ਐਲਬਰਟਾ ਪ੍ਰੀਮੀਅਰ ਅਤੇ ਦੋ ਮੰਤਰੀਆਂ ਖ਼ਿਲਾਫ਼ ਰੀਕਾਲ ਪਟੀਸ਼ਨ ਨੂੰ ਮਿਲੀ ਮਨਜ਼ੂਰੀ

ਇਲੈਕਸ਼ਨ ਐਲਬਰਟਾ ਨੇ ਪੁਸ਼ਟੀ ਕੀਤੀ ਹੈ ਕਿ ਪ੍ਰੀਮੀਅਰ ਡੈਨੀਅਲ ਸਮਿਥ ਅਤੇ ਯੂਨਾਈਟਿਡ ਕੰਜ਼ਰਵੇਟਿਵ ਪਾਰਟੀ ਦੇ ਦੋ ਕੈਬਨਿਟ ਮੰਤਰੀਆਂ ਖਿਲਾਫ ਰੀਕਾਲ ਪਟੀਸ਼ਨ ਦਰਜ ਕੀਤੀ ਗਈ ਹੈ। ਇਸ ਕਦਮ ਨਾਲ ਪਟੀਸ਼ਨਕਰਤਾ ਲਈ ਹੁਣ ਦਸਤਖਤ ਇਕੱਠੇ ਕਰਨ ਦਾ ਰਾਹ ਖੁੱਲ੍ਹ ਗਿਆ ਹੈ। ਸਮਿਥ ਖਿਲਾਫ ਪਟੀਸ਼ਨ ਦਰਜ ਕਰਨ ਵਾਲੀ ਹੀਥਰ ਵੈਨਸਨਿਕ ਦਾ ਕਹਿਣਾ ਹੈ ਕਿ ਸਮਿਥ ਆਪਣੀ ਰਾਈਡਿੰਗ ਬਰੂਕਸ-ਮੈਡੀਸਨ ਹੈਟ ਵੱਲ ਧਿਆਨ ਨਹੀਂ ਦੇ ਰਹੀ।

ਤਕਨਾਲੋਜੀ ਮੰਤਰੀ ਨੈਟ ਗਲੂਬਿਸ਼ ਅਤੇ ਵਾਤਾਵਰਣ ਮੰਤਰੀ ਰੇਬੇਕਾ ਸ਼ੁਲਜ਼ ਖਿਲਾਫ ਵੀ ਪਟੀਸ਼ਨ ਦਰਜ ਹੋਈ ਹੈ। ਦੱਸ ਦੇਈਏ ਕਿ ਕੁੱਲ 21 ਯੂ.ਸੀ.ਪੀ. ਐਮ.ਐਲ.ਏ. ਰੀਕਾਲ ਪਟੀਸ਼ਨ ਦਾ ਸਾਹਮਣਾ ਕਰ ਰਹੇ ਹਨ।ਇਨ੍ਹਾਂ ਵਿਚੋਂ 19 ਨੇ ਆਪਣੀਆਂ ਸਟੇਟਮੈਂਟ ਦਰਜ ਕਰਵਾ ਦਿੱਤੀਆਂ ਹਨ। ਏਅਰਡ੍ਰੀ-ਈਸਟ ਵਿਧਾਇਕ ਐਂਜੇਲਾ ਪਿਟ ਅਤੇ ਸਪ੍ਰੂਸ ਗਰੋਵ-ਸਟੋਨੀ ਪਲੇਨ ਐਮ.ਐਲ.ਏ. ਸਰਲ ਟਰਟਨ ਨੇ ਅਜੇ ਪਟੀਸ਼ਨਜ਼ ਨੂੰ ਲੈ ਕੇ ਕੋਈ ਜਵਾਬ ਨਹੀਂ ਦਿੱਤਾ।

ਸਮਿਥ ਨੇ ਮੁੱਖ ਚੋਣ ਅਧਿਕਾਰੀ ਗੋਰਡਨ ਮੈਕਕਲੂਰ ਨੂੰ ਜਵਾਬ ਦਿੱਤਾ ਕਿ ਉਹ ਆਪਣੀ ਹਲਕੇ ਦੇ ਲੋਕਾਂ ਦੀ ਸੇਵਾ ਕਰਨਾ ਮਾਣ ਸਮਝਦੀ ਹੈ। ਸਮਿਥ ਖਿਲਾਫ ਉਸ ਦੀ ਰਾਈਡਿੰਗ ਦੇ ਲੋਕਾਂ ਕੋਲੋਂ ਦਸਤਖਤ ਇਕੱਠੇ ਕਰਨ ਲਈ ਪਟੀਸ਼ਨਕਰਤਾ ਕੋਲ 11 ਦਸੰਬਰ ਤੋਂ10 ਮਾਰਚ,2026 ਤਕ ਦਾ ਸਮਾਂ ਹੈ।