ਬੀ.ਸੀ. ਦੇ ਸਮਰਲੈਂਡ ਨੇੜੇ ਬਾਲਡ ਰੇਂਜ ਜੰਗਲੀ ਅੱਗ ਦੀ ਜਾਂਚ ਆਰਸੀਐਮਪੀ ਵੱਲੋਂ ਸ਼ੁਰੂ

ਬੀ.ਸੀ.ਵਿਚ ਸਮਰਲੈਂਡ ਕੋਲ ਲੱਗੀ ਬਾਲਡ ਰੇਂਜ ਜੰਗਲੀ ਅੱਗ ਦੇ ਕਾਰਨਾਂ ਦਾ ਪਤਾ ਲਗਾਉਣ ਲਈ ਆਰਸੀਐਮਪੀ ਵਲੋਂ ਜਾਂਚ ਸ਼ੁਰੂ ਕੀਤੀ ਗਈ ਹੈ। ਪੈਂਟਿਕਟਨ ਸਾਊਥ ਓਕਾਨਾਗਨ ਆਰਸੀਐਮਪੀ ਡਿਟੈਚਮੈਂਟ ਮੁਤਾਬਕ, ਇਹ ਅੱਗ ਸ਼ੱਕੀ ਗਤੀਵਿਧੀਆਂ ਕਾਰਨ ਲੱਗੀ ਹੋ ਸਕਦੀ ਹੈ, ਜਿਸ ਦੀ ਬਾਰੀਕੀ ਨਾਲ ਜਾਂਚ ਕੀਤੀ ਜਾ ਰਹੀ ਹੈ।

ਪੁਲਿਸ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਜੇ ਕਿਸੇ ਨੇ ਵੀ 7 ਅਗਸਤ ਦੀ ਦੁਪਹਿਰ ਨੂੰ ਪ੍ਰਿੰਸਟਨ-ਸਮਰਲੈਂਡ ਰੋਡ, ਬਾਥਵਿਲ ਰੋਡ ਜਾਂ ਕਰੰਪ ਰੀਕ੍ਰੀਏਸ਼ਨ ਸਾਈਟ ਦੇ ਆਸਪਾਸ ਕੋਈ ਸ਼ੱਕੀ ਹਰਕਤ ਦੇਖੀ ਹੋਵੇ ਜਾਂ ਕਿਸੇ ਦੇ ਡੈਸ਼ਕੈਮ ਜਾਂ ਮੋਬਾਈਲ ਵਿਚ ਕੋਈ ਵੀਡੀਓ ਜਾਂ ਫ਼ੋਟੋ ਹੋਵੇ ਤਾਂ ਉਹ ਤੁਰੰਤ ਪੁਲਿਸ ਨਾਲ ਸੰਪਰਕ ਕਰਨ। ਇਸ ਵਿਚਕਾਰ ਪੁਲਿਸ ਨੇ ਸੋਸ਼ਲ ਮੀਡੀਆ 'ਤੇ ਗਲਤ ਅਫ਼ਵਾਹਾਂ ਨਾ ਫੈਲਾਉਣ ਦੀ ਵੀ ਸਖ਼ਤ ਹਦਾਇਤ ਕੀਤੀ ਹੈ।

ਦੱਸਣਯੋਗ ਹੈ ਕਿ ਸ਼ੁੱਕਰਵਾਰ ਨੂੰ ਭੜਕੀ ਬਾਲਡ ਰੇਂਜ ਵਾਈਲਡ ਫਾਇਰ ਰਾਤ ਤੱਕ 15,590 ਹੈਕਟੇਅਰ ਨੂੰ ਆਪਣੀ ਲਪੇਟ ਵਿਚ ਲੈ ਚੁੱਕੀ ਹੈ। ਸਮਰਲੈਂਡ ਵੱਲ ਵਧ ਰਹੀ ਇਸ ਅੱਗ ਨੇ ਮਾਲੀ ਨੁਕਸਾਨ ਦੇ ਨਾਲ-ਨਾਲ ਇੱਕ 80 ਸਾਲਾ ਬਜ਼ੁਰਗ ਦੀ ਵੀ ਜਾਨ ਲਈ ਹੈ। ਬੀ.ਸੀ. ਵਾਈਲਡਫਾਇਰ ਸਰਵਿਸ ਮੁਤਾਬਕ, ਸਥਿਤੀ 'ਤੇ ਕਾਬੂ ਪਾਉਣ ਲਈ ਮੈਕਸੀਕੋ ਤੋਂ 100 ਅੱਗ ਬੁਝਾਉਣ ਵਾਲੇ ਵੀ ਅੱਜ ਤੋਂ ਉਨ੍ਹਾਂ ਨਾਲ ਜੁੜ ਰਹੇ ਹਨ।