ਸਸਕੈਚਵਨ ਦੀ ਸੱਤਾਧਾਰੀ ਪਾਰਟੀ ਲਗਾਤਾਰ ਪੰਜਵੀਂ ਵਾਰ ਬਹੁਮਤ ਨਾਲ ਜਿੱਤੀ ਚੋਣ

ਸਸਕੈਚਵਨ ਦੀ ਸੱਤਾਧਾਰੀ ਪਾਰਟੀ ਲਗਾਤਾਰ ਪੰਜਵੀਂ ਵਾਰ ਬਹੁਮਤ ਨਾਲ ਚੋਣ ਜਿੱਤੀ ਹੈ। ਉੱਥੇ ਹੀ ਸਕਾਟ ਮੋ ਦੀ ਲੀਡਰਸ਼ਿਪ ਵਿਚ ਸਸਕੈਚਵਨ ਪਾਰਟੀ ਦੀ ਇਹ ਦੂਜੀ ਜਿੱਤ ਹੈ। ਦੂਜੇ ਪਾਸੇ 2007 ਤੋਂ ਸੱਤਾ ਤੋਂ ਬਾਹਰ ਐੱਨ.ਡੀ.ਪੀ. ਨੂੰ ਫਿਰ ਤੋਂ ਹਾਰ ਦੇਖਣੀ ਪਈ। ਸਸਕੈਚਵਨ ਦੀਆਂ ਵਿਧਾਨ ਸਭਾ ਚੋਣਾਂ ਵਿਚ ਪੰਜਾਬੀ ਮੂਲ ਦੇ ਤੇਜਿੰਦਰ ਸਿੰਘ ਗਰੇਵਾਲ ਵੀ ਵਿਧਾਇਕ ਬਣੇ ਹਨ। ਉਨ੍ਹਾਂ ਸਸਕੈਟੂਨ ਯੂਨੀਵਰਸਿਟੀ-ਸਦਰਲੈਂਡ ਸੀਟ ਤੋਂ ਐੱਨ.ਡੀ.ਪੀ. ਦੀ ਟਿਕਟ ’ਤੇ ਚੋਣ ਦਿੱਤੀ। ਉਨ੍ਹਾਂ ਆਪਣੀ ਰਾਈਡਿੰਗ ਵਿਚ ਕੁੱਲ ਵੋਟਾਂ ਦਾ 55.2 ਫੀਸਦੀ ਵੋਟ ਸ਼ੇਅਰ ਹਾਸਲ ਕੀਤਾ। 2024 ਦੀਆਂ ਚੋਣਾਂ ਵਿਚ ਇਹ ਨਵਾਂ ਹਲਕਾ ਸੀ।

ਤੇਜਿੰਦਰ ਸਿੰਘ ਗਰੇਵਾਲ ਪੰਜਾਬ ਦੇ ਭਦੌੜ ਦੇ ਜੰਮਪਲ ਹਨ। ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਲੁਧਿਆਣਾ ਤੋਂ ਪੀ.ਐੱਚ.ਡੀ. ਤੇਜਿੰਦਰ ਸਿੰਘ ਗਰੇਵਾਲ ਅਤੇ ਉਨ੍ਹਾਂ ਦੀ ਪਤਨੀ ਡਾ. ਰਵਿੰਦਰ ਕੌਰ ਗਰੇਵਾਲ ਨੇ ਕੁਝ ਸਮਾਂ ਯੂਨੀਵਰਸਿਟੀ ਵਿਚ ਪੜ੍ਹਾਇਆ ਵੀ ਅਤੇ ਕਰੀਬ 1999 ਵਿਚ ਕੈਨੇਡਾ ਆ ਗਏ ਸਨ।

ਗੌਰਤਲਬ ਹੈ ਕਿ ਸਸਕੈਚਵਨ ਵਿਚ ਸੱਤਾਧਾਰੀ ਪਾਰਟੀ ਅਤੇ ਕਾਰਲਾ ਬੈਕ ਦੀ ਐੱਨ. ਡੀ. ਪੀ. ਵਿਚਾਲੇ ਸਖ਼ਤ ਮੁਕਾਬਲਾ ਸੀ। ਬੀ. ਸੀ. ਦੀ ਤਰ੍ਹਾਂ ਇੱਥੇ ਵੀ ਸਕਾਟ ਮੋ ਦੀ ਸਲਿਮ ਬਹੁਮਤ ਨਾਲ ਸਰਕਾਰ ਬਣ ਰਹੀ ਹੈ।