24.5C Vancouver 24.5C VancouverJun 29, 2022 12:43 AM - Connect News
ਸਾਨੀਚ ਦੇ ਵਿੱਚ ਇੱਕ ਬੈਂਕ ਡਕੈਤੀ ਦੀ ਕੋਸ਼ਿਸ਼ ਦੌਰਾਨ ਅੰਨ੍ਹੇਵਾਹ ਹੋਈ ਸ਼ੂਟਿੰਗ 'ਚ 2 ਸ਼ੱਕੀਆਂ ਦੀ ਮੌਤ ਹੋ ਗਈ ਹੈ।
ਮਾਮਲੇ ਸੰਬੰਧੀ ਸਾਨੀਚ ਪੁਲਿਸ ਚੀਫ਼ ਕਾਂਸਟੇਬਲ ਡੀਨ ਡੁਥੀ ਅਤੇ ਵਿਕਟੋਰੀਆ ਪੁਲਿਸ ਦੇ ਐਕਟਿੰਗ ਚੀਫ਼ ਕਾਂਸਟੇਬਲ ਕੌਲਿਨ ਵਾਟਸਨ ਨੇ ਜਾਣਕਾਰੀ ਸਾਂਝੀ ਕੀਤੀ।
ਉਨ੍ਹਾਂ ਦੱਸਿਆ ਕਿ ਘਟਨਾ 'ਚ 6 ਪੁਲਿਸ ਅਫ਼ਸਰ ਜਖਮੀ ਹੋਏ ਹਨ।
ਜਖਮੀ ਅਫਸਰਾਂ 'ਚ 3 ਨੂੰ ਜਲਦੀ ਹਸਪਤਾਲ ਤੋਂ ਛੁੱਟੀ ਮਿਲ ਜਾਣ ਦੀ ਆਸ ਹੈ ਪਰ 3 ਅਫਸਰਾਂ ਦੀ ਸਰਜਰੀ ਹੋਣ ਸੰਬੰਧਤ ਜਾਣਕਾਰੀ ਦਿੱਤੀ ਗਈ।
ਕਾਂਸਟੇਬਲ ਡੁਥੀ ਨੇ ਦੱਸਿਆ ਕਿ ਗੰਭੀਰ ਜਖਮੀ ਅਫਸਰਾਂ ਦੀ ਸਿਹਤ ਬਾਰੇ ਫਿਲਹਾਲ ਸਪਸ਼ਟ ਜਾਣਕਾਰੀ ਨਹੀਂ ਦਿੱਤੀ ਜਾ ਸਕਦੀ।
ਉਨ੍ਹਾਂ ਦੱਸਿਆ ਕਿ ਘਟਨਾ ਤੋਂ ਬਾਅਦ ਇਲਾਕੇ ਦੇ ਘਰਾਂ ਨੂੰ ਖਾਲੀ ਕਰਵਾ ਲਿਆ ਗਿਆ ਸੀ।
ਉਨ੍ਹਾਂ ਕਿਹਾ ਕਿ ਪੁਖਤਾ ਨਹੀਂ ਹੈ ਕਿ ਮਾਮਲੇ 'ਚ ਕੋਈ ਤੀਜਾ ਸ਼ੱਕੀ ਵੀ ਸ਼ਾਮਿਲ ਸੀ ਪਰ ਫਿਲਹਾਲ ਇਸ ਜਾਣਕਾਰੀ ਨੂੰ ਖਾਰਿਜ ਨਹੀਂ ਕੀਤਾ ਗਿਆ ਹੈ।
ਜਖਮੀ ਅਫਸਰਾਂ ਬਾਰੇ ਦੱਸਿਆ ਗਿਆ ਕਿ 3 ਅਫ਼ਸਰ ਸਾਨੀਚ ਪੁਲਿਸ ਦੇ ਸਨ ਅਤੇ 3 ਅਫ਼ਸਰ ਵਿਕਟੋਰੀਆ ਪੁਲਿਸ ਨਾਲ ਸੰਬੰਧਤ ਸਨ।
ਜਾਣਕਾਰੀ ਦਿੱਤੀ ਗਈ ਕਿ ਹਾਲ ਦੀ ਘੜੀ ਨਹੀਂ ਮੰਨਿਆ ਜਾ ਰਿਹਾ ਕਿ ਬੈਂਕ ਦੇ ਕੋਈ ਮੁਲਾਜਮ ਜਾਂ ਕਸਟਮਰਸ ਇਸ ਘਟਨਾ 'ਚ ਜਖਮੀ ਹੋਏ ਹੋਣ।
ਜਾਣਕਾਰੀ ਦਿੱਤੀ ਗਈ ਕਿ ਇਲਾਕੇ 'ਚ ਸ਼ੱਕੀਆਂ ਨਾਲ ਸੰਬੰਧਤ ਇੱਕ ਵਾਹਨ 'ਚ ਧਮਕਾਖੇਜ ਸਮਗਰੀ ਹੋਣ ਦਾ ਸ਼ੱਕ ਹੈ ਅਤੇ ਇਸੇ ਕਾਰਨ ਘਰ ਅਤੇ ਵਪਾਰ ਖਾਲੀ ਕਰਵਾਏ ਗਏ ਸਨ।
2 ਸ਼ੱਕੀਆਂ ਦੀ ਮੌਤ ਦੇ ਮਾਮਲੇ 'ਚ ਪੁਲਿਸ ਦੀ ਕਾਰਵਾਈ ਕਾਰਨ ਮਾਮਲੇ ਦੀ ਜਾਂਚ ਇੰਡੀਪੈਂਡੈਂਟ ਇਨਵੈਸਟੀਗੇਸ਼ਨਸ ਆਫਿਸ ਯਾਨੀ ਕਿ ਆਈ.ਆਈ.ਓ. ਕੋਲ ਪਹੁੰਚ ਗਈ ਹੈ।
ਪੂਰੀ ਘਟਨਾ ਸਵੇਰ ਕਰੀਬ 11.30 ਵਜੇ ਵਾਪਰੀ ਦੱਸੀ ਗਈ ਹੈ।
ਘਟਨਾ ਕਾਰਨ ਦੁਪਹਿਰ ਕਰੀਬ 12.30 ਵਜੇ ਸਾਨੀਚ ਪੁਲਿਸ ਨੇ ਨੌਰਥ ਡੇਰੀ ਰੋਡ ਤੋਂ ਸੀਡਰ ਹਿਲ ਰੋਡ ਅਤੇ ਰਿਚਮੰਡ ਰੋਡ ਤੋਂ ਸੀਡਰ ਹਿਲ ਰੋਡ ਵਿਚਾਲੇ ਸ਼ੈਲਟਰ ਇਨ ਪਲੇਸ ਦੇ ਨਿਰਦੇਸ਼ ਜਾਰੀ ਕਰ ਦਿੱਤੇ ਸਨ।
