ਵਿਦੇਸ਼ ਵਿਚ ਹਾਦਸੇ ’ਚ ਜ਼ਖਮੀ ਹੋਏ ਨੌਜਵਾਨ ਦੇ ਘਰ ਕਰਨਾਲ ਪੁੱਜੇ ਰਾਹੁਲ ਗਾਂਧੀ

ਪੰਜਾਬ ਦੇ ਗੁਆਂਢੀ ਸੂਬੇ ਹਰਿਆਣਾ ਵਿਚ ਵਿਧਾਨ ਸਭਾ ਚੋਣਾਂ ਦਾ ਅਖਾੜਾ ਭਖਿਆ ਹੋਇਆ ਹੈ। ਇਸ ਵਿਚਕਾਰ ਸ਼ੁੱਕਰਵਾਰ ਸਵੇਰ ਰਾਹੁਲ ਗਾਂਧੀ ਅਚਾਨਕ ਕਰਨਾਲ ਪਹੁੰਚੇ, ਜਿੱਥੇ ਉਨ੍ਹਾਂ ਨੇ ਇੱਕ ਨੌਜਵਾਨ ਦੇ ਪਰਿਵਾਰ ਨਾਲ ਮੁਲਾਕਾਤ ਕੀਤੀ, ਜਿਸ ਨੂੰ ਉਹ ਅਮਰੀਕਾ ਦੌਰੇ ’ਤੇ ਮਿਲੇ ਸਨ।

ਰਾਹੁਲ ਗਾਂਧੀ ਨੇ ਅਮਰੀਕਾ ਵਿਚ ਟਰੱਕ ਡਰਾਈਵਰ ਅਮਿਤ ਕੁਮਾਰ ਨੂੰ ਮਿਲਣ ਸਮੇਂ ਹਰਿਆਣਾ ਵਿਚ ਉਸ ਦੇ ਪਰਿਵਾਰ ਨਾਲ ਮੁਲਾਕਾਤ ਦਾ ਵਾਅਦਾ ਕੀਤਾ ਸੀ। ਅਮਿਤ ਕੁਮਾਰ ਦਾ ਹਾਲ ਹੀ ਵਿਚ ਅਮਰੀਕਾ ਵਿਚ ਐਕਸੀਡੈਂਟ ਹੋ ਗਿਆ ਸੀ।

ਖਾਸ ਗੱਲ ਇਹ ਹੈ ਕਿ ਰਾਹੁਲ ਗਾਂਧੀ ਦੇ ਕਰਨਾਲ ਦੌਰੇ ਦੀ ਖ਼ਬਰ ਨਾ ਤਾਂ ਸਥਾਨਕ ਕਾਂਗਰਸ ਨੂੰ ਸੀ ਅਤੇ ਨਾ ਹੀ ਪ੍ਰਸ਼ਾਸਨ ਨੂੰ। ਜਦੋਂ ਤੱਕ ਕਾਂਗਰਸ ਨੇਤਾ ਉਨ੍ਹਾਂ ਨੂੰ ਮਿਲਣ ਲਈ ਪਹੁੰਚਦੇ ਉਹ ਉੱਥੋਂ ਨਿਕਲ ਚੁੱਕੇ ਸਨ।