ਜੈਸਪਰ ਟਾਊਨ ਦੇ ਲੋਕ ਜੰਗਲੀ ਅੱਗ ਦੀ ਤਬਾਹੀ ਮਗਰੋਂ ਘਰਾਂ ਲਈ ਰਵਾਨਾ

ਐਲਬਰਟਾ ਦੇ ਜੈਸਪਰ ਵਿਚ ਜੰਗਲੀ ਅੱਗ ਕਾਰਨ ਘਰੋਂ-ਬੇਘਰ ਹੋਏ ਲੋਕਾਂ ਦੀ ਰੀ-ਐਂਟਰੀ ਲਈ ਹਾਈਵੇਅ ਅੱਜ 7 ਵਜੇ ਤੋਂ ਖੋਲ੍ਹ ਦਿੱਤਾ ਗਿਆ ਹੈ ਅਤੇ ਹਜ਼ਾਰਾਂ ਲੋਕਾਂ ਦੇ ਵਾਪਸ ਜਾਣ ਦੀ ਉਮੀਦ ਹੈ। ਜੈਸਪਰ ਦੇ ਮੇਅਰ ਰਿਚਰਡ ਆਇਰਲੈਂਡ ਨੇ ਦੱਸਿਆ ਕਿ ਫਿਲਹਾਲ ਸਿਰਫ ਨਿਵਾਸੀਆਂ ਨੂੰ ਜੈਸਪਰ ਵਿਚ ਜਾਣ ਦੀ ਇਜਾਜ਼ਤ ਹੈ ਅਤੇ ਵਿਜ਼ਿਟਰਜ਼ ਨੂੰ ਹਾਈਵੇਅ ’ਤੇ ਰੁਕਣਾ ਪਵੇਗਾ।

ਪਹਿਲਾਂ ਕਿਹਾ ਗਿਆ ਸੀ ਕਿ ਜੈਸਪਰ ਹਰੇਕ ਲਈ ਖੋਲ੍ਹ ਦਿੱਤਾ ਜਾਵੇਗਾ ਪਰ ਫਿਰ ਕੁਝ ਲੋਕਾਂ ਨੇ ਕਿਹਾ ਕਿ ਵਿਜ਼ਿਟਰਜ਼ ਉਨ੍ਹਾਂ ਘਰਾਂ ਅਤੇ ਬਿਜ਼ਨਸ ਦੀ ਮੌਜੂਦਾ ਹਾਲਤ ਬਾਰੇ ਦਖਲ ਦੇਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਇਸ ਲਈ ਹੁਣ ਜੈਸਪਰ ਵਿਚ ਵਿਜ਼ਿਟਰਜ਼ ਨੂੰ ਜਾਣ ਦੀ ਇਜਾਜ਼ਤ ਨਹੀਂ ਹੋਵੇਗੀ। ਜੰਗਲੀ ਅੱਗ ਕਾਰਨ ਜੈਸਪਰ ਦਾ ਇਕ-ਤਿਹਾਈ ਇਲਾਕਾ ਬੁਰੀ ਤਰ੍ਹਾਂ ਸੜ ਗਿਆ ਹੈ।

ਕੁਝ ਦਿਨ -ਪਹਿਲਾਂ ਲੋਕਾਂ ਨੂੰ ਬੱਸ ਟੂਰ ਰਾਹੀਂ ਆਪਣੇ ਘਰਾਂ ਨੂੰ ਦੇਖਣ ਦਾ ਮੌਕਾ ਮਿਲਿਆ ਸੀ ਪਰ ਉਨ੍ਹਾਂ ਨੂੰ ਬੱਸ ਵਿਚੋਂ ਉਤਰ ਕੇ ਜਾਣ ਦੀ ਇਜਾਜ਼ਤ ਨਹੀਂ ਦਿੱਤੀ ਗਈ ਸੀ। ਇੱਥੇ ਤਕਰੀਬਨ 5 ਹਜ਼ਾਰ ਲੋਕ ਰਹਿੰਦੇ ਹਨ ਅਤੇ ਤਕਰੀਬਨ 20 ਹਜ਼ਾਰ ਸੈਲਾਨੀਆਂ ਨਾਲ ਭਰੇ ਜੈਸਪਰ ਪਾਰਕ ਨੂੰ ਭਿਆਨਕ ਜੰਗਲੀ ਅੱਗ ਕਾਰਨ ਖਾਲੀ ਕਰਵਾਇਆ ਗਿਆ ਸੀ। ਜੰਗਲੀ ਅੱਗ ਨੇ ਇੱਥੇ ਕਰੀਬ $283 ਮਿਲੀਅਨ ਦੀ ਪ੍ਰਾਪਰਟੀ ਸਾੜ ਦਿੱਤੀ ਹੈ, ਜਿਸ ਨਾਲ ਟਾਊਨ ਦੇ $2.2-ਮਿਲੀਅਨ ਸਲਾਨਾ ਪ੍ਰਾਪਰਟੀ ਟੈਕਸ ਦੇ ਰੈਵੇਨਿਊ ਨੂੰ ਨੁਕਸਾਨ ਪੁੱਜਾ ਹੈ।