15.77C Vancouver 15.77C VancouverFeb 25, 2026 2:09 PM - Connect Newsroom - Ramandeep Kaur
ਰਿਚਮੰਡ ਆਰ.ਸੀ.ਐਮ.ਪੀ. ਨੇ ਸ਼ਹਿਰ ਦੇ ਡਾਊਨਟਾਊਨ ਵਿਚ ਰਿਟੇਲ ਚੋਰੀ ਖਿਲਾਫ ਓਪਰੇਸ਼ਨ ਦੌਰਾਨ 14 ਵਿਅਕਤੀਆਂ ਨੂੰ ਗ੍ਰਿਫਤਾਰ ਕੀਤਾ ਹੈ। 15 ਫਰਵਰੀ ਨੂੰ ਚਲਾਏ ਗਏ ਇਸ ਇੱਕ ਦਿਨਾਂ ਬੂਸਟ ਅਤੇ ਬਸਟ ਓਪਰੇਸ਼ਨ ਵਿਚ ਸਾਦੀ ਵਰਦੀ ਵਿਚ ਪੁਲਿਸ ਅਧਿਕਾਰੀਆਂ ਅਤੇ ਸਟੋਰਾਂ ਦੇ ਸੁਰੱਖਿਆ ਕਰਮੀਆਂ ਨੇ ਮਿਲ ਕੇ ਕੰਮ ਕੀਤਾ।
ਪੁਲਿਸ ਮੁਤਾਬਕ, ਮੁਲਜ਼ਮਾਂ ਵਿਚ ਦੋ ਨੌਜਵਾਨ ਨਾਬਾਲਗ ਸਨ ਅਤੇ ਇੱਕ ਹੋਰ ਸ਼ੱਕੀ ਵਿਰੁੱਧ ਪਹਿਲਾਂ ਹੀ ਕਿਸੇ ਹੋਰ ਇਲਾਕੇ ਤੋਂ ਗ੍ਰਿਫ਼ਤਾਰੀ ਵਾਰੰਟ ਜਾਰੀ ਸੀ। ਪੁਲਿਸ ਨੇ ਇਸ ਦੌਰਾਨ ਇੱਕ ਓਰਗਨਾਈਜ਼ਡ ਰਿਟੇਲ ਚੋਰੀ ਗਿਰੋਹ ਨਾਲ ਜੁੜੇ ਦੋ ਸ਼ੱਕੀਆਂ ਦੀ ਵੀ ਪਛਾਣ ਕੀਤੀ। ਇਨਵੈਸਟੀਗੇਟਰਸ ਨੇ ਇਸ ਮੌਕੇ ਲਗਭਗ $3,200 ਦੀ ਕੀਮਤ ਦਾ ਚੋਰੀ ਹੋਇਆ ਸਾਮਾਨ ਬਰਾਮਦ ਕੀਤਾ, ਜਿਸ ਵਿਚ ਮੁੱਖ ਤੌਰ 'ਤੇ ਕੱਪੜੇ, ਨਿੱਜੀ ਵਰਤੋਂ ਦੀਆਂ ਚੀਜ਼ਾਂ ਅਤੇ ਖਾਣ-ਪੀਣ ਦਾ ਸਾਮਾਨ ਸ਼ਾਮਲ ਸੀ।
ਹਿਰਾਸਤ ਵਿਚ ਲਏ ਗਏ ਸਾਰੇ ਵਿਅਕਤੀਆਂ ਨੂੰ ਪੁਲਿਸ ਵੱਲੋਂ ਸੋਸ਼ਲ ਸਰਵਿਸ ਦੀ ਮਦਦ ਲੈਣ ਦੀ ਪੇਸ਼ਕਸ਼ ਵੀ ਕੀਤੀ ਗਈ ਹੈ। ਬੂਸਟ ਅਤੇ ਬਸਟ ਓਪਰੇਸ਼ਨ ਦੇ ਇੰਸਪੈਕਟਰ ਵਾਜ਼ ਕਾਸਮ ਅਨੁਸਾਰ, ਇਹ ਸਾਲ 2026 ਦਾ ਪਹਿਲਾ ਬੂਸਟ ਅਤੇ ਬਸਟ ਓਪ੍ਰੇਸ਼ਨ ਸੀ। ਉਨ੍ਹਾਂ ਕਿਹਾ ਕਿ ਆਰ.ਸੀ.ਐਮ.ਪੀ. ਵੱਲੋਂ ਪੂਰੇ ਸਾਲ ਦੌਰਾਨ ਅਜਿਹੀਆਂ ਹੋਰ ਕਾਰਵਾਈਆਂ ਨਿਯਮਿਤ ਰੂਪ ਵਿਚ ਕਰਨ ਦੀ ਯੋਜਨਾ ਬਣਾਈ ਗਈ ਹੈ।
ਸਰੋਤ: Richmond RCMP news release: https://rcmp.ca/en/bc/richmond/news/2026/02/4350619
