14.2C Vancouver 14.2C VancouverApr 14, 2020 2:16 AM -
ਕੋਰੋਨਾ ਵਾਇਰਸ ਨਾਲ ਪ੍ਰਭਾਵਿਤ ਹੋਏ ਸ਼ਿਵਪੁਰੀ ਦੇ ਇੱਕ ਨੌਜਵਾਨ ਨੇ ਆਪਣੇ ਗੁਆਂਢੀਆਂ 'ਤੇ ਤੰਗ-ਪ੍ਰੇਸ਼ਾਨ ਕਰਨ ਦੇ ਇਲਜਾਮ ਲਗਾਏ ਹਨ ਅਤੇ ਕਿਹਾ ਹੈ ਕਿ ਓਹ ਆਪਣਾ ਘਰ ਵੇਚਣ ਲਈ ਮਜਬੂਰ ਹੋ ਗਿਆ ਹੈ।
ਇਸ ਵਿਅਕਤੀ ਦਾ ਨਾਮ ਦੀਪਕ ਸ਼ਰਮਾ ਹੈ।
ਦੀਪਕ ਨੇ ਕਿਹਾ ਕਿ ਓਹ ਕਰੀਬ 8 ਜਾਂ 9 ਸਾਲ ਤੋਂ ਬਾਹਰ ਹੀ ਕੰਮ ਕਰ ਰਿਹਾ ਹੈ।
ਪਰ ਜਦ ਉਸਨੇ ਕੋਵਿਡ-19 ਦੇ ਫੈਲਣ ਬਾਰੇ ਸੁਣਿਆ ਤਾਂ ਉਸਨੇ ਭਾਰਤ 'ਚ ਆਪਣੇ ਘਰ ਆਉਣਾ ਬੇਹਤਰ ਸਮਝਿਆ।
ਉਸਨੇ ਕਿਹਾ ਕਿ 18 ਮਾਰਚ ਨੂੰ ਵਾਪਿਸ ਪਰਤਣ ਤੋਂ ਬਾਅਦ, ਓਹ 19 ਮਾਰਚ ਨੂੰ ਹਸਪਤਾਲ ਗਿਆ ਅਤੇ ਚੈਕ ਅਪ ਕਰਵਾਇਆ।
21 ਮਾਰਚ ਨੂੰ ਉਸਦੇ ਕੁਝ ਟੈਸਟ ਕੀਤੇ ਗਏ, ਜਿਸ 'ਚ ਉਸਨੂੰ ਕੋਰੋਨਾ ਵਾਇਰਸ ਨਾਲ ਪ੍ਰਭਾਵਿਤ ਪਾਇਆ ਗਿਆ।
ਵਿਅਕਤੀ ਨੇ ਦੱਸਿਆ ਕਿ ਹਸਪਤਾਲ ਪ੍ਰਸ਼ਾਸਨ ਅਤੇ ਸਟਾਫ ਨੇ ਉਸਦੇ ਨਾਲ ਪੂਰਾ ਸਹਿਯੋਗ ਕੀਤਾ ਅਤੇ ਉਸਦੇ ਪੂਰੀ ਤਰ੍ਹਾਂ ਠੀਕ ਹੋਣ ਤੋਂ ਬਾਅਦ, ਅਤੇ ਉਸਦੇ ਟੈਸਟ ਨਤੀਜੇ ਨੈਗੇਟਿਵ ਆਉਣ ਤੋਂ ਬਾਅਦ, ਉਸਨੂੰ ਛੁੱਟੀ ਦੇ ਦਿੱਤੀ ਗਈ।
ਦੀਪਕ ਨੇ ਦੱਸਿਆ ਕਿ 4 ਅਪ੍ਰੈਲ ਨੂੰ ਜਦ ਓਹ ਘਰ ਪਰਤਿਆ ਤਾਂ ਉਸਦੇ ਗੁਆਂਢੀਆਂ ਨੇ ਉਸਨੂੰ ਤਾਨੇ-ਮਿਹਣੇ ਦੇਣਾ ਸ਼ੁਰੂ ਕਰ ਦਿੱਤਾ।
ਉਸਨੇ ਕਿਹਾ ਕਿ ਸਿਲਸਿਲਾ ਇਥੇ ਹੀ ਨਹੀਂ ਰੁਕਿਆ, ਬਲਕਿ ਉਸਦੇ ਪਰਿਵਾਰ ਦੇ ਲੋਕਾਂ ਨਾਲ ਵੀ ਅਜਿਹਾ ਹੀ ਸਲੂਕ ਕੀਤਾ ਗਿਆ।
ਗੱਲ ਇੰਨੀ ਵਧ ਗਈ ਕਿ ਪੁਲਿਸ ਨੂੰ ਸੱਦਿਆ ਗਿਆ, ਪਰ ਇਸਦੇ ਬਾਵਜੂਦ ਗੁਆਂਢੀਆਂ ਦਾ ਦੀਪਕ ਅਤੇ ਉਸਦੇ ਪਰਿਵਾਰ ਪ੍ਰਤੀ ਰਵਈਆ ਨਹੀਂ ਬਦਲਿਆ।
ਦੀਪਕ ਦੇ ਮਾਪਿਆਂ ਦੇ ਵੀ ਟੈਸਟ ਕੀਤੇ ਗਏ ਜੋ ਕਿ ਨੈਗੇਟਿਵ ਹੀ ਆਏ।
ਅੱਕੇ ਅਤੇ ਥੱਕੇ ਦੀਪਕ ਨੇ ਘਰ ਨੂੰ ਵੇਚਣ ਦਾ ਮਨ ਬਣਾ ਲਿਆ, ਅਤੇ ਘਰ ਦੇ ਬਾਹਰ 'ਹਾਊਸ ਫਾਰ ਸੇਲ' ਦੀ ਤਖਤੀ ਲਗਾ ਦਿੱਤੀ।
ਦੀਪਕ ਦੇ ਪਿਤਾ ਜਾਨਕੀ ਪ੍ਰਸਾਦ ਦਾ ਵੀ ਕਹਿਣਾ ਸੀ ਕਿ, ਓਹ ਵੀ ਹੁਣ ਇਸ ਘਰ 'ਚ ਨਹੀਂ ਰਹਿਣਾ ਚਾਹੁੰਦੇ।
ਉਨ੍ਹਾਂ ਕਿਹਾ ਕਿ ਗੁਆਂਢੀ ਉਨ੍ਹਾਂ ਨੂੰ ਜਰੂਰਤ ਦਾ ਸਾਮਾਨ ਤਕ ਖਰੀਦਣ ਨਹੀਂ ਦੇ ਰਹੇ।
ਸ਼ਿਵਪੁਰੀ ਦੇ ਐਸ.ਪੀ. ਰਾਜੇਸ਼ ਸਿੰਘ ਚੰਡੇਲ ਨੇ ਕਿਹਾ ਕਿ, ਉਨ੍ਹਾਂ ਕੋਲ ਮਾਮਲੇ ਦੀ ਸੂਚਨਾ ਪਹੁੰਚ ਗਈ ਹੈ ਅਤੇ ਪੀੜਤ ਪਰਿਵਾਰ ਨੂੰ ਜਰੂਰਤ ਦਾ ਸਾਮਾਨ ਘਰ 'ਚ ਪਹੁੰਚਾਇਆ ਜਾ ਰਿਹਾ ਹੈ।
