12.43C Vancouver 12.43C VancouverJun 18, 2021 4:16 PM -
ਵਿਰੋਧੀ ਪਾਰਟੀਆਂ ਵਲੋਂ ਡਿਫੈਂਸ ਮਨਿਸਟਰ ਹਰਜੀਤ ਸੱਜਣ ਨੂੰ ‘ਸੈਨਸ਼ਰ’ ਕਰਨ ਦਾ ਇੱਕ ਮਤਾ ਵੀਰਵਾਰ ਰਾਤ ਨੂੰ ਹਾਊਸ ਆਫ ਕਾਮਨਜ਼ ਵਿੱਚ ਮਨਜ਼ੂਰ ਕੀਤਾ ਗਿਆ।
ਸੱਜਣ ਇਸ ਸੰਬੰਧ ਵਿੱਚ ਬੇਹੱਦ ਆਲੋਚਨਾ ਦਾ ਸਾਹਮਣਾ ਕਰ ਰਹੇ ਹਨ ਕਿ ਉਨ੍ਹਾਂ ਨੂੰ ਸਾਬਕਾ ਡਿਫੈਂਸ ਚੀਫ ਜੋਨਾਥਨ ਵੈਂਸ ’ਤੇ ਲੱਗੇ ਜਿਨਸੀ ਬਦਸਲੂਕੀ ਦੇ ਦੋਸ਼ਾਂ ਬਾਰੇ ਜਾਣਕਾਰੀ ਸੀ।
ਸੱਜਣ ’ਤੇ ਓਦੋਂ ਤੋਂ ਸਵਾਲ ਖੜੇ ਕੀਤੇ ਜਾ ਰਹੇ ਹਨ ਜੱਦ ਸਾਬਕਾ ਮਿਲਿਟਰੀ ਓਮਬਡਜ਼ਮਨ ਗੈਰੀ ਵੌਲਬੋਰਨ ਨੇ ਕਿਹਾ ਸੀ ਕਿ ਵੈਂਸ ’ਤੇ ਲੱਗੇ ਇਲਜ਼ਾਮਾਂ ਬਾਰੇ ਉਨ੍ਹਾਂ ਸੱਜਣ ਨੂੰ ਮਾਰਚ 2018 ਵਿੱਚ ਪਹਿਲੀ ਵਾਰ ਅਗਾਹ ਕੀਤਾ ਸੀ।
ਕੰਜ਼ਰਵੇਟਿਵ ਲੀਡਰ ਏਰਿਨ ਓ’ਟੂਲ ਦਾ ਕਹਿਣਾ ਹੈ ਕਿ ਸੱਜਣ ਨੇ ਕਨੇਡੀਅਨ ਲੋਕਾਂ ਨੂੰ ਆਪਣੀ ਫੌਜੀ ਸੇਵਾ ਅਤੇ ਆਸਟਰੇਲੀਆ ਤੋਂ ਲੜਾਕੂ ਜਹਾਜ਼ ਖਰੀਦਣ ਦੀ ਜ਼ਰੂਰਤ ਬਾਰੇ ਵੀ ਗੁੰਮਰਾਹ ਕੀਤਾ ਹੈ।
ਜਿੱਥੇ ਸੱਜਣ ਅਤੇ ਲਿਬਰਲ ਸਰਕਾਰ ਮੁਤਾਬਕ ਉਨ੍ਹਾਂ ਨੇ ਸਾਰੀਆਂ ਢੁੱਕਵੀਆਂ ਵਿਧੀਆਂ ਦੀ ਪਾਲਣਾ ਕੀਤੀ, ਓਥੇ ਹੀ ਓ’ਟੂਲ ਦਾ ਕਹਿਣਾ ਹੈ ਕਿ ਸੱਜਣ ਫੌਜ ਵਿੱਚ ਜਿਨਸੀ ਸ਼ੋਸ਼ਣ ਦੇ ਪੀੜਤਾਂ ਨੂੰ ਲਗਾਤਾਰ ਨਿਰਾਸ਼ ਕਰਦੇ ਰਹੇ ਹਨ।
ਓ’ਟੂਲ ਮੁਤਾਬਕ ਇਸੇ ਲਈ ਉਨ੍ਹਾਂ ਦੀ ਪਾਰਟੀ ਨੇ ਆਪਣਾ ਆਖਰੀ ਵਿਰੋਧੀ ਦਿਨ ਪਾਰਲੀਮੈਂਟ ਦੇ ਮੈਂਬਰਾਂ ਨੂੰ ਸੱਜਣ ਨੂੰ ‘ਸੈਨਸ਼ਰ’ ਕਰਨ ਦੇ ਮਤੇ 'ਤੇ ਵੋਟ ਪਾਉਣ ਲਈ ਇਸਤੇਮਾਲ ਕੀਤਾ।
ਜ਼ਿਕਰਯੋਗ ਹੈ ਕਿ ਸੱਜਣ ਦੇ ਮਨਿਸਟਰ ਹੋਣ ਦੇ ਰਿਕਾਰਡ ’ਤੇ ਦਾਗ ਲੱਗਣ ਦੇ ਬਾਵਜੂਦ, ‘ਸੈਨਸ਼ਰ’ ਦੇ ਕੋਈ ਰਸਮੀ ਨਤੀਜੇ ਨਹੀਂ ਹੁੰਦੇ ਅਤੇ ਉਨ੍ਹਾਂ ਨੂੰ ਕੋਈ ਜੁਰਮਾਨਾ ਭੁਗਤਣਾ ਨਹੀਂ ਪਵੇਗਾ।
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਸੱਜਣ ਖਿਲਾਫ ਕੰਜ਼ਰਵੇਟਿਵ ਪਾਰਟੀ ਵਲੋਂ ਪੇਸ਼ ਕੀਤੇ ਮਤੇ ਬਾਰੇ ਅੱਜ ਆਪਣੇ ਸੰਬੋਧਨ ਦੌਰਾਨ ਗੱਲ ਕਰਦਿਆਂ ਕਿਹਾ ਕਿ ਵਿਰੋਧੀ ਪਾਰਟੀ ਵਲੋਂ ਸੱਜਣ ਦੇ ਨਾਂ ਨੂੰ ਬਦਨਾਮ ਕਰਨ ਦੀਆਂ ਇਹ ਕੋਸ਼ਿਸ਼ਾਂ ਅਸਵੀਕਾਰਣ ਯੋਗ ਹਨ।
ਟਰੂਡੋ ਅਨੁਸਾਰ ਸੱਜਣ ਨੇ ਆਪਣਾ ਸਾਰਾ ਜੀਵਨ ਦੇਸ਼ ਦੀ ਸੇਵਾ ਵਿੱਚ ਗੁਜ਼ਾਰਿਆ ਹੈ ਅਤੇ ਉਹ ਇੱਕ ਇਮਾਨਦਾਰ ਅਤੇ ਇਨਸਾਨ ਹਨ ਜੋ ਮਿਲਿਟਰੀ ਵਿੱਚ ਬੇਹਤਰ ਤਬਦੀਲੀਆਂ ਲਿਆਉਣ ਲਈ ਲੰਮੇਂ ਸਮੇਂ ਤੋਂ ਯਤਨਸ਼ੀਲ ਰਹੇ ਹਨ।
