ਬੈਂਫ 'ਚ ਚੱਟਾਨ ਡਿੱਗਣ ਕਾਰਨ ਜਾਨ ਗੁਆਉਣ ਵਾਲੇ ਦੂਜੇ ਵਿਅਕਤੀ ਦੀ ਸਰੀ ਵਾਸੀ ਵਜੋਂ ਹੋਈ ਪਛਾਣ

ਐਲਬਰਟਾ ਦੀ ਬੈਂਫ ਨੈਸ਼ਨਲ ਪਾਰਕ ਵਿਚ ਚੱਟਾਨ ਖਿਸਕਣ ਕਾਰਨ ਜਾਨ ਗੁਆਉਣ ਵਾਲੇ ਇੱਕ ਮ੍ਰਿਤਕ ਦੀ ਪਛਾਣ ਸਰੀ ਦੇ 33 ਸਾਲਾ ਨੌਜਵਾਨ ਵਜੋਂ ਹੋਈ ਹੈ। ਉਸ ਦੀ ਲਾਸ਼ ਘਟਨਾ ਤੋਂ ਕੁਝ ਘੰਟੇ ਬਾਅਦ 20 ਜੂਨ ਦੀ ਸਵੇਰ ਨੂੰ ਬਰਾਮਦ ਕੀਤਾ ਗਈ ਸੀ। ਮ੍ਰਿਤਕ ਦਾ ਨਾਮ ਜਾਰੀ ਨਹੀਂ ਕੀਤਾ ਗਿਆ ਅਤੇ ਪੁਲਿਸ ਦਾ ਕਹਿਣਾ ਹੈ ਕਿ ਇਸ ਸਬੰਧੀ ਹੋਰ ਕੋਈ ਜਾਣਕਾਰੀ ਜਨਤਕ ਨਹੀਂ ਕੀਤੀ ਜਾਵੇਗੀ।

ਬੋਅ ਗਲੇਸ਼ੀਅਰ ਫਾਲਸ ਕੋਲ ਚੱਟਾਨ ਖਿਸਕਣ ਵਿਚ ਮਾਰੀ ਗਈ ਦੂਜੀ ਮ੍ਰਿਤਕ ਦੀ ਪਛਾਣ 70 ਸਾਲਾ ਜੁਟਾ ਹਿਨਰਿਕਸ ਵਜੋਂ ਦੱਸੀ ਗਈ ਹੈ, ਜੋ ਕੈਲਗਰੀ ਤੋਂ ਸੀ। ਉਹ ਇੱਕ ਯੂਨੀਵਰਸਿਟੀ ਆਫ ਐਲਬਰਟਾ ਦੀ ਸੇਵਾਮੁਕਤ ਅਧਿਆਪਕ ਸੀ।

ਗੌਰਤਲਬ ਹੈ ਕਿ 19 ਜੂਨ ਨੂੰ ਵਾਪਰੀ ਇਸ ਘਟਨਾ ਵਿਚ ਤਿੰਨ ਹੋਰ ਲੋਕ ਜ਼ਖਮੀ ਹੋਏ ਸਨ, ਜਿਨ੍ਹਾਂ ਨੂੰ ਸਟਾਰ ਏਅਰ ਐਂਬੂਲੈਂਸ ਅਤੇ ਗਰਾਉਂਡ ਐਬੂਲੈਂਸ ਜ਼ਰੀਏ ਹਸਪਤਾਲ ਲਿਜਾਇਆ ਗਿਆ ਸੀ। ਪਾਰਕਸ ਕੈਨੇਡਾ ਨੇ ਕਿਹਾ ਕਿ 2023 ਵਿਚ ਵੀ ਇਸੇ ਤਰ੍ਹਾਂ ਦੇ ਇੱਕ ਇਲਾਕੇ ਵਿਚ ਚੱਟਾਨ ਡਿੱਗਣ ਦੀ ਘਟਨਾ ਵਾਪਰੀ ਸੀ। ਉਸ ਘਟਨਾ ਵਿਚ ਕੁਝ ਲੋਕਾਂ ਨੂੰ ਸੱਟਾਂ ਲੱਗੀਆਂ ਸਨ ਪਰ ਉਹ ਮਾਮੂਲੀ ਸਨ।