14.77C Vancouver 14.77C VancouverJul 2, 2020 9:27 PM -
ਬੀ.ਸੀ. ਦੇ ਪ੍ਰੀਮਿਅਰ ਨੇ ਅਮਰੀਕਾ ਤੋਂ ਆਉਂਦੇ ਉਨ੍ਹਾਂ ਲੋਕਾਂ ਨੂੰ ਇੱਕ ਸੁਨੇਹਾ ਦਿੱਤਾ ਹੈ ਜੋ ਅਲਾਸਕਾ ਪਹੁੰਚਣ ਲਈ ਬਾਰਡਰ ਪਾਰ ਕਰਦੇ ਹਨ।
ਜੌਨ ਹੌਰਗਨ ਨੇ ਕਿਹਾ ਕਿ ਅਮਰੀਕਾ 'ਚ ਵਧਦੇ ਕੋਵਿਡ-19 ਦੇ ਮਾਮਲਿਆਂ ਦੇ ਮੱਦੇਨਜ਼ਰ, ਇਹ ਲੋਕ ਸੂਬੇ 'ਚ ਨਾ ਰੁਕਣ ਅਤੇ ਆਪਣੀ ਯਾਤਰਾ ਪੂਰੀ ਕਰਨ।
ਪ੍ਰੀਮਿਅਰ ਨੇ ਕਿਹਾ ਕਿ ਉਨ੍ਹਾਂ ਸੂਬੇ 'ਚ ਕਈ ਜਗ੍ਹਾ ਤੋਂ ਇਹ ਸੁਣਿਆ ਹੈ ਕਿ ਕਈ ਅਮਰੀਕੀਆਂ ਨੇ ਆਪਣੀ ਯਾਤਰਾ ਜਾਰੀ ਨਹੀਂ ਰੱਖੀ ਅਤੇ ਵੈਨਕੂਵਰ ਜਾਂ ਵੈਨਕੂਵਰ ਆਈਲੈਂਡ 'ਤੇ ਰੁਕਣ ਦਾ ਫੈਸਲਾ ਲਿਆ।
ਉਨ੍ਹਾਂ ਕਿਹਾ ਕਿ ਅਜਿਹਾ ਕਰਨਾ ਬੀ.ਸੀ. ਵਾਸੀਆਂ ਲਈ ਖਤਰਾ ਵਧਾ ਸਕਦਾ ਹੈ। ਹੌਰਗਨ ਨੇ ਕਿਹਾ ਕਿ ਉਨ੍ਹਾਂ ਡਿਪਟੀ ਪ੍ਰਧਾਨ ਮੰਤਰੀ ਕ੍ਰਿਸਟੀਆ ਫ੍ਰੀਲੈਂਡ ਨਾਲ ਵੀ ਗੱਲ ਕੀਤੀ ਹੈ।
ਉਨ੍ਹਾਂ ਕਿਹਾ ਕਿ ਇਸ ਮਸਲੇ ਨੂੰ ਅਮਰੀਕਾ ਨਾਲ ਉਠਾਉਣ ਦੀ ਸਲਾਹ ਦਿੱਤੀ ਗਈ ਹੈ।
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਵੀ ਜੂਨ 'ਚ ਦਿੱਤੇ ਇੱਕ ਬਿਆਨ ਦੌਰਾਨ ਕਿਹਾ ਸੀ ਕਿ ਉਨ੍ਹਾਂ ਕੋਲ ਵੀ ਅਜਿਹੀਆਂ ਰਿਪੋਰਟਸ ਪਹੁੰਚੀਆਂ ਸਨ, ਅਮਰੀਕਾ ਵੱਲੋਂ ਆਉਂਦੇ ਕੁਝ ਲੋਕ, ਬਾਰਡਰ ਟੱਪਣ ਸੰਬੰਧੀ ਪਬੰਦੀਆਂ ਦਾ ਧਿਆਨ ਨਹੀਂ ਰੱਖ ਰਹੇ ਸਨ।
ਪ੍ਰੀਮਿਅਰ ਦਾ ਕਹਿਣਾ ਹੈ ਕਿ ਬੀ.ਸੀ. ਨੇ ਬੜੀ ਕੋਸ਼ਿਸ਼ਾਂ ਤੋਂ ਬਾਅਦ, ਇਨਫੈਕਸ਼ਨ ਦੇ ਮਾਮਲਿਆਂ ਨੂੰ ਘੱਟ ਰੱਖਣ 'ਚ ਕਾਮਯਾਬੀ ਹਾਸਿਲ ਕੀਤੀ ਹੈ ਅਤੇ ਇਸ ਨੂੰ ਕਿਸੇ ਦੀ ਗਲਤੀ ਕਾਰਨ ਗਵਾਇਆ ਨਹੀਂ ਜਾ ਸਕਦਾ।
ਯਾਦ ਰਹੇ ਕੈਨੇਡਾ ਅਤੇ ਅਮਰੀਕਾ ਵਿਚਾਲੇ ਦੇ ਬਾਰਡਰ ਨੂੰ ਆਮ ਆਵਾਜਾਈ ਲਈ ਮਾਰਚ ਵਿੱਚ ਬੰਦ ਕਰ ਦਿੱਤਾ ਗਿਆ ਸੀ, ਪਰ ਇਸ ਵਿੱਚ ਕੁਝ ਢਿੱਲ ਦਿੱਤੀ ਗਈ ਸੀ, ਜਿਸ ਦੇ ਵਿੱਚ ਅਲਾਸਕਾ ਦੀ ਯਾਤਰਾ ਦੀ ਇਜਾਜ਼ਤ ਸ਼ਾਮਿਲ ਸੀ।
