ਐਲਬਰਟਾ ਪੈਨਲ ਦੀ ਰਿਪੋਰਟ ਦੀ ਆਰ.ਸੀ.ਐਮ.ਪੀ. ਯੂਨੀਅਨ ਨੇ ਕੀਤੀ ਨਿੰਦਾ

ਐਲਬਰਟਾ ਨੈਕਸਟ ਪੈਨਲ ਦੀ ਹਾਲੀਆ ਰਿਪੋਰਟ ਤੋਂ ਬਾਅਦ ਆਰ.ਸੀ.ਐਮ.ਪੀ. ਅਤੇ ਨੈਸ਼ਨਲ ਪੁਲਿਸ ਫੈਡਰੇਸ਼ਨ ਦੀ ਯੂਨੀਅਨ ਨੇ ਸੂਬਾਈ ਪੁਲਿਸ ਫੋਰਸ ਬਣਾਉਣ ਦੀਆਂ ਸਿਫਾਰਸ਼ਾਂ ਦਾ ਸਖ਼ਤ ਵਿਰੋਧ ਕੀਤਾ ਹੈ। ਪੈਨਲ ਦੀ ਰਿਪੋਰਟ ਵਿਚ ਸੂਬਾ ਸਰਕਾਰ ਨੂੰ ਆਰ.ਸੀ.ਐਮ.ਪੀ. ਨੂੰ ਹਟਾ ਕੇ ਆਪਣੀ ਖੁਦ ਦੀ 'ਐਲਬਰਟਾ ਪੁਲਿਸ ਸਰਵਿਸ' ਬਣਾਉਣ ਦੀ ਸਲਾਹ ਦਿੱਤੀ ਗਈ ਸੀ।

ਨੈਸ਼ਨਲ ਪੁਲਿਸ ਫੈਡਰੇਸ਼ਨ ਦੇ ਪ੍ਰਧਾਨ ਅਤੇ ਸੀਈਓ ਬ੍ਰਾਇਨ ਸੌਵੇ ਨੇ ਸੋਮਵਾਰ ਨੂੰ ਇੱਕ ਬਿਆਨ ਜਾਰੀ ਕਰਦਿਆਂ ਇਸ ਰਿਪੋਰਟ ਨੂੰ ਰਾਜਨੀਤੀ ਤੋਂ ਪ੍ਰੇਰਿਤ ਦੱਸਿਆ। ਉਨ੍ਹਾਂ ਕਿਹਾ ਕਿ ਇਹ ਉਨ੍ਹਾਂ ਪ੍ਰਸਤਾਵਾਂ ਨੂੰ ਮੁੜ ਤਾਜ਼ਾ ਕਰਨ ਦੀ ਕੋਸ਼ਿਸ਼ ਹੈ, ਜਿਨ੍ਹਾਂ ਨੂੰ ਐਲਬਰਟਾ ਦੇ ਲੋਕ ਪਹਿਲਾਂ ਹੀ ਕਈ ਵਾਰ ਰੱਦ ਕਰ ਚੁੱਕੇ ਹਨ। ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਕਿਉਂਕਿ 80 ਫੀਸਦੀ ਤੋਂ ਵੱਧ ਐਲਬਰਟਾ ਵਾਸੀਆਂ ਕੋਲ ਪਹਿਲਾਂ ਹੀ ਮਿਊਂਸਪਲ ਪੁਲਿਸ ਜਾਂ ਸ਼ੈਰਿਫ ਸੇਵਾਵਾਂ ਹਨ, ਇਸ ਲਈ ਪੂਰੇ ਸੂਬੇ ਵਿੱਚ ਰੈਫਰੈਂਡਮ ਕਰਵਾਉਣਾ ਸਹੀ ਨਹੀਂ ਹੋਵੇਗਾ।

ਆਰ.ਸੀ.ਐਮ.ਪੀ. ਦੇ ਡਿਪਟੀ ਕਮਿਸ਼ਨਰ Trevor Daroux ਨੇ ਸਪੱਸ਼ਟ ਕੀਤਾ ਕਿ ਆਰ.ਸੀ.ਐਮ.ਪੀ. ਐਲਬਰਟਾ ਦੀ ਲਗਭਗ 40 ਫੀਸਦੀ ਆਬਾਦੀ ਨੂੰ ਸੇਵਾਵਾਂ ਪ੍ਰਦਾਨ ਕਰਦੀ ਹੈ। ਉਨ੍ਹਾਂ ਕਿਹਾ ਕਿ ਭਾਵੇਂ ਸਟਾਫ਼ ਦੀ ਕਮੀ ਹੈ ਪਰ ਹੁਣ ਹਜ਼ਾਰਾਂ ਲੋਕ ਨਵੀਂ ਭਰਤੀ ਲਈ ਅਪਲਾਈ ਕਰ ਰਹੇ ਹਨ, ਜਿਸ ਨਾਲ ਹਾਲਾਤ ਸੁਧਰਨਗੇ।