ਐਬਟਸਫੋਰਡ ਅਤੇ ਚਿਲੀਵੈਕ ਵਿੱਚ ਆਰ.ਸੀ.ਐਮ.ਪੀ. ਵੱਲੋਂ ਦੋ ਸ਼ੱਕੀ ਡਰੱਗ ਲੈਬ ਦਾ ਪਰਦਾਫਾਸ਼

ਐਬਟਸਫੋਰਡ ਅਤੇ ਚਿਲੀਵੈਕ ਵਿਚ ਆਰ.ਸੀ.ਐਮ.ਪੀ. ਨੇ ਦੋ ਗੁਪਤ ਤੌਰ 'ਤੇ ਚਲਾਈਆਂ ਜਾ ਰਹੀਆਂ ਡਰੱਗ ਲੈਬ ਦਾ ਪਰਦਾਫਾਸ਼ ਕੀਤਾ ਹੈ। ਇਨ੍ਹਾਂ ਲੈਬ ਵਿਚੋਂ ਭਾਰੀ ਮਾਤਰਾ ਵਿਚ ਫੈਂਟਾਨਿਲ ਅਤੇ ਐਮ.ਡੀ.ਐਮ.ਏ. ਡਰੱਗ, ਕੰਰਸੀ ਤੇ ਹਥਿਆਰ ਵੀ ਜ਼ਬਤ ਕੀਤੇ ਗਏ। ਆਰ.ਸੀ.ਐਮ.ਪੀ. ਦੀ Pacific Region ਲਈ ਫੈਡਰਲ ਪੁਲਿਸ ਮੁਤਾਬਕ, ​ਇਸ ਕਾਰਵਾਈ ਦੌਰਾਨ ਅਧਿਕਾਰੀਆਂ ਨੇ ਤਿੰਨ ਵਿਅਕਤੀਆਂ ਨੂੰ ਗ੍ਰਿਫਤਾਰ ਕੀਤਾ, ਜੋ ਅਗਲੇਰੀ ਜਾਂਚ ਤੱਕ ਫਿਲਹਾਲ ਰਿਹਾਈ 'ਤੇ ਹਨ।

ਆਰ.ਸੀ.ਐਮ.ਪੀ. ਮੁਤਾਬਕ, 1 ਮਈ ਨੂੰ ਚਿਲੀਵੈਕ ਵਿਚ Keith Wilson Rd. ਦੇ 41000 ਬਲਾਕ ਵਿਚ ਫੜੀ ਗਈ ਡਰੱਗ ਲੈਬ ਤੋਂ ਜਾਂਚਕਰਤਾ ਨੇ ਕਰੀਬ 40 ਕਿਲੋਗ੍ਰਾਮ ਤਿਆਰ ਫੈਂਟਾਨਿਲ ਜ਼ਬਤ ਕੀਤਾ। ਇਸ ਤੋਂ ਪਹਿਲਾਂ 30 ਅਪ੍ਰੈਲ ਨੂੰ ਐਬਟਸਫੋਰਡ ਦੀ Queen St. ਦੇ 1800 ਬਲਾਕ ਵਿਚ ਸਥਿਤ ਇੱਕ ਪ੍ਰੋਪਰਟੀ ਤੋਂ ਐਮ.ਡੀ.ਐਮ.ਏ. ਬਣਾਉਣ ਵਾਲੀ ਲੈਬ, 250 ਕਿਲੋਗ੍ਰਾਮ ਤਿਆਰ ਨਸ਼ਾ ਅਤੇ ਗੋਲੀਆਂ ਬਣਾਉਣ ਵਾਲੀ ਮਸ਼ੀਨ ਬਰਾਮਦ ਕੀਤੀ ਗਈ।

ਇਸ ਤੋਂ ਇਲਾਵਾ ਮੌਕੇ ਤੋਂ ਨਸ਼ਾ ਬਣਾਉਣ ਵਾਲੇ ਕੈਮੀਕਲ, ਪੈਕਿੰਗ ਸਮੱਗਰੀ, $135,000 ਕੈਸ਼ ਅਤੇ 11 ਹਥਿਆਰ ਕਬਜ਼ੇ ਵਿਚ ਲਏ ਗਏ। ਪੁਲਿਸ ਨੇ ਅਜੇ ਇਹ ਸਪੱਸ਼ਟ ਨਹੀਂ ਕੀਤਾ ਕਿ ਇਹ ਦੋਵੇਂ ਲੈਬ ਦਾ ਆਪਸ ਵਿਚ ਕੋਈ ਸਬੰਧ ਸੀ ਜਾਂ ਨਹੀਂ। ​ਔਫੀਸਰ ਨੇ ਦੱਸਿਆ ਕਿ ਇਸ ਮਾਮਲੇ ਦੀ ਜਾਂਚ ਹਾਲੇ ਵੀ ਵੱਡੇ ਪੱਧਰ 'ਤੇ ਜਾਰੀ ਹੈ।