ਕੈਨੇਡਾ ਵਲੋਂ ਸਟੱਡੀ ਵੀਜ਼ਾ 'ਤੇ ਸਖ਼ਤੀ ਵਿਚਕਾਰ ਰਿਕਾਰਡ ਪੱਧਰ ਤੇ ਵਧੇ ਸ਼ਰਣਾਰਥੀ ਕਲੇਮ

ਕੈਨੇਡਾ ਵਲੋਂ ਸਟੱਡੀ ਵੀਜ਼ਾ ਅਤੇ ਅਸਥਾਈ ਨਿਵਾਸ ’ਤੇ ਸਖ਼ਤੀ ਵਿਚਕਾਰ ਇਸ ਸਾਲ ਦੇ ਪਹਿਲੇ ਨੌਂ ਮਹੀਨਿਆਂ ਵਿਚ ਕਰੀਬ 14,000 ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਨੇ ਸ਼ਰਣ ਦੇ ਦਾਅਵੇ ਦਾਇਰ ਕੀਤੇ ਹਨ, ਜੋ ਕਿ ਇੱਕ ਰਿਕਾਰਡ ਹੈ।

ਇਮੀਗ੍ਰੇਸ਼ਨ ਮਿਨਿਸਟਰ ਮਾਰਕ ਮਿਲਰ ਮੁਤਾਬਕ, ਸਟੱਡੀ ਪਰਮਿਟ ’ਤੇ ਕੈਨੇਡਾ ਵਿਚ ਦਾਖ਼ਲ ਹੋਣ ਵਾਲੇ ਬਹੁਤ ਸਾਰੇ ਵਿਦਿਆਰਥੀ ਝੂਠੇ ਕਲੇਮ ਕਰਦੇ ਹਨ ਅਤੇ ਅਜਿਹਾ ਕਰਨ ਦੀ ਸਲਾਹ ਉਨ੍ਹਾਂ ਨੂੰ ਬਾਹਰੀ ਸਲਾਹਕਾਰ ਵਲੋਂ ਦਿੱਤੀ ਜਾਂਦੀ ਹੈ।

ਫੈਡਰਲ ਇਮੀਗ੍ਰੇਸ਼ਨ ਡੇਟਾ ਮੁਤਾਬਕ, ਇਸ ਸਾਲ 1 ਜਨਵਰੀ ਤੋਂ 30 ਸਤੰਬਰ ਵਿਚਕਾਰ ਯੂਨੀਵਰਸਿਟੀਆਂ ਅਤੇ ਕਾਲਜਾਂ ਵਿੱਚ ਹਾਜ਼ਰੀ ਭਰ ਰਹੇ 13,660 ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਨੇ ਸ਼ਰਣ ਦੇ ਦਾਅਵੇ ਫਾਈਲ ਕੀਤੇ ਹਨ, ਜਦੋਂ ਕਿ 2023 ਦੇ ਪੂਰੇ ਸਾਲ ਵਿਚ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਵਲੋਂ ਲਗਭਗ 12,000 ਸ਼ਰਣ ਦੇ ਦਾਅਵੇ ਦਾਖ਼ਲ ਕੀਤੇ ਗਏ ਸਨ। ਉਥੇ ਹੀ, 2018 ਵਿਚ ਇਹ ਗਿਣਤੀ ਮਹਿਜ 1,810 ਸੀ।

2024 ਵਿਚ ਇਹ ਅੰਕੜਾ ਹਾਲੇ ਹੋਰ ਵੀ ਵਧੇਗਾ ਕਿਉਂਕਿ ਅਜੇ ਤਿੰਨ ਮਹੀਨਿਆਂ ਦਾ ਡੇਟਾ ਸਾਹਮਣੇ ਆਉਣਾ ਬਾਕੀ ਹੈ। ਉਥੇ ਹੀ, ਇੰਟਰਨੈਸ਼ਨਲ ਸਟੂਡੈਂਟਸ ਪਰਮਿਟ ਵਿਚ ਪਹਿਲੇ ਨੌ ਮਹੀਨਿਆਂ ਵਿਚ 2023 ਦੇ ਮੁਕਾਬਲੇ 100,000 ਦੀ ਗਿਰਾਵਟ ਆਈ ਹੈ, ਜਿਸ ਦਾ ਮਤਲਬ ਹੈ ਕਿ ਬਹੁਤ ਘੱਟ ਸਟੂਡੈਂਟਸ ਨੂੰ ਕੈਨੇਡਾ ਆਉਣ ਦੀ ਮਨਜ਼ੂਰੀ ਦਿੱਤੀ ਜਾ ਰਹੀ ਹੈ।