ਪ੍ਰੀ-ਟਰਾਇਲ ਹਿਰਾਸਤ ਵਿੱਚ 110 ਦਿਨ ਬਿਤਾ ਚੁੱਕੀ ਹੈ।

ਉਸ ਵਲੋਂ ਕੀਤੇ ਗਏ ਪਛਤਾਵੇ ਅਤੇ ਦਿਖਾਈ ਗਈ ਵਚਨਬੱਧਤਾ ਦੇ ਮੱਦੇਨਜ਼ਰ ਉਸ ਨੂੰ ਕੈਨੇਡੀਅਨ ਸਮਾਜ ਲਈ ਖ਼ਤਰੇ ਦੇ ਤੌਰ ‘ਤੇ ਨਹੀਂ ਦੇਖਿਆ ਜਾ ਰਿਹਾ। 25 ਅਕਤੂਬਰ 2022 ਨੂੰ ਮਾਂਟਰੀਅਲ ਦੇ ਅੰਤਰਰਾਸ਼ਟਰੀ ਹਵਾਈ ਅੱਡੇ ‘ਤੇ ਸੀਰੀਆ ਵਿੱਚ ਆਈ.ਐਸ.ਆਈ.ਐਸ. ਕੈਂਦੀਆਂ ਦੇ ਇੱਕ ਕੈਂਪ 'ਚੋਂ ਨਿਕਲ ਕੇ ਚੌਏ ਆਪਣੇ ਦੋ ਬੱਚਿਆਂ ਸਮੇਤ ਪਹੁੰਚੀ ਸੀ। ਜਿੱਥੇ ਆਰ.ਸੀ.ਐਮ.ਪੀ.ਨੇ ਉਸ ਨੂੰ ਗ੍ਰਿਫਤਾਰ ਕਰ ਲਿਆ ਸੀ।