ਜੈਸਪਰ ਜੰਗਲੀ ਅੱਗ ; ਬਾਰਸ਼ ਅਤੇ ਠੰਢੇ ਤਾਪਮਾਨ ਕਾਰਨ ਕੁਝ ਰਾਹਤ

ਐਲਬਰਟਾ ਦੇ ਜੈਸਪਰ ਵਿਚ ਲੱਗੀ ਜੰਗਲੀ ਅੱਗ ਨੂੰ ਬਾਰਸ਼ ਅਤੇ ਠੰਢੇ ਤਾਪਮਾਨ ਨੇ ਕੁਝ ਹੱਦ ਤੱਕ ਫੈਲਣ ਤੋਂ ਰੋਕਣ ਵਿਚ ਮਦਦ ਕੀਤੀ ਹੈ ਪਰ ਹੁਣ ਤੱਕ 36,000 ਹੈਕਟੇਅਰ ਇਲਾਕਾ ਸੜ ਚੁੱਕਾ ਹੈ ਅਤੇ ਕਈ ਹਫਤਿਆਂ ਤੱਕ ਅੱਗ ਬੁਝਣ ਦੇ ਆਸਾਰ ਨਹੀਂ ਹਨ।

ਜੈਸਪਰ ਨੈਸ਼ਨਲ ਪਾਰਕ ਦੇ ਅਧਿਕਾਰੀਆਂ ਨੇ ਵੀਰਵਾਰ ਰਾਤ ਕਰੀਬ 10 ਵਜੇ ਜਾਰੀ ਬਿਆਨ ਵਿਚ ਕਿਹਾ ਕਿ ਬਾਰਸ਼ ਕਾਰਨ ਘੱਟੋ-ਘੱਟ 72 ਘੰਟੇ ਤੱਕ ਅੱਗ ਹੋਰ ਫੈਲਣ ਦਾ ਖ਼ਤਰਾ ਘੱਟ ਰਹਿਣ ਦੀ ਸੰਭਾਵਨਾ ਹੈ। ਉਨ੍ਹਾਂ ਪੁਸ਼ਟੀ ਕੀਤੀ ਕਿ ਜੈਸਪਰ ਟਾਊਨ ਵਿਚ ਅੱਗ ਨੇ ਕਈ ਇਮਾਰਤਾਂ ਨੂੰ ਤਹਿਸ ਨਹਿਸ ਕੀਤਾ ਹੈ।

ਪਾਰਕਸ ਕੈਨੇਡਾ ਨੇ ਵੀਰਵਾਰ ਰਾਤ ਪੁਸ਼ਟੀ ਕੀਤੀ ਕਿ ਜੈਸਪਰ ਵਿਚ 15 ਮਿਮੀ ਦਾ ਮੀਂਹ ਪਿਆ ਅਤੇ ਤਾਪਮਾਨ ਠੰਡਾ ਹੋ ਗਿਆ ਹੈ। ਇਨਵਾਇਰਮੈਂਟ ਕੈਨੇਡਾ ਮੁਤਾਬਕ ਅੱਜ ਵੀ ਮੀਂਹ ਪੈ ਸਕਦਾ ਹੈ ਅਤੇ ਤਾਪਮਾਨ 20 ਡਿਗਰੀ ਸੈਲਸੀਅਸ ਦੀ ਰੇਂਜ ਵਿਚ ਰਹਿ ਸਕਦਾ ਹੈ।

ਔਫੀਸ਼ੀਅਲਜ਼ ਮੁਤਾਬਕ ਜੈਸਪਰ ਹਸਪਤਾਲ, ਐਮਰਜੈਂਸੀ ਸਰਵਿਸ ਬਿਲਡਿੰਗ, ਦੋ ਸਕੂਲ, ਐਕਟੀਵਿਟੀ ਸੈਂਟਰ ਅਤੇ ਖ਼ਰਾਬ ਪਾਣੀ ਦੇ ਟਰੀਟਮੈਂਟ ਪਲਾਂਟ ਨੂੰ ਜੰਗਲੀ ਅੱਗ ਦੀ ਲਪੇਟ ਵਿਚ ਆਉਣ ਤੋਂ ਬਚਾਅ ਲਿਆ ਗਿਆ ਹੈ।